Perezida Kagame yitabiriye Inama ku mubano hagati y’Afurika n’u Burayi

Perezida wa Repubulika y’u Rwanda Paul Kagame yatangaje ko yitabiriye Inama ya Gatanu ku mubano hagati y’Afurika n’u Burayi yagarutse cyane ku gushimangira ubufatanye hagati y’Afurika n’u Burayi.

Iyo nama yitabiriwe n’abandi Bakuru b’Ibihugu na za Guverinoma ku gicamunsi cyo kuri uyu wa Gatatu, yibanze ku buryo ubufatanye bw’Afurika n’u Burayi ari ingenzi cyane cyane muri ibi bihe Isi igowe no guhangana n’icyorezo cya COVID-19 ndetse n’ingaruka zacyo.

Muri iyo nama hagaragajwe uburyo mu myaka itari mike ishize Umuryango w’Ubumwe bw’u Burayi (EU) wafatanyije n’Umuryango w’Ubumwe bw’Afurika (AU) muri gahunda zigamije iterambere rirambye zirimo kurengera ibidukikije  no kwimakaza ikoranabuhanga mu nzego zitandukanye, byose bigamije guharanira inyungu z’abaturage bo ku migabane yombi.

Abayobozi basanze ko icyorezo cya COVID-19 cyarushijeho kugaragaza ko ubwo bufatanye bukenewe cyane kurusha mbere mu rwego rwo guharanira gukoresha ubushobozi buhari mu kwikura mu ngorane ihanganye na zo muri ibi bihe bitoroshye.

Muri iyo nama kandi hanagarutswe ku buryo hakenewe ishoramari rihambaye na gahunda zitandukanye zigamije kuzahura ubukungu, mu gusubiza ubuzima n’ubukungu bw’Isi ku murongo, by’umwihariko kuri Afurika n’u Burayi.

Abayobozi bashimangiye ko iki atari igihe cyo kuzahura ubukungu bw’imigabane yombi  gusa ahubwo ari n’igihe cyo kubuhindura mu buryo burushijeho kuba bwiza.

Perezida Kagame yagaragaje ko yishimiye kwitabira iyo nama yateguwe ku bufatanye bwa EU, AU, Umushoramari Mo Ibrahim n’undi witwa Etienne Davignon wigeze kuyobora Komisiyo ya EU.

Perezida Kagame yagize ati: “Yari amahirwe meza cyane y’ibiganiro byuje ukuri kandi bitanga umusaruro ku rugendo rw’ubufatanye bugikomeje bw’imigabane yacu yombi.”

Charles Michel, Umuyobozi w’Inama y’Umuryango w’Ubumwe bw’u Burayi, yavuze ko Afurika n’u Burayi bikeneye kugirana amasezerano ateguye neza azakomeza gufasha iyo migabane gukorana mu buryo buhoraho.

Ati: “Ishoramari, ibikorwa remezo n’imiyoborere ni zo nkingi za mwamba z’ubufatanye bw’inzego za Leta n’iz’abikorera hagati y’Afurika n’u Burayi. Twese dufatanyije, dufite ibikoresho, ingufu n’ubukesha byo kurema ahazaza duhuriyeho.”

Umunyamabanga Mukuru wungirije w’Umuryango w’Abibumbye Amina J. Mohammed, yavuze ko afitiye ikizere umusaruro mwiza w’ubufatanye bw’Afurika n’u Burayi, ati: “Nizera ko Afurika n’u Burayi bikomeje gukorana bya hafi byayobora Isi… Ubufatanye ni ingenzi cyane ku kugera kuri Afurika twifuza.”

Subiza

Email Yawe Ntiribugaragazwe