Menya ibintu bikunda kuvugwa ku babyeyi batwite, ariko kenshi ugasanga bimwe ari ibinyoma cyangwa ari ibyo abantu bitekerereza ubwabo

ibintu bikunda kuvugwa ku babyeyi batwite, ariko kenshi ugasanga bimwe ari ibinyoma cyangwa ari ibyo abantu bitekerereza ubwabo. Kuba ingobyi umwana yicayemo iri mu nda yo hasi mu gihe umubyeyi amutwite, ntibisobanura ko ari umuhungu cyangwa umukobwa. Mu gihe kandi ku nda y’umubyeyi utwite hagaragaraho imitsi, si igisobanuro ko uwo mwana ari umukobwa cyangwa umuhungu.

Gusa ariko mu myaka yashize, inyigo nyinshi zagiye zikorwa, zagaragaje ko bimwe mu bitekerezo byerekeye gutwita no kubyara, abantu bajya bafata nk’ibinyoma ariko bishobora kuba bifite ishingiro.

Imwe mu myumvire abakuze baba bafite kandi ishobora guhura n’ukuri:

Kubyara biruhanije kandi bifashe igihe kirekire, bisobanura ko umubyeyi ari bwibaruke umuhungu

Abashakashatsi ntabwo bizera neza ko ibi ari byo, ariko birashoboka. Mu mwaka wa 2003, itsinda ry’abaganga bakoreye igenzura ku babyeyi babyaye hagati y’umwaka wa 1997 na 2000, mu bitaro byo mu gihugu cya Ireland.

Ababyeyi bakoreweho igenzura barenga 800, hakuwemo ababyaye igihe kitageze n’ababyaye bafashijwe. Mu kugereranya imibare yavanwe muri iri genzura, basanze ikinyuranyo ari gito hagati y’abana b’abahungu n’ab’abakobwa bavutse.

Ikigereranyo cy’imibare, kigaragaza ko kubyaza ababyeyi bibarutse abahungu byafashe amasaha ari hejuru y’atandatu, hanyuma kubyaza abibarutse abakobwa, bigafata ari hasi y’atandatu.

Ababyeyi bibarutse abahungu kandi, bagiye bahura n’imbogamizi mu gihe cyo kubyara, ndetse hari bamwe muri bo babyajwe hakoreshejwe uburyo bwa C-section umubyeyi abazwe. Abibarutse abahungu bakoresheje ubu buryo bwa C-section bangana na 8%, ugereranyije na 6% bibarutse abakobwa.

Abana b’abahungu babyawe habayeho ubufasha bangana na 29% naho abakobwa bavutse muri ubu buryo bangana na 24%. Muri iyi nyigo kandi, byagaragaye ko abana b’abahungu bavuka barusha amagarama 99 abana b’abakobwa. Inyigo nto yakozwe mu mwaka wa 2003, yo yagaragaje ko ababyeyi batwite abahungu, barya ibiribwa byiganjemo ibitera imbaraga (calories) byinshi mu gihe batwite.

Kugira ngo ubyare umukobwa, irinde imineke

Ubushakashatsi bugaragaza ko atari ihame, ko ababyeyi batwite abahungu barya ibiribwa byinshi mu gihe baba batwite. Mu mwaka wa 2008, inyigo yasohotse mu kinyamakuru ‘Proceedings of the Royal Society Basked’, yakorewe ku babyeyi barenga 740, bari batwise ku nshuro ya mbere, kugira ngo igaragaze ubwoko bw’indyo bafataga mu mwaka umwe mbere yo gutwita. Nyuma yaho, babagabanijemo amatsinda atatu hakurikijwe ubwoko bw’ibitera imbaraga bariye.

Ababyeyi bangana na 1/3 ku bakoreweho ubushakashatsi bari barariye calories nyinshi, babyaye abahungu ku kigereranyo cya 56% ugereranije n’abariye calorie nke, kuko bo bibarutse abakobwa ku kigereranyo cya 55%.

Amakuru y’uko iyo ababyeyi bariye imineke kenshi mbere yo gusama inda, bizamura amahirwe yo kubyara abahungu, hari bamwe mu baganga batayavugaho rumwe.

Inyigo yakozwe igaragaza ko kurya ibiribwa bikungahaye kuri calorie, atari byo byonyine byatuma umubyeyi yibaruka umuhungu. Iyi nyigo, nkuko The Guardian ibivuga, igaragaza ko kurya ibiribwa bikungahaye ku myunyungugu yiganjemo potassium, iboneka no mu mineke, cyo kimwe n’imyunyungugu ya calcium na sodium, bishobora gufasha umubyeyi kwibaruka umuhungu.

Kuri iyi ngingo, The Guardian ivuga ko kurobanura ibiribwa mu rwego rwo kubyara igitsina runaka, bishobora guteza ingaruka ku mubiri w’umuntu, bitewe no kurya ibiribwa bimwe akirengagiza ibindi.

Aha ngaha, abahanga batanga inama yo kurya ibiribwa by’ubwoko bwose, kugira ngo byunganirane bitewe n’uko bigira umumaro utandukanye mu gutunga umubiri, na ho ibyo kubyara abahungu cyangwa abakobwa bakabireka bikaba ari amahirwe.

Kugira ikirungurira mu gihe umubyeyi atwite, ni ikimenyetso cy’uko azibaruka umwana ufite ubwoya bwinshi ku mubiri

Iyi ngingo abashakashatsi bayivugaho byinshi kandi bitandukanye. Rimwe na rimwe mu mezi atandatu ya mbere y’umubyeyi utwite, ku ruhu rw’umwana hameraho ubwoya, maze urwo ruhu rukitwa ‘lanugo.’

Mu mezi ya nyuma ashyira kwibaruka, ako gahu korohereye karacagagurika kagatunga abana. Nubwo abana bose baba bafite aka gahu kitwa lanugo, si ko bose bavukana umusatsi.

Kenshi rero, ababyeyi iyo bakimara kwibaruka, bihutira kureba ku mutwe w’uruhinja, ngo bamenye niba abana babo bazagira uruhara cyangwa umusatsi, bakabishingira ku buryo bagiraga ikirungurira mu gihe bari batwite.

Mu mwaka wa 2006, inyigo yasohotse mu kinyamakuru Birth, ikozwe n’itsinda ry’abashakashatsi bo muri Kaminuza ya Johns Hopkins yo muri Maryland, muri Leta Zunze Ubumwe za Amerika, yakurikiranye ababyeyi 64 mu gihe cyabo cyo gutwita, maze 28 muri bo, bavuga ko bagize ikirungurira.

Muri iri tsinda, ababyeyi 23 babyaye abana bafite ubwoya ku kigereranyo cyo hejuru. Ku rundi ruhande, ku babyeyi 12 batangaje ko batigeze bagira ikirungurira, 10 muri bo babyaye abana bafite ubwoya buke ku mubiri.

Subiza

Email Yawe Ntiribugaragazwe