Komisiyo y’amatora yemeje bidasubirwaho urutonde rw’abemerewe guhatanira kuba Abadepite

Mu bantu 539 batanze kandidatire zabo bashaka kwiyamamaza mu matora y’Abadepite ateganyijwe mu kwezi gutaha, abagera kuri 521 ari bo babyemerewe, bivuze ko abangiwe ari 18 nk’uko bemejwe na Komisiyo y’amatora (NEC).

Kuri uyu wa Kane NEC yatangaje mu bakandida bigenga hemejwe bane undi umwe arangirwa, mu bakandida batanzwe n’imitwe ya politiki hemewe 302, aho mu Muryango FPR-Inkotanyi, PL, PSD nta mukandida wigeze wangirwa kwiyamamaza.

Mu ishyaka riharanira Demokarasi no kurengera ibidukikije (DGPR), abakandida 34 ryatanze, babiri ntibemerewe kwiyamamaza. PS-Imberakuri yatanze abakandida 45, icyenda ntibemererwa.

Mu byiciro byihariye, urubyiruko hatanzwe kandidatire 32, hemerwa 26. Mu bafite ubumuga hatanzwe kandidatire 10 zose ziremerwa, mu bifuza guhagararira abagore mu nteko ishinga amategeko, umutwe w’Abadepite, hemejwe abakandida 179. Muri rusange kandidatire zatanzwe, 60% byazo ni iz’abagore.

Ibikorwa byo kwiyamamaza bizatangira ku wa 13 Kanama kugeza ku wa 1 Nzeri 2017. Amatora ateganyijwe ku wa 2 Nzeri 2018 ku Banyarwanda batuye muri Diaspoara naho abari imbere mu gihugu bazazindukira mu matora ku wa 3 Nzeri 2018.

Muhabura.rw

Subiza

Email Yawe Ntiribugaragazwe