CNLG yamaganye Inkuru yanditswe n’aba banyamakuru bo muri Canada ivuga kuruhare rw’ingabo zari iza FPR Inkotanyi mu byaha by’intambara

Komisiyo y’Igihugu yo kurwanya Jenoside (CNLG) yamaganye inkuru yanyujijwe mu kinyamakuru Mail & Guardian, yanditswe n’abanyamakuru Judi Rever na Benedict Moran basanzwe bazwiho guhakana no gupfobya Jenoside yakorewe Abatutsi mu 1994.

Inkuru yanditswe n’aba banyamakuru bakomoka muri Canada, Judi Rever na Benedict Moran ishingiye ku buhamya abanditsi bavuga ko ngo ari ubw’ibanga bugaragaza uruhare rw’ingabo zari iza FPR Inkotanyi mu byaha by’intambara.

Usibye kuba iyi nkuru ishingiye ku buhamya bw’abasize bakoze Jenoside yakorewe Abatutsi, aba banyamakuru ubusanzwe bahakana bakanapfobya Jenoside yakorewe Abatutsi.

Mu itangazo rya CNLG ryashyizweho umukono n’Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, yamaganye inkuru zatangajwe, agaragaza ko zishingiye ku nkuru zipfundikanyijemo ibinyoma.

Rigira riti “Inkuru za Judi Rever na Benedict Moran zatangajwe muri The Continent yo ku wa 28 Ugushyingo 2020 no muri Mail & Guardian yo ku wa 30 Ugushyingo 2020, ni ibinyoma bishaje kandi bidafite ishingiro.’’

CNLG ivuga ko iyi nkuru yubakiye ku buhamya bw’abantu bamwe biganjemo abahoze mu ngabo zatsinzwe nyuma yo kugira uruhare muri Jenoside yakorewe Abatutsi.

Ikomeza iti “Izi nkuru z’inkorano zakunze kwifashishwa n’abashaka kugaragaza ko Jenoside itabaye ndetse ko yakozwe n’Abatutsi na FPR. Abahanga mu by’amategeko, abarimu muri za kaminuza n’abasesenguzi bubashywe ku rwego mpuzamahanga bakunze kugaragaza ko ibyo birego nta shingiro bifite.’’

CNLG ivuga ko ibyakozwe na Judi Rever na Moran ari ibintu basanzwe bakora, bifashishijwe abatangabuhamya batagaragazwa amazina, nyamara bavuga ibitarabayeho.

Bizimana yagize ati “Inyandiko za Judi Rever bigize ubuhakanyi bukomeye no gupfobya Jenoside. Izi nkuru zatangajwe muri Mail & Guardian zongeye gutoneka ibikomere zitwaje ngo ibimenyetso bitahawe agaciro. Bahaye urubuga abashaka kugoreka amateka ya Jenoside yakorewe Abatutsi, bagamije gusubiza inyuma ubumwe n’ubwiyunge n’iterambere abanyarwanda bagezeho bubaka igihugu kibereye bose.

CNLG igaragaza ko Judi Rever asanzwe azwiho guhanagura ibyaha ku bagize uruhare muri Jenoside yakorewe Abatutsi, akabyegeka ku ngabo za RPA zayihagaritse. Iyi myitwarire ye yigeze kwamaganwa n’abandi bashakashatsi mpuzamahanga bagera kuri 60, bavuga ko bifite ikindi kibyihishe inyuma.

Judi Rever yamenyekanye cyane kubera ibitekerezo n’inyandiko ze zisebya ubuyobozi bw’u Rwanda ndetse agahakana na Jenoside yakorewe Abatutsi, yahitanye ubuzima bw’inzirakarengane zisaga miliyoni imwe mu mezi atatu gusa.

Igitabo cyanditswe n’uyu mugore ukomoka muri Canada, ‘In Praise of blood, the crimes of the Rwandan Patriotic Front’, cyamaganiwe kure n’abahanga mu mateka ya Jenoside ndetse n’inzu isohora ibitabo yari yahawe akazi ko kugisemura mu Gifaransa yanga kubikora.

Igikorwa cyo guhindura mu zindi ndimi ‘In Praise of Blood’ cyamaganwe cyane n’imiryango iharanira inyungu z’abacitse ku icumu, ndetse muri Nzeri 2018 ‘Ibuka-Hollande’, nayo yamaganye Amsterdam University Press yashakaga kugihindura mu Giholandi.

Muri icyo gitabo yanditse muri Werurwe 2018 cyasohokeye mu nzu ya Penguin Random House, Judi Rever ashinja FPR kuba yarinjiye mu Nterahamwe ndetse ko yanagize uruhare mu bikorwa byo kwica Abatutsi.

Avuga ko ashingira kuri raporo y’ibanga y’Urukiko Mpuzamahanga Mpanabyaha rwashyiriweho u Rwanda (TPIR) ariko itagaragara muri icyo gitabo, akagaruka ku ngingo ivuga ko ngo habayeho Jenoside ebyiri zirimo iyahitanye Abahutu basaga 500 000.

Anashinja ingabo zari iza FPR guhanura indege ya Habyarimana, ibintu impuguke zirimo izakozwe Raporo Mutsinzi zagaragaje neza ko ibisasu byarashe iyo ndege byaturutse i Kanombe ahagenzurwaga n’abasirikare ba Leta ya Habyarimana.

