Umuyobozi wa REB yatangaje ko abarimu bazongera gukora ibindi bizamini

REB yatangaza ko hagiye gukorwa ikindi kiciro k’ibizamini by’Abarimu mu rwego rwo kunoza amabwiriza agenga ibizamini by’abarimu hagamijwe kugira urutonde rw’abarezi ruzajya rukurwamo abakenewe mu myanya y’abarezi .

Umuyobozi Mukuru wa REB avuga ko hagiye gukorwa ikiciro cya kabiri k’ibizamini by’abarimu mu rwego rwo kurushaho kunoza amabwiriza agenga ibi bizamini, bityo abarimu bakazakora umubare w’ibizamini bikenewe kugira ngo babone gushyirwa mu myanya.

Dr. Ndayambaje yagize ati :Ntihagiye gusubirwamo ibizamini byakozwe ahubwo hagiye gukorwa ikiciro cya kabiri k’ibizamini by’abarimu mu rwego rwo kubahiriza amabwiriza abigenga.”

Yabajijwe impamvu hari abarimu bari baragaragarijwe amanota babonye ndetse bigaragara ko batsinze bakaba bongeye guhamagarwa mu bizamini?

Dr. Ndayambaje yasubije agira ati’’: Hari amabwiriza atarubahirijwe ari na yo mpamvu bagomba na bo kugaruka gukora ibindi bizamini kugira ngo noneho babe bujuje ibyo amabwiriza asaba’’

Umuyobozi Mukuru wa REB avuga ko abanyeshuri basoje mu mashuri nderabarezi n’ubwo ngo batarabona impamyabumenyi zabo bemerewe kwitabira ibi bizamini bashingiye ku byangombwa bahabwa ko bafite amanota abemerera kuba abarezi aho gutegereza igihe impamyabumenyi zizabonekera.

Avuga ko n’abantu batize uburezi ariko ngo bafite ubumenyi buhagije mu byo bize na bo bemererwa kuzitabira ibizamini, ibi byose ngo akaba ari mu rwego rwo kugira urutonde ruhoraho rushobora gukurwamo abarezi mu gihe bakenewe mu mashuri.

Ibaruwa Minisitiri w’Uburezi Dr. Uwamariya Valentine yandikiye inzego zinyuranye zirebwa n’iki kibazo igaragaza ko abakandida batsinze ikizamini k’isomo rimwe bakabona n’ibura amanota 70% bemerewe kuzakora ikizamini k’isomo batsinzwe.

Ibi biravugwa mu gihe abarezi bakoze ibi bizamini bo bavuga ko bahawe ikizamini kimwe kitagira icya kabiri bakagikora bakagitsinda ndetse ngo n’amanota agasohoka, bakaba bababajwe no kongera gusubira mu bizamini bahabwa iby’inyongera kandi batari babibwiwe.

Kuri iki kibazo cy’abarezi, yaba Minisitiri w’Uburezi mu ibaruwe ye yaba n’Umuyobozi Mukuru wa REB, bemeza ko abarezi bazasubira mu gukora ibizamini ku matariki bazamenyeshwa mu gihe kiri imbere.

MUHABURA.RW

Subiza

Email Yawe Ntiribugaragazwe