Batubereye urugero rw’ibishoboka- Perezida Kagame

Mu Butumwa yatangajwe abinyujije ku mbuga nkoranyambaga, Perezida kagame yashimangiye ko Intwari u Rwanda rwizihiza ari Abanyarwanda bagaragaje kwitangira Igihugu batizigama, ati: “Batubereye urugero rw’ibishoboka, ubu u Rwanda rukaba ari imbuto z’ubutwari bwabo. Uwo muco ugomba kuba uruhererekane tuzakomeza kuraga abato.”

Yakomeje avuga ko icyorezo cya COVID-19 cyahungabanyije u Rwanda n’Isi muri rusange cyasize isomo rigaragaza ko ibikorwa by’ubutwari bishoboka kuri buri wese.

Ati: “Iki cyorezo cyatweretse ko twese dushoboye ibikorwa by’ubutwari. Mu gihe tugikomeje urugamba rwo kurwanya Covid-19, turashima inzego z’ubuzima bari ku isonga, n’inzego z’umutekano kubera ubwitange n’ubutwari bwabo. Buri munyarwanda akomeze guharanira kurinda mugenzi we.”

Umuhango wo kwizihiza uyu munsi ku rwego rw’Igihugu urakorwa hifashishijwe ikoranabuhanga mu rwego rwo kwirinda ikwirakwizwa ry’icyo cyorezo.

Intwari u Rwanda rwizihiza 

Icyiciro cy’Imanzi

Imanzi ni ni Intwari y’ikirenga yagaragaje ibikorwa by’akataraboneka birangwa n’ubwitange, akamaro n’urugero bihebuje. CHENO itangaza ko muri iki cyiciro k’Intwari z’ u Rwanda hashyirwamo intwari itakiriho.

Muri iki cyiciro harimo Umusirikare Utazwi Izina, uyu akaba ari Ingabo ihagarariye izindi ngabo zitangiye Igihugu zikagwa ku rugamba mu bihe byashize, iby’ubu n’ibizaza.

Maj. Gen. Fred Gisa Rwigema: Urwego rw’Igihugu rw’Intwari z’Igihugu, Imidari n’Impeta by’Ishimwe, rutangaza ko yaranzwe n’ubwitange buhebuje ubwo yayoboraga Ingabo za FPR-Inkotanyi ku rugamba rwo kubohora u Rwanda mu mwaka wa 1990 nyuma akarugwaho.

Yagiriye akamaro n’abandi benshi kuko yarwanye intambara aharanira guca ubuhunzi haba mu Banyarwanda no banyamahanga, no guharanira uburenganzira bwa muntu n’ibindi. Yabereye abantu bose urugero rwiza rw’ubwitange bashobora gukurikiza.

Intwari z’Imena

Mutara III Rudahigwa wabaye Umwami w’u Rwanda (1931-1959), yagaragaje ibikorwa by’urukundo mu Banyarwanda, ashyiraho ikigega cyo kurihira amashuri abana b’Abanyarwanda. Yakuyeho ubuhake abusimbuza akazi. Yagabiye abakene. Yahirimbaniye ubwigenge.

Rwagasana Michel: Yabaye Umunyamabanga w’Inama nkuru y’Igihugu cy’u Rwanda n’Umunyabanga w’umwami Mutara III Rudahigwa, yabaye umukozi wa Leta Mbiligi muri Teritwari ya Ruanda-Urundi mu Biro bishinzwe abakozi kavukire i Bujumbura nk’uko bitangazwa na CHENO.

Yagaragaje ubumuntu mu mibereho ye, agaragaza umutima wo gukunda abantu no kurwanya Politiki y’amacakubiri, bituma ahara byose kugeza ku buzima bwe, yanze gukoresha ububasha yahawe ku nyungu ze bwite, ahubwo aharanira ubumwe bw’Abanyarwanda.

Madamu Agathe Uwiringiyimana: Yabaye Minisitiri w’Intebe (Nyakanga 1993-Mata 1994). Yagize umutima wa kigabo ari Minisitiri w’Amashuri Abanza n’Ayisumbuye. Yahangaye no gukuraho akarengane mu mashuri mu gihe abashinze icyo bita iringaniza bari bagitegeka Igihugu. Yarwanije ishyirwa mu bikorwa rya Jenoside yakoreye Abatutsi ndetse aza kwicwa azira ibitekerezo bye.

Niyitegeka Felicite: Yakoze imirimo itandukanye irimo kwigisha, kurera, gucunga umutungo, no gufasha abatishoboye. Mu mwaka wa 1994 Jenoside yakorewe Abatutsi yamusanze ku Gisenyi aho yiciwe azira ko yarwanye ku Batutsi bihishe mu kigo ashinzwe kuyobora cya ‘Centre Saint Pierre’.

Abanyeshuri b’i Nyange batewe n’abacengenzi banga kwitandukanya tariki ya 18/03/1997 mu ijoro: Iri shuri ryisumbuye riherereye mu Ntara y’Iburengerazuba mu Karere ka Ngororero ahari mu ntara ya Kibuye. Mu mwaka wa 1997 ubwo mu Rwanda hari umutekano muke, abacengezi bateye iri shuri binjira mu mwaka wa 5 n’uwa 6. Ubwo abo banyeshuri baterwaga n’abacengenzi, bakinjira, bahise bababaza bati: Muratuzi? barongera baravuga bati: Mwatwirukanye mu Rwanda duhungira muri Zaïre mudusangayo none “vous allez me voir”.

Basabye aba banyeshuri kwitandukanya. bavuga bati: “Abahutu bage ukwabo n’Abatutsi ukwabo”. Abanyeshuri basubiza bavuga bati: “twese turi Abanyarwanda”. Nibwo abacengezi batangiye kubarasa. Bamwe muri bo barapfa abandi barakomereka. Aba banyeshuri bavuga ko ubuyobozi bwahoraga bubashishikariza kubana mu mahoro.

Abanyeshuri barokotse igitero cy’abacengenzi bahamya ko bakundaga gusenga kandi abayobozi bakababa hafi.

Intwari u Rwanda  zemejwe bwa mbere n’Inama y’Abaminisitiri yo ku ya 09 Ukuboza 2001, yemeje Intwari 53 z’ikubitiro, izishyira mu byiciro bibiri ari byo Imanzi n’Imena.

Ubuyobozii bw’Urwego rw’Igihugu rushinzwe Intwari z’Igihugu Imidari n’Impeta by’Ishimwe (CHENO) buratangaza ko mu minsi iri imbere abantu babarirwa muri 70 bashobora gushyirwa mu cyiciro cy’Intwari z’Ingenzi nibaramuka bemejwe n’Inama y’Abaminisitiri.

Subiza

Email Yawe Ntiribugaragazwe