Benedict Moran we asanzwe atunganya filime ndetse akaba n’umunyamakuru ukorera mu Mujyi wa Montreal muri Canada

Judi Rever, bivugwa ko ari Inkoramutima Ya Kayumba Nyamwasa Yahagurukiye Guhakana No Gupfobya Jenoside Yakorewe Abatutsi

Asebya u Rwanda n’abayobozi barwo n’ahakana Jenoside yakorewe Abatutsi, Rudi Rever ayanyuza mu kinyamakuru”Marianne Rever” cy’aho muri Canada, kenshi ugasanga ari imvugo  isa neza neza n’iy’abicanyi, nka Théoneste BAGOSORA, Anatole NSENGIYUMVA, Ferdinand NAHIMANA, n’abandi  bahamwe n’uruhare rutaziguye muri Jenoside yakorewe Abatutsi.

Judi Rever,  ntanatinya gushyira  ku ngabo za FPR-Inkotanyi ubwicanyi bwabereye hirya no hino mu Rwanda mu gihe cya Jenoside.

Mu kwitiranya ibintu anashyiramo n’ubwicanyi bwabereye mu duce ingabo za FPR zitagenzuraga . Ibi abikora kandi atitaye ku buhamya bwatanzwe  mu nkiko zinyuranye, zirimo  n’Urukiko Mpuzamahanga Mpanabyaha rwashyiriweho uRwanda(ICTR), aho abantu batandukanye, barimo n’abashakashatsi mpuzamahanga, bagaragaje uruhare rudashidikanywaho  rw’Interahamwe, abajandarume n’ abasirikari ba Leta y’Abatabazi(FAR) mu gutsemba Abatutsi  hirya no hino mu Rwanda.

Urugero rugaragaza urwango rwa RUDI REVER, ni aho yanditse  ko ngo ubwicanyi bwakorewe Abatutsi bo mu Bisesero  bwakozwe n’ingabo za FPR-Inkotanyi , akirengagiza ko  ubwicanyi bukorwa,  Kibuye yose na yagenzurwaga n’ingabo za Leta. Ibi bigashimangirwa n’ubuhamya bw’abasirikari b’Abafaransa bari muri operation Turquoise,  banashinjwa kuba baratereranye abari bahungiye mu Bisesero, babwiye itsinda ry’abadepite b’Ubufaransa ko ingabo za FAR zari  mu BISESERO no mu bindi bice bya Kibuye  kugeza tariki 18 Nyakanga 1994.

Si ibi gusa kuko nko mu rubanza rwa Eriezel NIYITEGEKA rwabereye Arusha muri ICTR, abatangabuhamya barimo abarokotse ubwicanyi bwabereye mu Bisesero ndetse n’ababugizemo uruhare, basobanuye neza uburyo ku matariki ya 13 na 14/05/1994, uyu Eriezel Niyitegeka  yayoboye Interahamwe na EX-FAR basaga 6000 mu bitero byishe ibihumbi n’ibihumbi  by’Abatutsi bari bahungiye mu misozi ya Bisesero. Abatutsi bari basigaye bakomeje kwirwanaho, maze tariki 18/06/1994, Edouard Karemera Alias Rukusanya, wari Minitsri w’ubutegetsi bw’Igihugu, ategeka ko mu Bisesero hakorwa”isuku”, nabwo hapfa abatabarika.

Imiryango  iharanira inyungu z’Abarokotse Jenoside yakorewe Abatutsi, nka SURVIE, igaragaza ko mu binyoma bye,  JUDI REVER yifashisha James MUNYANDINDA. muw’2017  yatanze ubuhamya yemeza ko indege ya Perezida Yuvenali HABYARIMANA  yahanuwe na FPR-Inkotanyi. Aya magambo yaje guteshwa agaciro .

Icyo abazi neza amateka y’uRwanda bakomeza kwibaza kuri  JUDI REVER , ni ukumenya  niba  abiterwa  gusa n’urwango afitiye FPR-Inkotanyi n’abarokotse Jenoside yakorewe Abatutsi.

Amakuru ava muri RNC na FDLR, avuga ko  Ahobora kuba  afitanye ubucuti bwihariye na Kayumba Nyamwasa n’abandi .

Amakuru yizewe kandi, avuga ko uyu  Judi REVER afitanye isano ya hafi n’umugore witwa Nicole BERJOVIN waburaniye Paulina Nyiramasuhuko.

Mu miburanire ye itaragenderaga ku itegeko na rimwe, yirirwaga atuka FPR kugeza ubwo abacamanza bari bayobowe n’Umunyatanzaniya William SEKULE bamwibukirije ko FPR atariyo iregwa muri urwo rubanza. Iyo yaburaga ingingo  ishinjura”umukiliya” we, yahitaga  asuka amarira(y’ingona), amayeri yo kuyobya abacamanza ngo batwarwe n’amarangamutima.Ntibyamuhiriye ariko kuko urubanza rwa Nyiramasuhuko rwari urucabana, biza kurangira akaniwe urumukwiye.

Twababwira kandi ko Iki kinyamakuru  MARIANNE REVER  cyakomeje gutambutsa inyandiko z’abahakana bakanapfobya Jenoside yakorewe Abatutsi, nk’Umubiligi  Philip REYNTJENS, Umufaransa André GUICHAOUA, Umunyakameruni Charles ONANA , n’abandi  nka Pierre PEAN batahwemye guhakana no gupfobya Jenoside yakorewe Abatutsi, no gushyigikira ku mugaragaro Interahamwe n’ibindi bisa  nazo

.

Subiza

Email Yawe Ntiribugaragazwe