Leta y’u Bwongereza yafashe icyemezo cyo guhagarika ingendo z’indege ziva mu Rwanda

Leta y’u Bwongereza yafashe icyemezo cyo guhagarika ingendo z’indege ziva mu bihugu birimo n’u Rwanda, kubera impungenge z’ikwirakwira ry’ubwoko bushya bw’icyorezo cya COVID19 bwagaragaye bwa mbere muri Afurika y’Epfo.

Nk’uko byatangajwe na Leta y’u Bwongereza, icyemezo cyo gukumira ingendo zituruka muri Leta Zunze Ubumwe z’Abarabu (UAE), u Burundi n’u Rwanda cyafahswe mu maguru mashya kikaba gitangira kubahirizwa kuri uyu wa Gatanu tariki ya 29 Mutarama 2021 guhera saa saba z’amanywa.

Itangazo ryatshyizwe ahagaragara riramenyesha ko abantu bose banyuze muri ibyo bihugu uko ari bitatu mu minsi 10 ishize batemerewe kwinjira ku butaka bw’Ubwami bw’u Bwongereza.

Icyo cyemezo ngo ntikireba abaturage bakomoka muri Leta zigize Ubwami bw’u Bwongereza harimo Abongereza n’Abanya-Irlande, cyangwa se abanyamahanga basanzwe batuye mu Bwongereza, nubwo na bo ngo bazasabwa kwishyira mu kato k’iminsi 10 bari kumwe n’imiryango yabo.

Abagenzi batashye bavuye muri ibyo bihugu ntibazaba bemerewe kuva mu kato bamaze kwipimisha nk’uko bisanzwe bikorwa ku binjira mu gihugu.

Nanone kandi ngo nta ngendo zizongera gukorwa ziturutse muri Leta Zunze Ubumwe z’Abarabu (UAE) mu ndetse zitwara abagenzi mu buryo bwa rusange.

Leta y’u Bwongereza yatangaje ko ingendo zituruka muri ibyo bihugu zahagaritswe nyuma yo gutahura ko virusi nshya yagaragaye muri Afurika y’Epfo ishobora kuba yarakwirakwijwe mu bihugu bitandukanye by’Afurika n’ubwo kugeza ubu ubwo bwoko butahatahurwa mu Rwanda.

Kugeza ubu nta ngendo na zimwe zisonewe kuri icyo cyemezo, harimo n’indege z’ubucuruzi, ariko inzira z’ubucuruzi zizafasha Abongereza n’abatuye mu Bwongereza gusubira muri UK ni zo zemerewe gukora gusa.

Abongereza bari muri Leta Zunzwe Ubumwe z’Abarabu kuri ubu barasabwa gukoresha indege z’ubucuruzi kugira ngo binjire mu Bwongereza.

Abo baturage basabwe gusuzuma inama zitangwa n’Ibiro bishinzwe ububanyi n’Amahanga, Commonwealth n’iterambere (FCDO) ndetse bakanakurikiza amabwiriza bahabwa n’ibihugu baturukamo. Icyo kigo ngo kizakomeza gutanga inama zigamije gufasha abaturage b’u Bwongereza bakeneye ubufasha igihe cyose babukeneye.

Icyo gikorwa cyo guhagarika ingendo zpo mu ndege zituruka muri ibyo bihugu kije gikurikira ingamba Leya y’u Bwongereza yafashe guhera ku wa gatatu tariki ya 27 Mutarama 2021 zigamije gukumira ubwandu bwa COVID-19 bwanmbukiranya imipaka, izigamije kugabanya umuvundo muri za Hoteli n’izo gusaba bifuza kujya mu mahanga kubanza gutanga impamvu zifatika.

Amakuru mashya kuri izo ngamba zafashwe ngo azatangazwa mu cyumweru gitaha.

Kuri ubu imibare y’abandura COVID-19 isanzwe ni yo ikomeje kwiyongera mu Rwanda. Kuri uyu wa Kane habonetse abarwayi bashya 363 batumye umubare w’abakirwaye bagera ku 5,109 mu gihe abamaze gukira muri rusange ari 9,234. Abamaze guhitanwa n’icyo cyorezo na bo bageze ku 186 barimo 3 bapfuye uyu munsi.

Subiza

Email Yawe Ntiribugaragazwe