COVID-19: Perezida Magufuri na Nkurunziza babuze mu nama yahuzaga Abaperezida ba EAC

Abaperezida 4 bagize EAC kuri uyu wa Kabiri tariki ya 12 Gicurasi 2020, bahuriye mu nama yabaye mu buryo bw’ikoranabuhanga biga ku cyorezo cya COVID 19 n’ingamba zo kukirwanya. Perezida Pombe Magufuri wa Tanzaniya na Petero Nkurunziza w’uburundi uhangayikishijwe n’amatora mu gihugu cye nti bitabiriye iy’Inama , gusa Perezida Museveni we avuga ko gukoresha amatora muri k’igihe cya coronavirus yugarije Isi byaba ari ubusazi .

Iy’inama yitabiriwe na Paul Kagame , Perezida Kaguta Museveni, Perezida Kenyatta na Perezida Salva Kiir .

Perezida Kagame yagaragaje icyuho kikiri mu mikoranire y’ibihugu bigize Umuryango mu EAC mu kurwanya icyorezo cya COVID-19 .

Perezida w’ u Rwanda yagize ati: “Muri EAC, haracyakenewe uburyo bwo kurwanya icyorezo tukemera no gufata inshingano ziremereye muri ibi bihe. Ntidukwiye gukora uko dushoboye mu bihugu byacu gusa, ahubwo dukeneye no guhanahana amakuru, tukumvikana n’uburyo ubucuruzi bwakorwamo mu Karere.”

Perezida Museveni, Kenyatta na Kiir bashimiye Perezida wa Repubulika y’u Rwanda Paul Kagame ku buryo yateguye akanayobora neza inama yabaye mu mutuzo, basaba ko inama nk’izi zabaho kenshi.

Imyanzuro y’inama y’Abakuru b’Ibihugu

1 . Abakuru b’Ibihugu bagarutse ku miterere y’icyorezo cya COVID19 mu Karere bashimira abaminisitiri b’Ubuzima, ab’Ubucuruzi, Ubwikorezi ndetse n’ab’Ububanyi n’Amahanga, ku bwitange bashyize mu gushyiraho amabwiriza yo guhangana n’icyo cyorezo.

2 . Abakuru b’Ibihugu bashyikirijwe imyanzuro y’inama iherua gukorwa n’abo baminisitiri, bashimira ibihugu bigize EAC, Ishami ry’Umuryango w’Abibumbye ryita ku Buzima (WHO) na Africa CDC ku mbaraga bakomeje gushyira mu guhangana na COVID19, uruhare bifite mu ntambwe imaze guterwa mu kugihashya no kwirinda ikwirakwizwa ryacyo mu Karere k’Umuryango w’Afurika y’Iburasirazuba.

3 . Abakuru b’Ibihugu bemeranyijwe uburyo buhuriyeho bwo kwemeza no gusangira amakuru kuri COVID-19.

Banasubiyemo gahunda ihuriweho n’ibihugu bya EAC yo guhangana na COVID-19, basaba ba Minisitiri b’Ubuzima, ab’ubucuruzi, Ubwikorezi n’Ubutwererane guharanira ko iyo gahunda yuzuzanya na gahunda zashiriweho kurwanya icyorezo muri buri gihugu.

4 . Abakuru b’Ibihugu kandi bemeje ko gusangira amakuru muri bihe bigoye ari ingenzi, cyane cyane muri ibi bihe bya COVID-19, basaba abo baminisitiri gushyiraho uburyo bw’ikoranabuhanga bufasha gukurikirana abashoferi n’ababaherekeza bugahita bukoreshwa n’ibihugu bigize Umuryango.

Banagarutse ku mbaraga buri gihugu kigize Umuryango gikomeje gushyira mu guhangana n’imbogamizi zabonetse mu bucuruzi bwambuka imipaka n’uburyo Ubunyamabanga bwa EAC bwabyitwayemo bukurikirana imikorere y’imipaka ya buri gihugu.

5 . b’Ibihugu banagarutse ku nzego z’ubukungu z’ingenzi zakubiswe n’icyorezo zikaba zigenda biguru ntege, nk’ubuhinzi, ubucuruzi, inganda n’ibizikomokaho, ubukerarugendo n’amahoteri ndetse n’imyidagaduro. Basabye buri gihugu kigize Umuryango kwimakaza ibikorerwa mu Karere bikenewe cyane muri ibi bihe nk’ibikoresho by’ubuvuzi birimo udupfukamunwa, imiti yica udukoko mu ntoki, amasabune, ibikoresho birinda mu maso, imyambaro y’abaganga yabugenewe, ibyo kurya byongerewe agaciro n’imashini zitanga umwuka.

6 . Abakuru b’Ibihugu biyemeje gufasha abahinzi gukomeza ubuhinzi bwabo muri ibi bihe by’icyorezo na nyuma ya cyo, gushyigikira inganda zibyongerera agaciro nk’imwe mu ngamba zo kugabanya ibiribwa bitumizwa mu mahanga, baniyemeza gushyiraho ibigega byihariye bigoboka abacuruzi bato n’abaciriritse ngo bigobotore ingaruka za COVID-19.

7. Abakuru b’Ibihugu bashyizeho ba Minisitiri b’Ubuzima, Ubwikorezi n’abashinzwe Ubutwererane muri EAC guhagararira gahunda zose zo guhangana n’icyorezo barangajwe imbere na ba Minisitiri b’Ubuzima.

Abo baminisitiri basabwe guhita bashyiraho ingamba zo gupima no kwemerera abashoferi gukora ingendo mbere y’uko bahaguruka aho bavuye kandi bagapimwa buri byumweru bibiri. Imiterere y’uko byifashe ikajya imenyeshwa Abakuru b’Ibihugu.

8 . Abakuru b’Ibihugu bashimiye abafatanyabikorwa mu iterambere bakomeje gufasha ibihugu bigize EAC, by’umwihariko muri ibi bihe by’icyorezo.

9 . Abakuru b’Ibihugu bemeje inama zibahuza ku buryo buhoraho ,bagenzura uko ingamba zishyirwa mu bikorwa, bashimangira ko hakenewe ubworoherane mu kubahiriza amabwiriza ya EAC mu bihe bidasanzwe.

Ruhumuriza Richard /MUHABURA.RW

Subiza

Email Yawe Ntiribugaragazwe