Imyitozo ku kubungabunga amahoro yitezweho inyungu igaragara ku batuye isi

Imyitozo yiswe Shared Accord 2018 yahawe bamwe mu bakomoka mu bihugu bifite ingabo zibungabunga amahoro muri Centre Africa ngo yitezweho umusaruro ugaragara.

Iyo myitozo ya gisirikare yari imaze ibyumweru bibiri, yasojwe ku mugaragaro kuri uyu wa 28 Kanama 2018, ikaba yaberaga i Gako mu karere ka Bugesera.

Yari ihuje abasirikare n’abapolisi bo mu bihugu 12 byo hirya no hino ku isi basaga 200, ikaba yarateguwe ku bufatanye bw’u Rwanda na Leta Zunze Ubumwe za Amerika (USA) hagamijwe kubongerera ubushobozi mu gikorwa cyo kubungabunga amahoro.

Uwari ukuriye iyo myitozo, Maj Gen Innocent Kabandana, yavuze ko hari byinshi bungutse bijyanye n’akazi ko kubungabunga amahoro ku isi.

Maj Gen Kabandana yagize ati “Iyi myitozo ni ingirakamaro kuko yahuje abantu bo mu bihugu bitandukanye kugira ngo twigire hamwe, twungurane inama tunafashanye mu kuzamura ubushobozi bwacu. Bizatuma turushaho kubungabunga amahoro ku isi, cyane cyane muri Centre Afrika, twungutse byinshi”.

Yongeraho ko bizatuma banoza ibyo bakoraga kuko ubwo bufatanye ngo buganisha ku kumva kimwe uko bakora icyo gikorwa.

Umwe mu bagore bitabiriye iyo myitozo, Maj Kate Chikwekwe wo muri Zambia, yavuze ko yashimishijwe n’uko bibanze kuri Afurika.

Maj Chikwekwe ati “Ni ingenzi kuko twibanda ku bibazo bya Afurika bityo tukanabishakira ibisubizo binyuze muri iyi myitozo. Kuba rero dukorera hamwe ni akarusho kuko duhanahana ubunararibonye bityo buri wese akazakora neza ibyo ashinzwe, cyane ko dukorera n’igenamigambi hamwe”.

Ambasaderi wa USA mu Rwanda, Peter Vrooman, yavuze ko abakoze iyo myitozo bibafasha guhangana n’ibibazo bahura na byo mu bikorwa byo kubungabunga amahoro kuko akenshi baba bari ahantu hagoye nka Djuba, Bangui cyangwa Darfour.

Lt Gen Jacques Musemakweri umukuru w’Ingabo z’u Rwanda zirwanira ku butaka,na we witabiriye icyo gikorwa, atangaza ko u Rwanda rwiteguye gukomeza kubungabunga amahoro.

Lt Gen Musemakweri ati “U Rwanda n’Ingabo zarwo by’umwihariko, rwiteguye kubungabunga amahoro n’umutekano ku isi hose aho bikenewe, ni yo mpamvu ruzanakira imyitozo ya Shared Accord 2019. Ndizera ko iyi mwitozo irangiye yongereye umuco w’ubufatanye uzatuma kubungabunga amahoro mu gihe kiri imbere bizarushaho kugenda neza”.

Ibihugu byitabiriye iyo myitozo ni u Rwanda, Angola, Botswana, Madagascar, Malawi, Maroc, Netherland, Congo Brazzaville, Ubutaliyani, Senegal, USA na Zambia.

Chief Editor

Subiza

Email Yawe Ntiribugaragazwe