Bugesera : Ubutaka bwa Leta bwarengerewe n’abaturage babwomeka ku bwabo

Hifashishijwe uburyo bw’ikoranabuhanga, Komisiyo ya Politiki, Uburinganire n’Ubwuzuzanye bw’Abagore n’Abagabo mu Iterambere ry’Igihugu yaganiriye n’Umuyobozi w’Ikigo cgishinzwe imicungire n’imikoreshereze y’ubutaka mu Rwanda Mukamana Espérance, ku bibazo birebana n’ubutaka byagaragaye muri raporo y’ibikorwa by’ Urwego rw’ Umuvunyi by’umwaka wa 2019-2020.

Iyo raporo yagaragaje ikibazo cy’abaturage bo mu Karere ka Bugesera bafite ubutaka bwashyizweho itambamira kubera kurengera cyangwa kwigabiza ubutaka bwa Leta, ibi byagaragajwe n’itsinda ryo ku rwego rw’Igihugu ryakurikiranaga imitungo ya Leta yarengerewe.

Komisiyo yabajije uriya muyobozi uko iki kibazo gihagaze mu Bugesera ndetse n’ahandi hose mu Gihugu. Asubiza iki kibazo yavuze ko Akarere kagaragaje ko ntaho buhuriye n’ubutaka bwako, hemezwa ko ubu butaka bukurirwaho itambamira bwari bwarashyiriweho.

Umuyobozi Mukuru wa RLMUA Mukamana Espérance yongeyeho ko hari aho basanze ubutaka bwa Leta bwararengerewe n’abaturage bakabwomeka ku bwabo (aho usanga ari igice, atari ubutaka bwose).

Yavuze ko hemejwe ko ubwo butaka bwakurwaho ubwa Leta hanyuma ahasigaye hagasubizwa abaturage, kandi ngo byarakozwe.

Yagaragarije Komisiyo ko banasanze hari ubutaka abaturage bibarujeho ariko ari ubwa Leta, hemejwe ko ibyangomwa byabo biteshwa agaciro, ubwo butaka bukandikwa ku Karere ka Bugesera.

Mu gukemura iki kibazo ku rwego rw’Igihugu, Ikigo cy’ Igihugu gishinwe Ubutaka cyatanze amatangazo kuva muri 2018, amanikwa mu tugari hirya no hino, kugira ngo za komite z’ubutaka zibikurikirane, kandi ngo na n’ubu biracyakomeje ndetse biri kugana ku musozo.

Yongeyeho ko iyo umuturage uvuga ko ubutaka ari ubwe agaragaje ibimenyetso bibihamya, ubwo butaka abuhererwa ibyangombwa. Iyo nta bimenyetso abashije kugaragaza, ubwo butaka bwandikwa kuri Leta.

Mukamana Espérance yavuze ko akurikije raporo ababitsi b’impapurompamo z’ubutaka hirya no hino mu Ntara bagenda bamugezaho, bigaragara ko ahenshi byakozwe, ahandi biracyari gukorwa uretse ko hari aho byakomwe mu nkokora n’icyorezo cya COVID-19.

Komisiyo yasabye ibisobanuro ku kibazo kigaragara hirya no hino cy’aho ubutaka bw’abaturage bunyuzwamo ibikorwa remezo ariko ibyangombwa byabo ntibihindurwe, ahubwo ubwakoreshejwe na bwo bugakomeza kugaraga ku byangombwa by’ubutaka bwabo ndetse bamwe bakanakomeza kubusorera.

Agaruka ku kibazo cy’aho abaturage bafite ibyangombwa bigaragaraho ubuso bw’ubutaka bunini burenze ubwo bafite, Mukamana yavuze ko koko habayeho amakosa ubwo ubutaka bwandikagwa bwa mbere, ariko ko ikigo akuriye gifite gahunda yo kubikosora hose, umuturage atongeye kwishyuzwa.

Komisiyo yasabye Ikigo cy’ Igihugu gishinzwe Ubutaka gufata ingamba zihamye no gukora cyane kugira ngo ibibazo by’ubutaka bigende bigabanuka, ntibikomeze kuza ku isonga nk’uko byagaragaye mu myaka itatu ishize.

Hagarukwa ku bibazo byagaragajwe muri Raporo y’ibikorwa by’ Urwego rw’Umuvunyi by’umwaka wa 2019/20, Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, yanaganiriye n’Abayobozi b’uturere twa Ngoma na Muhanga.

Subiza

Email Yawe Ntiribugaragazwe