Abazajya bashyirwa mu kato bavuye hanze kugeza ubu bazajya biyishyurira ikiguzi

Kuri uyu wa Mbere tariki 18 Gicurasi 2020, Inama y’Abaminisitiri idasanzwe yateranye hifashishijwe ikoranabuhanga iyobowe na Perezida wa Repubulika y’u Rwanda Paul Kagame, isuzuma ingamba zafashwe zo gukumira ikwirakwira ry’icyorezo cya COVID-19 zimwe ziravugururwa, ndetse n’izindi zikaba zizongera kuvugururwa nyuma y’iminsi 15.

Ingendo zongerewe igihe k’isaha zikajya zihagarikwa guhera saa tatu z’ijoro kugeza saa kumi n’imwe za mugitondo, na ho ingendo hagati y’Intara n’Umujyi wa Kigali zikazemererwa tariki ya 1 Kamena 2020.

Ikindi kidasanzwe ni uko abazajya bashyirwa mu kato bavuye hanze kugeza ubu bazajya biyishyurira ikiguzi cya serivisi zose bahabwa. Abanyarwanda n’abandi basanzwe batuye mu Rwanda bazakomeza gutaha ariko bahite bashyirwa mu kato k’iminsi 14

Imipaka izakomeza gufungwa kereka ubwikorezi bw’ibicuruzwa.

Gahunda yo gupima abantu indwara ya COVID-19 izakomeza mu Gihugu hose.

Udupfukamunwa tuzakomeza kwambarwa igihe cyose umuntu agiye aho ahurira n’abandi.

Serivisi zemerewe gukora zigomba kubahiriza amabwiriza atangwa n’Inzego z’Ubuzima (gukaraba intoki, kwambara uduofukamunwa, gusiga intera hagati y’umuntu n’undi).

Abacuruzi bose barasabwa kwemera kwishyurwa hakoreshejwe ikoranabuhanga nka bumwe mu buryo bwemewe bwo kwishyurana.

Serivisi zemerewe gukomeza gukora

Ibikorwa by’inzego za leta n’iby’abikorera bizakomeza gukora, ariko buri rwego rugakoresha abakozi b’ingenzi, abandi bagakomeza gukorera mu rugo bifashishije ikoranabuhanga.

Ibikorwa bya Siporo y’umuntu umwe hanze biremewe ariko inyubako zikorerwamo imyidagaduro (gyms) zizakomeza gufungwa.

Ingendo zemewe gusa hagati mu Ntara gusa. Ingendo hagati y’intara zitandukanye cyangwa hagati y’Intara n’Umujyi wa Kigali zirabujijwe, ariko zizasubukurwa tariki ya 1 Kamena 2020.

Imihango yo gushyingura igomba kujyamo abantu batarenze 30.

Ishyingirwa imbere y’ubuyobozi riremewe, ariko rigomba kwitabirwa n’abantu batarenze 15. Iyindi mihango nko gusezerana mu nsengero cyangwa ibirori byo kwiyakira ntibyemewe.

Serivisi zizakomeza gufunga

Imipaka izakomeza gufungwa, kereka ubwikorezi bw’ibicuruzwa (cargo trucks). Abanyarwanda n’abandi bantu basanzwe batuye mu Rwanda bemerewe gutaha ariko bagahita bashyirwa mu kato (isolation) nk’uko amabwiriza y’ubuzima abiteganya. Abari mu kato baziyishyurira ikiguzi cya serivisi zose bazahabwa.

Amashuri azakomeza gufunga kugeza muri Nzeri 2020, insengero zizakomeza gufunga, utubari tuzakomeza gufunga.

Moto n’amagare ntibyemerewe gutwara abagenzi, ariko bishobora gukomeza kwifashishwa mu gutwara ibintu babigeza ku bandi. Bizongera kwifashishwa mu gutwara abagenzi guhera ku itariki ya 1 Kamena 2020.

Inama n’amateraniro rusange cyangwa mu ngo z’abantu birabujijwe.

Magingo aya, mu Rwanda harabarurwa abantu 297 banduye Coronavirus, muri bo 203 bamaze gukira. Gusa imibare ya Minisiteri y’Ubuzima igaragaza ko umubare w’abarwayi ukomeje kumanuka umunsi ku wundi ugereranyije n’uko byari bimeze mu mezi ashize.




Chief editor /MUHABURA.rw

Subiza

Email Yawe Ntiribugaragazwe