Iyo ikibazo gikemurwa na nyira cyo bigira akamaro kuruta kuzana undi ngo agikemure-YWMNET

Umuryango nyarwanda utari uwa Leta ukora ubufasha myumvire mu bana, urubyiruko n’abagore ku bijyanye n’imibereho myiza n’iterambere [YWMNET],wemeza ko kwifashisha urubyiruko mu bikorwa byo kurwanya ibiyobyabwenge, inda zitateguwe ndetse n’icyorezo cya SIDA ari bimwe mu byatuma ibyo byose birwugarije bibasha kugabanuka.

Ibi ni bimwe byagarutsweho ubwo uyu muryango wasozaga ubukangurambaga bwo kurwanya ibiyobyabwenge,inda zitateguwe ndetse n’icyorezo cya SIDA bwakorerwaga mu bigo by’amashuri makuru na za Kaminuza biherereye mu mujyi wa Kigali.

Ni ubukangurambaga ngaruka mwaka aho bukorwa binyuze mu biganiro,mu ndirimbo ndetse n’imivugo akenshi bigirwamo uruhare n’urubyiruko.Bwakozwe ku nkunga ya MIGEPROF,UNAIDS, ndetse na bimwe mu bigo nderabuzima byo mu mujyi wa Kigali.

Umuhuzabikorwa w’umuryango YWMNET, Madamu Mutesi Rose ,avuga ko urubyiruko rwifashishijwe cyane muri ubu bukangurambaga mu rwego rwo kumvisha bagenzi barwo ububi bwa SIDA,ubwo gutwara inda zitateguwe ndetse no gukoresha ibiyobyabwenge nka kimwe mu bituma ibyo byose bishora kurwibasira.

Ati”Iyo ikibazo gikemurwa na nyira cyo bigira akamaro kuruta kuzana undi ngo agikemure.Iyo ufashe urubyiruko rwo ubwarwo rukarwanya ibiyobyabwenge,inda zitateganyijwe ndetse n’ihohoterwa bibasha kumvikana neza.

Ngira ngo mwumva n’ahandi hose ko ibintu bibi byose bikorwa ahanini n’urubyiruko ariko uhereye ku rubyiruko ukarukangurira cyangwa se ukarufasha guhindura imyumvire n’imikorere, byatanga umusaruro ufatika bityo Abanyarwanda icyo twabizeza ni uko bakitega ibintu byinshi kuri uru rubyiruko”.

JPEG - 521.8 kb
Umuhuzabikorwa w’umuryango YWMNET, Madamu Mutesi Rose

Avuga ko ubu bukangurambaga kubunyuza mu marushanwa y’indirimbo n’imivuko ku rubyiruko ari rwo rurebwa n’ibi bibazo,bizatuma abo baririmba cyugwa bavuga imivugo, baheraho bakirinda izo nda zitateguwe n’ibiyobyabwenge.

Ati “Niba nk’aba bakobwa cyangwa abahungu barimo barwanya inda zitateguwe, sinumva ko aribo bafata iya mbere mu kujya kuzitera cyangwa se bakajya mu biyobyabwenge kandi bararirimbye cyangwa bakabivuga mu mivugo”.

Akangurira ababyeyi kwegera abana babo bakabafasha gusobanukirwa bimwe mu bituma bishora mu bukozi bw’ibibi birimo ubusambanya buviramo abana b’abakobwa gutwara inda zitateguwe.

Ati”Nakangurira ababyeyi kuba hafi y’abana babo,kubagira inama cyane ko twasanze n’ababyeyi nabo bafata umwanya muto mukubigisha ku bijyanye n’ubuzima bw’imyororokere”.

Nizeyimana Jean,umukozi muri Minisiteri y’Uburinganire n’iterambere ry’umuryango [MIGEPROF] ukora mu ishami ryo kurwanya ihohoterwa rishingiye kugitsina, avuga ko iki gikorwa cyateguwe n’umuryango YWMNET ari ingira kamaro kuko gifite aho gihuriye n’inshingano z’iyi minisiteri bigendabnye no gukemura ibibazo biba mu miryango bituma abana bishora mu ngeso mbi zituma ubuzima bwabo bujya mukaga.

JPEG - 739.6 kb
Nizeyimana Jean,umukozi muri MIGEPROF ukora mu ishami ryo kurwanya ihohoterwa rishingiye ku gitsina

Ati”Iyo tuvuze GBV tuba tuvuze rya hohoterwa rikorerwa abana,abagore n’umuryango muri rusange.Tukavugamo ibiyobyabwenge,ba bana baterwa inda zitateguwe bitewe n’umutekano muke babonye iwabo.Ibyo byose bisaba ko nka minisiteri y’umuryango n’iterambere nk’ishingiro ry’umuryango, dukora ubuvugizi kugira ngo ibyo bitagenda neza mu muryango bituma babana bajya hanze,bituma abana bifuza bakabashukisha ibidashoboka kugira ngo bagere kuri ubwo buzima bubi,tugakora ubuvugizi kugira ngo biveho burundu”.

Avuga ko nka minsiteri,ubukangurambaga babushyigikiye kuko bubafasha kugera kure aho batabasha kugera bityo, igihe bazahagerera bagasanga hari icyahindutse nabo bagakomerezaho.

Ati”Niba habayeho ubukangurambaga bwo kugaragaza impano z’urubyiruko,ni uburyo bwo kurwifashisha kugira ngo rubashe kugera hahandi minisiteri itabasha kugera vuba batange ubwo butumwa bugereye nitumanuka duzasange bwaragezeyo tugende twubakiraho”.

Niyobugingo Albert wo muri IPRC Kigali nk’umwe mu rubyiruko rutungwa agatoki,yemeza ko nk’urubyiruko hari abantu bavuga ko ibiyobyabwenge bigabanya ibibazo,ariko ngo burya ni ukubeshya ahubwo birabyongera ku rwego rwo hejuru.

Akomeza agira ati”Abenshi bashora imbaraga mu kugira ngo bakoronize abakobwa,nk’uko bakoresha ibiyobyabwenge ndetse bakanabasindisha nyuma bakabashuka babatera inda zitateguwe,bakagombye kuzishora mu byatuma biteza imbere ndetse n’igihugu muri rusange”.

UNAIDS igaragaza ko mu Rwanda abantu bari hagati y’imyaka 15 na 64 y’amavuko bafite ubwandu bwa SIDA bangana n’ibihumbi 216 bakaba bari ku kigero cya 3% cy’abaturage bose.Muri iyi mibare harimo abangavu n’ingimbi bagera ku 50,900. Ikindi kandi ngo buri mwaka haboneka 5,400 by’ubwandu bushya bw’agakoko gatera SIDA.

Imibare y’abafite ubwandu bwa SIDA,igaragara cyane mu mujyi aho nko mu mujyi wa Kigali,abagera kuri 4.3% by’abawutuye bafite ubwandu bw’agakoko gatera SIDA.



JPEG - 439 kb
Umuyobozi mukuru wa YWMNET unahagarariye ababyeyi muri uyu muryango,Umurangamirwa Anita aha igikombe umwe mu bari bamaze kurushanwa mu ndirimbo n’imivugo

Yanditswe na Habarurema Djamali

Subiza

Email Yawe Ntiribugaragazwe