Guverinoma y’u Rwanda yasinyanye amasezerano y’inguzanyo ya miriyari zisaga 64

Guverinoma y’u Rwanda yasinyanye amasezerano y’inguzanyo ya miriyari zisaga 64 z’amafaranga y’u Rwanda (miriyoni 66.2 z’amadorari y’Amerika) yo gukomeza umushinga wo gukwirakwiza amashanyarazi mu gihugu.

Minisiteri y’Imari n’Igenamigambi (MINECOFIN) yatangaje ko ayo masezerano y’inguzanyo yasinywe binyuze mu Kigega cya Korea gishinzwe iterambere ry’ubukungu.

Iyo nguzanyo ni iy’igihe kirekire ikazishyurwa mu gihe k’imyaka 40 harimo igihe  k’imyaka 15 gisoneye, na ho indi myaka ikazaba yishyurwa ku nyungu ya 0.01% ku mwaka.

Umushinga wo gukwiza amashanyarazi mu Gihugu nurangira uzagira uruhare mu gushyigikira gahunda yo kwagura umuyoboro w’amashanyarazi no gutanga amashanyarazi ahagije.

Nyuma yo gusinya amasezereno, Minisitiri w’Imari n’Igenamigambi Dr. Ndagijimana Uzziel, yavuze ko iyo nguzanyo izafasha kugera ku ntego za Gahunda ya Guvernoma y’imyaka 7 yo kwihutisha iterambere zo kuba umuriro w’amashanyarazi wageze ku baturage ku kigero cya 100%.

Yagize ati: “Turashimira Leta ya Repubulika ya Korea ku buryo ikomeje kudushyigikira no gukorana na twe neza mu nzego nyinshi z’iterambere ry’ubukungu bwacu, by’umwihariko mu buhinzi, uburezi, ikoranabuhanga amazi n’isukura.”

Ambasaderi wa Korera y’Epfo mu Rwanda Jin-weon CHAE, na we yashimangiye ko Repubulika ya Korea izakomeza gusigasira umubano mwiza ifitanye na Leta y’u Rwanda.

Yagize ati: “Repubulika ya Korea izakomeza umubano wa bugufi n’u Rwanda mu rurugendo rw’iterambere rirambye. Nizera ko uyu mushinga uzatanga ibikorwa by’amashanyarazi birambye, kandi ni ingenzi mu iterambere no mu guhindura imibereho y’Abanyarwanda.”

Umushinga uzashyigikirwa no kwagura imiyoboro ihuza ihuza ibiturage na Sitasiyo ya Gasogi, Mamba, Nyabihu Rwabusoro n’iya Nyabarongo.

Iyo gahunda ije yunganira indi mishinga itandukanye igamije gushyigikira urwego rw’ingufu mu Rwanda. Mu bandi baterankunga mu rwego rw’ingufu harimo Banki y’Isi, Banki Nyafurika Itsura Amajyambere, Banki y’Ishoramari y’Iburayi, Ikigo k’Iterambere mu Bufaransa (AFD), Ikigega k’Iterambere cya Saudi n’Ikigega Mpuzamahanga cya OPEC (OFID).

U Rwanda rufite intego y’uko muri 2024 ingo zose zizaba zifite amashanyarazi, mu gihe ubu bigeze kuri 56%.

Subiza

Email Yawe Ntiribugaragazwe