Turahangana n’ibyo bibazo dushora imari- Perezida Kagame

“Mu gihe duharanira kugabanya umuvuduko w’imihindagurikire y’ikirere, tugomba no gukora ku kugabanya ingaruka za yo.” Iyo ni imwe mu mpanuro za Perezida wa Repubulika y’u Rwanda Paul Kagame, ubwo yagezaga ijambo ku bitabiriye inama y’iminsi ibiri yiga ku guhangana n’imihindagurikire y’ikirere.

Iyo nama mpuzamahanga yiswe “Climate Adaptation Summit (CAS-2021)” yateguwe na Leta y’u Buholandi, ikaba yayobowe na Minisitiri w’Intebe w’icyo Gihugu Mark Rutte. Yatangiye ejo ku wa Mbere tariki ya 25 Mutarama ikaba isozwa kuri uyu wa 26 Mutarama 2021.

Perezida Kagame ni umwe mu banyacyubahiro bagaragaje ko imihindagurikire y’ikirere ari ukuri guhamagarira abatuye Isi gushyira hamwe bagaharanira kubaka imiryango n’ubukungu bikingira rubanda ingaruka zako.

Yakomeje ashimira Minisitiri w’Intebe Mark Rutte na Guverinoma yose y’u Buholandi, bayoboye iyi gahunda itegura Inama y’Umuryango w’Abibumye y’umwaka wa 2021 yiga ku ihindagurika ry’ibihe (COP-26 ).

Yavuze ko mu Rwanda, imihindagurikire y’Ikirere ikomeje kwigaragaza mu buryo budasanzwe burimo imvura nyinshi ndetse n’imyuzure, ashimanigira ko iyo ikirere gihindutse bigira ingaruka no ku buhinzi.

Yagize ati: “Turahangana n’ibyo bibazo dushora imari muri gahunda zo gufata no kubungabunga amazi, harimo kuvugurura aho amazi aruhukira n’ibishanga. Mu Mwaka ushize u Rwanda rwashyizeho Ikigo Gishinzwe Umutungo Kamere w’Amazi mu Rwanda (Rwanda Water Resources Board-RWB) kigamije gushyiraho ingamba zihurijwe hamwe kandi z’igihe kirekire zijyanye n’iby’amazi, kuhira ndetse n’ibidukikije.”

Uretse ibyo na none u Rwanda rwiyemeje kugabanya 38% by’ibyuka bihumanya ikirere bitarenze mu mwaka wa 2030, izo ngamba zikazakumira toni zisaga miriyoni 4.6 z’ibyuka bihumanya ikirere.

Kugira ngo iyo gahunda igerweho, u Rwanda rusabwa miriyali 11 z’Amadorari y’Amerika, harimo miriyari 5.7 z’amadorali zizifashishwa mu kugabanya imyuka ihumanya (C02 ), izindi miriyari 5.3 zikifashishwa mu kwisuganya no kujyana n’imiterere y’ibihe.

Ibyo bizagerwaho hongerwa imbaraga mu kunoza uburyo bwo gutunganya ingufu, gukoresha inganda, gucunga imyanda, ubwikorezi, ndetse n’ubuhinzi.

Umukuru w’u Rwanda Paul Kagame, yashimiye Leta y’u Buholandi kuba umuterankunga ukomeye muri izo gahunda, by’umwihariko mu bijyanye no kwifashisha ikoranabuhanga.

Yashimangiye ko Ikigega cy’Igihugu cy’ibidukikije n’imihindagurikire y’ibihe (FONERWA) gihuza ibijyanye no gutera inkunga imishinga yose ijyanye no guhangana n’imihindagurikire y’ibihe, kandi byagize uruhare mu guhanga imirimo myinshi itangiza ibidukikije.

Yakomoje no ku buryo Leta y’u Rwanda yongereye imbaraga mu gushyigikira ubudahangarwa bw’ubukungu n’ibidukikije mu Gihugu, hubakwa imijyi itangiza ibidukikije ndetse no kurinda umutungo kamere.

Yakomeje agira ati: “Kugira ngo tugere kuri iyo ntego, turimo gukora ibishoboka byose mu kubungabunga amashyamba, binyuze mu bufatanye bwa Leta n’abikorera hamwe n’abafatanyabikorwa b’abashoramari. Gushora imari mu bikorwa bigamije guhangana n’imihindagurikire y’ikirere bifasha imiryango yacu gutegura iterambere n’uburumbuke by’ahazaza.”

Perezida Kagame yasabye abayobozi bitabiriye iyo nama yabaye hifashishijwe ikoranabuhanga gushyira imbere gahunda zigamije gufasha Isi guhangana n’iyo mihindagurikire y’ikirere muri uyu mwaka na nyuma yawo.

Umunyamabanga Mukuru w’Umuryango w’Abibumbye António Guterres, na we yashimye Leta y’u Buholandi ku ruhare ikomeje kugira mu bikorwa bijyanye no guhangana n’imihindagurikire y’ibihe ku Isi.

Yakomeje asaba ibihugu byateye imbere kubahiriza ibikubiye mu masezerano y’i Paris nk’uko byiyemeje gukusanya miliyari 100 z’amadolari y’Amerika yo gushyigiira ibikorwa byo guhangana n’ingaruka z’imihindagurikire y’Ikirere.

Yashingiye ku kuba imihindagurikire y’ibihe ituma ibihugu bikiri mu nzira y’Amajyambere bigira icyuho cya miliyari zisaga 70 z’amadolari y’Amerika, zishobora kuzaba zibarirwa hagati ya miliyari 280 kugeza kuri 500 z’amadolari bitarenze mu 2050.

Ibigo by’imari bikomeye ndetse n’abandi baterankunga bo mu nzego zitandukanye byibukijwe ko inkunga bizatanga  zizagira uruhare rukomeye mu guhangana n’imihindagurikire y’ibihe.

Subiza

Email Yawe Ntiribugaragazwe