Umunyarwanda yerekanywe nk’umutoza mukuru w’ikipe ya Bandari FC

Casa Mbungo Andre kuri uyu wa Mbere taliki 04 Mutarama 2021 yerekanywe nk’umutoza mukuru w’ikipe ya Bandari FC mu cyiciro cya mbere muri Kenya.

Uyu mutoza akaba yasinye amasezerano y’imyaka 2 aho yasimbuye kuri uyu mwanya  Kennedy Odhiambo wagizwe umutoza mukuru wa Sofapaka FC nayo yo muri Kenya.

Casa Mbungo wari umutoza wa Gasogi United mu Rwanda azungirizwa na Patrick Odhiambo wari witabajwe n’ikipe ya  Gor Mahia muri iyi minsi nyuma y’aho uwari wagizwe umutoza mukuru, Roberto Oliveira yirukanwe kubera ibyangombwa bituzuye.

Nyuma yo kwerekanwa nk’umutoza mukuru wa Bandari FC, nk’uko tubikesha “Goal.com”, Casa yavuze ko yishimiye kuba umutoza w’iyi kipe kuko ari ikipe buri mutoza wese yakwifuza gutoza. Yakomeje avuga ko agiye gufasha Bandari FC gutsindira ibikombe ndetse no gufasha mu kuzamura impano z’abana i Mombasa.

Mbere yo kwerekeza muri Bandari FC, Casa Mbungo byari byavuzwe ko  yifuzwa cyane na Gor Mahia. Casa asobanura ko byari byoroshye kwemera gutoza iyi kipe ko bamweretse umushinga wabo akabona bakorana. Ati: “Bandari FC yerekanye ko bankeneye cyane ni yo mpamvu byari byoroshye ko mbatekereza mbere ya Gor Mahia. Nari maze igihe kitari gito mvugana na Bandari FC.”

Casa Mbungo Andre iyi ni ikipe ya kabiri agiye gutoza muri Kenya  dore ko  kuva muri Gashyantare  kugeza mu Kuboza 2019 yatoje ikipe ya  AFC Leopards akaza kuyivamo kubera kudahabwa umushahara we.

Uyu mutoza ufite ubunararibonye yanatoje amakipe atandukanye mu Rwanda  arimo  AS Kigali, Police FC, Kiyovu, Rayon Sports, Gasogi United ndetse anatoza igihe gito ikipe y’igihugu “Amavubi”.

Ikipe ya Bandari FC yashinzwe mu 1985 ikaba ari iy’ Ikigo gishinzwe ibyambu bya Kenya (Kenya Ports Authority). Iyi kipe ibarizwa i Mombasa. Shampiyona ya 2018-2019 yasoreje ku mwaya wa 2 bituma  ihagararira Kenya mu mikino y’Afurika y’amakipe yitwaye neza iwayo “Total CAF Confederation Cup 2019-2020” gusa iviramo mu majonjora.

Mu mwaka w’imikino uheruka, Bandari FC yasoreje ku mwanya wa 9 naho muri uyu mwaka w’imikino wa 2020-2021 iri ku mwaya wa 6 n’manota 8 aho mu mikino 6 imaze gutsinda 2, inganya 2 itsindwa indi 2.  Mu mukino wa shampiyona uheruka yakinnye ku Cyumweru tariki 03 Mutarama 2021, Bandari FC yatsinze Western Stima ibitego 2-0

Subiza

Email Yawe Ntiribugaragazwe