Bica intege kubona imigenzo mibi n’imico idahwitse- Jeannette – Kagame

Madamu wa Perezida wa Repubulika y’u Rwanda Jeannette Kagame yagaragaje ko bidakwiye kwirengagiza icyuho kikigaragara mu buringanire n’ubwuzuzanye hagati y’abagore n’abagabo ku mugabane w’Afurika bigisubiza inyuma ibitekerezo by’urubyiruko rw’abagore n’abakobwa bakiri bato bigatuma batagira uruhare rukwiye muri poritiki, mu rwego rw’ubuzima, mu mibereho myiza ndetse no mu bukungu.

Madamu Jeannette Kagame yabigarutseho mu ijambo nyamukuru yagejeje ku bitabiriye ihuriro mpuzamahanga ry’ibiganiro mpaka byahuje ibyiciro by’imyaka itandukanye byibanze ku ngamba zo guha abagore bakiri bato ijambo mu nzego zitandukanye (Intergenerational Dialogue on Beijing+25 Young Women Manifesto).

Iyo nama yo ku rwego rwo hejuru yakozwe hifashishijwe ikoranabuhanga nyuma y’imyaka 25 ishize hatangajwe amasezerano ya Beinjing agamije kurandura burundu ihohoterwa rikorerwa abagore, ikaba yateguwe na Komisiyo y’Umuryango w’Ubumwe bw’Afurika mu rwego rwo kwizihiza Umunsi Mpuzamahanga wo kurandura burundu ihohoterwa rikorerwa umugore.

Madamu Jeannette Kagame yashimangiye ko ku Mugabane w’Afurika hakiri impungenge z’uko kuba abagore  n’abana b’abakobwa badahabwa agaciro gakwiriye biri mu bikongeza ubukene, ubusumbane ku mahirwe mu by’ubukungu, ugasanga ahenshi batanashyirwa mu nzego zifata ibyemezo.

Yagize ati: “Bica intege kubona imigenzo mibi n’imico idahwitse n’amahame y’umuryango ataboneye, hari aho bikiganje kugeza uyu munsi mu bihugu bimwe na bimwe. Dukeneye ibitekerezo bishya biturutse mu rubyiruko rwacu bikuraho iyo myumvire n’amahame bidakwiye, kandi tugomba guhangana no kuba uburinganire butaragerwaho mu buryo bukwiye.”

Madamu Jeannette Kagame yagarutse ku rwego rushimishije u Rwanda rwagezeho mu guharanira kurandura iyo myumvire itsikamiraa abakobwa n’abagore muri rusange, aho kuri ubu bagira uruhare rukomeye mu kubaka Igihugu.

Yashimangiye ko mu myaka 25 ishize u Rwanda rwahisemo, rubishaka, kwimakaza uburinganire n’iterambere ry’abagore nka bumwe mu buryo bwo guharanira iterambere rirambye.

Ibyo ngo byashyigikiwe n’ubushake bwa Poritiki uhereye ku buyobozi bukuru bw’Igihugu, bituma uburinganire no gushyigikira umugore n’umukobwa biba imbaraga zifasha u Rwanda kugera ku kerekezo cya gahunda z’iterambere rirambye.

Yagize ati “Mu Rwanda, imwe mu ngamba z’ingenzi ziri muri gahunda y’Igihugu yo kwihutisha iterambere ni ijyanye no guteza imbere ubumenyi no guhanga imirimo. Aha Urwego rw’Igihugu rushinzwe iterambere (RDB) rufite inshingano zo gutanga ibikenewe byose mu rwego rwo kubaka ubushobozi bw’urubyiruko rwacu kugira ngo rugire ubumenyi bukenewe mu nzego za Leta n’iz’abikorera, bityo bigakemura ikibazo cy’ubushomeri mu rubyiruko.”

Madamu Jeannette Kagame yanagarutse ku ngamba zitandukanye zigamije guteza imbere urubyiruko, by’umwihariko urw’abakobwa. Ati: “Ubu hafi 45% by’abakozi ba Leta bari munsi y’imyaka 35 mu gihe kandi 79% bari munsi y’imyaka 45. Akarusho kandi ni uko mu bakozi ba Leta bari munsi y’imyaka 30, abagera kuri 38% ari abagore.”

Madamu Jeannette Kagame agaragaza ko bitumvikana uburyo kugeza ubu ku Isi abagabo bihariye imyanya igera ¾ mu nteko zishinga amategeko ndetse abagore bari hagati y’imyaka 24 na 35 bakaba barusha bagenzi babo b’abagabo ibyago byo kuba mu bukene bukabije ku gipimo cya 25%.

Yashimangiye ko Leta ari zo zifite inshingano zo gushyira poritiki, amategeko n’ubundi buryo bwatuma umugore yigobotora ibyo byose, anahamagarira urubyiruko kugira uruhare mu mpinduka rwifuza.

Ati “Mwebwe bayobozi b’ejo hazaza turabizi neza ko dukeneye amajwi yanyu, ubumenyi bwanyu n’ibitekerezo bishya mufite. Turabakeneye ngo mushyigikire gahunda zo gukumira ibibazo no gushaka ibisubizo, guhanga ikoranabuhanga rigezweho, no gukomeza gushyigikira ibiganiro bishya byigisha guhindura imyumvire, kumenyekanisha no gusangira amakuru afasha kurengera ubuzima arimo amategeko n’uburenganzira. Muri nk’urutirigongo rw’umugabane wacu, natwe turahari ngo tuzibe icyuho kandi ibyifuzo byanyu bigomba kuba amategeko kuri twe.”

Ibiganiro byabereye muri iyi nama byibanze cyane cyane ku nzitizi urubyiruko rw’abakobwa ku mugabane w’Afurika bagihura na zo usanga ahanini zishingiye ku muco, ubusumbane, ihohoterwa n’izindi.

Intumwa idasanzwe ya AU ishinzwe urubyiruko AYA Chabbi, yagaragaje ko urubyiruko rw’Afurika rwifuza ko gusiga umugore inyuma mu iterambere byahinduka.

Yagize ati “Urubyiruko rw’abagore barashaka uburinganire n’imirimo, kwishyurwa akazi bakora, kwishyurwa mu gihe bari mu kiruhuko cyo kubyara kandi byose bigakorwa nta vangura. Hari kandi kurandura burundu ihohoterwa n’ivangura rishingiye ku gitsina aho riva rikagera, by’umwihariko ku bagore bo mu cyaro, abafite ubumuga, abimukira n’impunzi n’abandi bose bari mu kaga.”

Yakomeje ashimangira ko bigoye ko Afurika yagera ku iterambere rirambye abagore batabigizemo uruhare. By’umwihariko yashimangiye ko bidashoboka guhosha intambara n’amakimbirane muri Afurika abagore batabigizemo uruhare.

Subiza

Email Yawe Ntiribugaragazwe