U Rwanda mu bihugu bya mbere bitangiye umwaka bifungura Isoko rusange ry’Afurika

Umwaka mushya watangiye Guhera kuri uyu wa Gatanu tariki ya 1 Mutarama 2021, u Rwanda ruwutangiranye no gufungura Isoko Rusange ry’Afurika (African Continental Free Trade Area/AfCFTA) ritangiye nyuma y’imyaka ibiri ishize ibihugu by’Afurika bisinye amasezerano arishyiraho.

Ubuyobozi bw’Ikigo cy’Igihugu cy’Imisoro n’Amahoro (RRA) bwatangaje ko bwiteguye gufasha abacuruzi batangirana n’iryo soko rigiye koroshya ubuhahirane n’urujya n’uruza rw’ubucuruzi ku Mugabane w’Afurika.

Uyu munsi, u Rwanda,  Djibouti, Ethiopia, Kenya, na Uganda ni byo bitangira gushyira mu bikorwa bimwe mu bikubiye mu masezerano  yasinywe tariki ya 21 Werurwe 2018,  birimo gukuraho imbogamizi mu bucuruzi  nko kugabanya imisoro, koroherezwa muri serivisi za gasutamo n’ibindi.

Biteganyikwe ko ibindi bihugu bizagenda byiyungaho uko bigenda bihuza poritiki z’ubukungu byazo n’ikoranabuhanga rizifashishwa guhuza iryo soko ry’Afurika, cyane ko ibihugu 54 kuri 55 byamaze gushyira umukono kuri ayo masezerano, aho 36 mu byayasinye byamaze no kuyemeza.

Mu nama y’ubucuruzi yiga ku ishyirwa mu bikorwa ry’iryo soko rusange yabaye tariki ya 4 Ukuboza 2020, Perezida Kagame yabuze ko ayo masezerano y’amateka yabaye intangiriro yo kwandika igice gishya cy’amateka y’ukwihuza kw’Afurika.

Iryo soko rusange ryagombaga gutangira tariki ya 1 Kamena 2020, ariko iyo gahunda isubikwa kubera icyorezo cya COVID-19.

Iyo Gahunda ihuje isoko rifite agaciro ka tiriyari 3 z’amadolari y’Amerika ndetse ryitezweho kwinjiza miriyari zisaga 84 z’amadorari y’Amerika mu bucuruzi buorwa hagati y’ibihugu buri mwaka nk’uko bitangazwa n’Afriximbank.

Ubu bucuruzi bukorwa hagati y’Afurika bwitezweho kandi no kongera agaciro k’umusaruro w’ibikorerwa muri Afurika

Perezida Kagame n’abandi bayobozi baherutse guhurira mu nama yabaye hifashijwe ikoranabuhanga, basabye ibigo bitandukanye ndetse n’abashoramari gutanga ubufasha bw’ibitekerezo n’ubushobozi kugira ngo iryo rishyirwe mu bikorwa mu buryo buruseho.

Perezida Kagame yagize ati: “Icyo gikorwa gishingiye ku bufatanye kirakenewe ubu kurusha ikindi gihe cyose cyabayeho, kugira ngo twongere kubaka ubukungu no gushyigikira ubudahangarwa bw’Afurika ku bindi byago by’igihe kizaza. Reka rero tuyishyiremo imbaraga… Dukeneye ko urwego rw’abikorera rubigiramo uruhare rwuzuye. Bivuze mwe mwese turi kumwe uyu munsi. Tugomba gukorana bya hafi mu guharanaira gushyiraho imikoranire myiza yoroshya uru rugendo.”

Magingo aya ibihugu byose byasinye amasezerano bizasabwa guhuza ibiciro kuri za gasutamo mu miryango y’ubukungu ya buri Karere k’Afurika.

Imibare itangazwa na Komisiyo y’Ubukungu ya Loni ishizwe Afurika (ECA) yerekana ko Afurika y’Iburasirazuba izunguka miliyari 1.8 z’amadolari y’Amerika mu gutangiza AfCFTA, ndetse ishyirwa mu bikorwa ry’Iryo Soko Rusange bizasiga hahanzwe imirimo mishya isaga miriyoni 2 muri ako karere.

Eritrea yonyine ni yo itarashyira umukono kuri ayo masezerano y’ubucuruzi ya mbere ahuriweho n’ibihugu byinshi ku Isi.

Subiza

Email Yawe Ntiribugaragazwe