Kigali: 28 bafatiwe mu bikorwa byo kurenga ku mabwiriza yo kurwanya icyorezo cya COVID-19

Mu bikorwa bitandukanye bya Polisi y’u Rwanda byabereye mu mujyi wa Kigali kuri uyu wa Gatandatu tariki ya 18 Mata abantu 28 bafashwe barenze ku mabwiriza ya Leta yo kurwanya ikwirakwira ry’icyorezo cya Coronavirus. Abenshi muri aba bantu bafashwe ingo zabo bazihinduye nk’utubari abandi amaduka bari barayahinduye utubari.

Muri aba bantu harimo abafashwe barimo kunywa inzoga mu tubari bicaye begeranye cyane, bafatiwe mu bice bya Kimironko, Kibagabaga ,Kicukiro na Kinyinya.

Muri bo uko ari 28 harimo umuyobozi w’umudugudu wa Nyirabwana muri Kibagabaga wari watumiye inshuti ze iwe mu rugo bafatwa biteretse inzoga barimo kunywa. Abafashwe ubwo berekwaga itangazamakuru ku kicaro cya Polisi yo mu mujyi wa Kigali i Remera, umwe muri bo yavuze ko yafashwe yatumiye inshuti ze Zirindwi bafatwa barimo kunywa inzoga banabyina.

Yagize ati “Twari twakoze ibirori turimo kubyina urusaku rwari rwinshi, twarenze ku mabwiriza ya Leta yo kurwanya icyorezo cya Koronavirusi niyo mpamvu turi hano kuri Polisi, twakoze amakosa.

Uwitwa Niyonegamiye Jean d’Amour yavuze ko yafashwe yasuye inshuti ye aho yafatiwe ari kumwe n’abandi bantu batatu basinze. Niyonshuti Beatrice aricuza kuba yaratumiye abantu mu iduka rye bakaza kuhanywera inzoga, yafatanwe n’abantu barindwi.

Uwishema Bahizi yafatiwe mu karere ka Kicukiro yavuze ko yari yatumiye iwe mu rugo abantu batandatu b’inshuti ze, nabo bafashwe banywa inzoga.

Yagize ati “Ni abaturanyi banjye, twari twarakoze ihuriro ku mbuga nkoranyambaga(Whatsapp) hanyuma tugatumirana tugategura ibirori.”

Umuvugizi wa Polisi y’u Rwanda, Commissioner of Police (CP) John Bosco Kabera yongeye kuburira abantu ababwira ko ibikorwa byo gufata abarenga ku mabwiriza ya Leta yo kurwanya ikwirakwira ry’icyorezo cya Koronavirusi bizakomeza.

Ati “Turashimira abaturage bamaze kumva neza amabwiriza bakayagira ayabo bakaba ari nabo badufashije gufata aba bantu bose. Ibikorwa byo gufata abarenga ku mabwiriza ya Leta bizakomeza ntabwo bizigera bihagarara.

CP Kabera yongeye kubwira abaturarwanda ko nta muntu ubujijwe kunywa ariko ikitemewe ari ugutumira inshuti n’abaturanyi kandi ko abazarenga kuri ayo mabwiriza bazafatwa babihanirwe.

Yagize ati “Niba uguze icyo kunywa kijyane iwawe mu rugo ukinywe witumira inshuti n’abaturanyi, birabujijwe uzabifatirwamo azaba yarenze ku mabwiriza ya Leta, azafatwa abihanirwe. Ibi kandi birareba n’abacuruza butike, bitwaza ko bacuruza ibiribwa n’ibindi bintu bikenewe ariko bararenga bagashyiramo n’inzoga ugasanga hahindutse akabari.

Muri ibi bihe byo kurwanya icyorezo cya Koronavirusi utubari turafunze, gusurana no guhuriza hamwe abantu ntibyemewe ndetse n’ingendo zitari ngombwa ntizemewe.


MUHABURA.RW

Subiza

Email Yawe Ntiribugaragazwe