COVID-19: Rubavu yakomorewe, Rusizi iguma mu kato

Kuri uyu wa Kabiri tariki ya 30 Kamena 2020, Perezida wa Repubulika y’u Rwanda yayoboye Inama y’Abaminisitiri idasanzwe yemeje yemeje imyanzuroo y’Inama y’Abaminisitiri yateranye ku wa 16/06/2020, inasuzuma ingamba zafashwe zo gukumira ikwirakwizwa ry’icyorezo cya COVID-19, ndets einemeza ingamba zihita zikurikizwa.

Muri zo harimo kuba ingendo zijya n’iziva mu Karere ka Rubavu zasubukuwe, ariko uduce two mu Karere ka Rusizi n’Umujyi wa Kigali twashyizwe muri Gahunda ya Guma Mu Rugo (lock down) tuzakomeza kuyigumamo.

Ingendo mu Karere ka Rusizi zirabujijwe uretse iz’amakamyo atwaye ibicuruzwa.

Mu Gihugu hose ingendo zirabujijwe guhera saa tatu z’ijoro (9:00pm) kugeza saa kumi n’imwe za mugitondo (5:00am).

Abacuruzi bose barakangurirwa kwemera kwishyurwa hifashishijwe ikoranabuhanga nka bumwe mu buryo bwo kwishyurana.

Serivisi zose zemerewe gukora zizakomeza kubahiriza amabwiriza amabwiriza atangwa n’inzego z’ubuzima (gukarama intoki, kwambara udupfukamunwa, gusiga intera hagati y’umuntu n’undi).

Udupfukamunwa tuzakomeza kwambarwa neza, igihe cyose umuntu agiye aho ahurira n’abandi.

Gahunda yo gupima abantu COVID-19 izakomeza mu Gihugu hose.

Serivisi zemerewe gukora

Ibikorwa by’inzego za Leta n’iby’abikorera bizakomeza ariko buri rwego rugakoresha abakozi b’ingenzi, abandi bagakomeza gukorera mu rugo.

Ubukerarugendo bwo mu gihugu n’ubukerarugendo mpuzamahanga ku bashyitsi baje mu ndege zihariye (charter flights), baba abantu ku giti cyabo cyangwa abaje mu matsinda buzakomeza. Amabwiriza y’Urwego rushinzwe Iterambere mu Rwanda (RDB) asobanura mu buryo burambuye ishyirwa mu bikorwa ry’iyi ngingo.

Hoteli zizakomeza gukora, ndetse zemerewe kwakira inama hubahirizwa amabwiriza yo kwirinda COVID-19. Hoteli zirashishikarizwa kandi kugira uruhare mu bukerarugendo bw’imbere mu Gihugu.

Ibikorwa bya siporo y’umuntu umwe cyangwa izindi zikorwa abantu bategeranye (non-contact sports) bizakomeza. Icyakora siporo ikorerwa mu nzu z’imyidagaduro (gyms) na siporo mu matsinda zirabujijwe.

Moto zemerewe gutwara abagenzi uretse mu Karere ka Rusizi no mu Midugudu yo Mu Mujyi wa Kigali iri muri Gahunda ya Guma Mu Rugo. Abatwara moto barasabwa kubahiriza amabwiriza y’isuku no kwambara udupfukamunwa igihe cyose

Imihango yo gushyingirwa mu nsengero iremewe ariko ikitabirwa n’abantu batarenze 30. AMabwiriza ya Minisiteri y’Ubutegetsi bw’Igihugu (MINALOC) asobanura mu buryo burambuye ishyirwa mu bikorwa ry’iyi ngingo.

Ishyingirwa rikorewe imbere y’ubuyobozi rizakomeza, ariko rigomba kwitabirwa n’abantu batarenze 15.

Imihango y’idini yo guherekeza/gusezera uwapfuye mu nsengero izakomeza ariko ikitabirwa n’abantu batarenze 30. Imihango yo gushyingura na yo ntigomba kurenza abantu 30.

Serivisi zizakomeza gufunga

Imipaka izakomeza gufungwa, kereka ubwikorezi bw’ibicuruzwa (cargo trucks). Abanyarwanda n’abandi bantu basanzwe batuye mu Rwanda bemerewe gutaha, ariko bagahita bashyirwa mu kato (isolation) nk’uko amabwiriza y’ubuzima abiteganya. Abari mu kato biyishyurira ikiguzi cya serivisi zose bahabwa.

Amashuri azakomeza gufunga kugeza muri Nzeri 2020.

Insengero zizakomeza gufunga mu gihe hagikorwa igenzura ko zubahirije ingamba zo gukumira no kwirinda COVID-19.

Amateraniro rusange cyangwa mu ngo arabujijwe.

Utubari n’ibikorwa by’imikino y’amahirwe bizakomeza gufunga.

Mu bindi…

Inama y’Abaminisitiri yemeje ibi bikurikira

Imbonerahamwe zivuguruye z’imyanya y’imirimo y’inzego n’ibigo bya Leta hagamijwe kongera ubushobozi, gukoresha neza umutungo wa Leta no kunoza imikorere n’imitangire ya serivisi.

Itea rya Perezida ryemeza burundu amasezerano y’ikicaro hagati ya Guverinoma ya Repubulika y’u rwanda n’Ihuriro Nyafurika rishinzwe iterambere ry’ubuhinzi yahsyizweho umukono ku wa 30 Kamena 2019.

Bwana Nguyen Nam Tien yemerewe guhagararira Repubulika y’Abasosiyalisiti ya Vietnam mu Rwanda ku rwego rw’Ambasaderi ufite ikicaro i Dar es Salaam muri Tanzania.

Bwana Martin Craft yemerewe kuba Umuyobozi mushya w’Ikigo cy’Abadage gishinzwe Ubutwererane mu Iterambere (GIZ) muri Repubulika y’u Rwanda.

Inama y’Abminisitiri yagejejweho imyiteguro yo kwizihiza ku nshuro ya 26 isabukuru yo kwibohora iteganyijwe ku itariki ya 4 Nyakanga 2020. Insanganyamatsiko ni “Kwibohora Twubaka u Rwanda Twifuza“. Kwizihiza ueo munsi ku rwego rw’Igihugu bizabera mu Karere a Nyagatare.




MUHABURA.RW Amakuru Nyayo

Subiza

Email Yawe Ntiribugaragazwe