Abapolisi bo mu muhanda baje ku isonga mu kurya ruswa mu Rwanda – TI-RWANDA

Ubushakashatsi bwa 2020 kuri ruswa ntoya mu Rwanda bwagaragaje ko Urwego rw’Abikorera n’Ishami rya Polisi y’u Rwanda biyoboye izindi nzego mu Gihugu mu kurangwamo ruswa nyinshi.

Mu muhango wo gushyira ahagaragara ibyavuye mu bushakashatsi bwakozwe ku rwego rw’Igihugu no ku rwego mpuzamahanga wabaye kuri uyu wa Kane tariki ya 28 Mutarama 2021, Ubuyobozi bwa TI-Rwanda bwagaragaje ko ikigereranyo cya ruswa ntoya kigeze kuri 2.50% mu mwaka wa 2020 kivuye kuri 3.28% mu mwaka wa 2017, kuri 2.08% mu 2018, no kuri 2% mu mwaka wa 2019.

Ikigereranyo cya ruswa yakiriwe mu Ishami rya Polisi y’u Rwanda rishinzwe umutekano wo mu muhanda cyavuye kuri 14.29% mu mwaka wa 2018 kigera ku 9.7% mu 2019, muri uyu mwaka wa 2020 kiri kuri 12%.

Inzego zagaragaje kubamo abantu benshi bakira cyangwa batanga ruswa ni urw’Abikorera ruri ku kigero cya 12.95% rukurikirwa n’ishami rya Polisi rishinzwe umutekano wo mu muhanda riri ku kigero cya 12.70.

Muri rusange amahirwe yo gutanga ruswa mu nzego zitandukanye yiyongereye ku kigero cya 3.8 mu gihe umwaka ushize cyari kuri 3.7, mu 2018 3.2% na ho mu 2017 cyari 4.5.

Umuvunyi Mukuru Nirere Madeleine, yashimiye TI-Rwanda yashyize ahagaragara ishusho y’uko ruswa ihagaze mu Rwanda haba mu Gihugu imbere no ku rwego mpuzamahanga.

Yavuze ko ari ingenzi kuba u Rwanda rukiri mu bihugu bifite ikigereranyo cya ruswa kiri hasi haba mu Karere k’Iburasirazuba bw’Afurika ruherereyemo no muri Afurika yo munsi y’Ubutayu bwa Sahara.

Yibukije ko muri ibi bihe Isi yugarijwe n’icyorezo cya COVID-19 hakiri urugendo rwokurwanya ruswa, kandi haracyakenewe kongera ingamba zo kurwanya ruswa ku bufatanye bw’inzego zitandukanye zirimo iza Leta, abikorera sosiyete sivile n’izindi nzego.

Yagize ati: “Turacyafite urugendo nk’Igihugu, ni yo mpamvu gutanga serivisi kandi zikorewe mu mucyo bwigomba kuba ihame, kuko ubonye serivisi nziza nta mpamvu yindi aba afite yo gutanga ruswa. Birakwiye ko twese dufatanyiriza hamwe kugira ngo turwanye ruswa, twongera gusaba inzego z’abikorera, sosiyete siville kubahiriza amategeko no kugaragaza ubunyangamugayo mu mikorere.”

Umuhango wo kumurika ubushakashatsi kuri ruswa wabaye hifashishijwe ikoranabuhanga, abitabiriye bakaba bashimye kuba Leta y’u Rwanda ikomeje gukaza ingamba zo kurwanya ruswa no mu bihe icyorezo cya COVID-19 cyabaye imbogamizi mu nzego zitandukanye.

Umuyobozi Mukuru wa TI-Rwanda Ingabire Marie Immaculée, yagaragaje ko ubushakashatsi bwakozwe kuri ruswa mu mwaka wa 2020 mu bihe bigoye ubwo u Rwanda n’Isi byari bihanganye n’icyorezo cya COVID-19, bukaba bugaragaza uburyo ruswa yagize ingaruka ku rugamba rwo kurwanya icyo cyorezo.

Muri rusange ubwo bushakashatsi bwakozwe ku baturage 2,336 barimo 55.9% binjiza amafaranga y’u Rwanda ari munsi y’ibihumbi 31. Muri bo abagabo ni 54.7% ni abagaboo mu gihe 45.3% abagore.

Abagera kuri 63.6% babajijwe batuye mu cyaro mu gihe 36.4% ari abanyamujyi, bose bakaba barimo 40% barangije amashuri abanza, 36.9% bize ayisumbuye, 8.6% bize kaminuza, 5.4% bize imyuga n’ubumenyi ngiro mu gihe 8.3% batigeze bagera mu ishuri.

Ababajijwe harimo abakorera mu nzego z’abikorera bangana na 19.5%, abikorera bangana na 44.6%, abadafite akazi 7.7%, abacurizi bangana na 18.7%, abanyeshuri bangana na 2.1%, abakozi ba Leta 3.7%, n’abari mu kiruhuko k’izabukuru bangana na 2.1%,

Iyo raporo yerekana ko Abanyarwanda bangana na 52.8% ari bo babona ko ikigereranyo cya ruswa kiri hasi cyane mu Rwanda ugereranyije na 61.9% babivugaga mu 2019, mu gihe 20.5% bavuga ko ruswa iri mu gihugu ivuza ubuhuha bavuye kuri 13.3% babivugaga mu 2019.

Iyo raporo kandi yerekana ko icyorezo cya COVID19 cyagize ingaruka ku mbaraga Leta y’u Rwanda ishyira mu kurwanya ruswa n’ibyaha biyishamikiyeho. Muri rusange uburyo Abanyarwanda babona imbaraga zashyizwe mu kurwanya ruswa bwagabanyutseho 6%, aho bwavuye ku kigero cya 81.9% mu 2019 bukagera kuri 75.9% mu 2020.

Ibyo ngo byatewe n’uko ingufu zirimo n’iz’ubuyobozi bukuru bw’Igihugu zongerewe mu kkurwanya icyorezo cya COVID-19.

Umuyobozi Nshingwabikorwa wa TI-Rwanda Apollinaire Mupiganyi, yahishuye ko uretse kuba COVID-19 yaragize ingaruka ku kurwanya ruswa, ruswa na yo yagize uruhare mu kubangamira ingamba zo kurwanya icyo cyorezo mu buryo bumwe cyangwa ubundi haba mu Rwanda no ku rwego mpuzamahanga.

Yagize ati: “COVID-19 si ikibazo cy’ubuzima gusa, ahubwo ni n’ikibazo cya ruswa. Mu mwaka ushize ibirego bya ruswa byariyongereye ku isi yose. ubushakashatsi bwacu bugaragaza ko ibiguhug byamunzwe na ruswa kurusha ibindi ari na byo birangwa n’intege nke mu kurwanya icyo cyorezo.”

Subiza

Email Yawe Ntiribugaragazwe