Ikipe ya mbere yatwaye igikombe cya NBA izajya gusura Perezida Joe Biden muri White House[ AMAFOTO]

Ubwo Perezida watowe Joe Biden azaba atangiye imirimo, Los Angeles Lakers yizeye kuba ikipe ya mbere yatwaye igikombe cya NBA izajya gusura Perezida muri White House kuva mu 2016.

Nta kipe yasuye White House ku gihe cy’ubutegetsi bwa Donald Trump, ibintu ubusanzwe byari umuco.

Perezida Trump yahagaritse gutumira ikipe zatwaye igikombe cya NBA mu myaka ya vuba nyuma y’uko abakinnyi benshi bavuze ko nta wifuza kujyayo kubonana nawe.

Ibinyamakuru muri Ameirka ariko ubu biravuga ko Lakers yaba yifuza gusura Biden nyuma y’igihe azaba yahawe ubutegetsi tariki 20 z’uku kwezi.

Cleveland Cavaliers niyo kipe ya nyuma iheruka gusura Perezida uri mu mirimo, Barack Obama, nyuma y’uko bari begukanye igikombe cya 2016.

Golden State Warriors (2017 na 2018) hamwe na Toronto Raptors (2019) ntabwo zagiye gusura Trump.

Birashoboka ko Lakers yazasura White House ubwo bazakina na Washington Wizards iri iwayo, mu gihe amabwiriza yo kwirinda Covid-19 cyangwa Biden ubwe bitababuza.

Mu ijoro ryo kuwa kane Lakers yari iwayo kuri Staples Center yatsinzwe umukino wa gatatu mu mikino icyenda imaze gukina kuva iyi ‘season’ yatangira, ku manota 109 ku 118 ya San Antonio Spurs.

LeBron James yatsinze amanota 27 ariko 28 ya LaMarcus Aldridge wa Spurs yatumye iyi kipe itsinda umukino wa kane mu munani imaze gukina.

Ahandi, Seth Curry wa Philadelphia 76ers – umuvandimwe wa Stephen Curry wa Golden State Warriors – bamusanzemo Covid-19 kuwa kane.

Ikipe ye iri imbere mu gice cy’iburasirazuba ariko yaraye itsinzwe ku nshuro ya kabiri muri iyi ‘saison’ ku manota 109 ku 122 ya Brooklyn Nets.

Mu mukino waranze ijoro ryacyeye, Luka Doncic yatsinze amanota 38 muri Mavericks ubwo batsindaga hongeweho iminota Nuggets nayo yari ihagaze bwuma ifashijwe na Nikola Jokic watsinze amanota 38.

Umunyaseribiya Jokic n’umunyasloveniya Doncic nibo bigaragaje cyane muri uyu mukino warangiye Dallas itsinze Denver amanota 124 ku 117.

Subiza

Email Yawe Ntiribugaragazwe