Ntabwo ari ukwivuga neza ndabona umubano wacu n’u Bufaransa urimo gutera imbere – Perezida Kagame

Umwaka n’ukwezi birirenze Emmanuel Macron w’imyaka 40, atorewe kuyobora u Bufaransa, aho yasanze igihugu cye mu icuraburindi mu bijyanye na politiki y’imbere mu gihugu ndetse no mu mubano gifitanye n’ibindi bihugu cyane cyane ibyo ku mugabane wa Afurika.

U Rwanda ni kimwe mu bifitanye amateka akomeye n’u Bufaransa ku buryo Perezida Macron, afite umukoro ukomeye wo gukora ibitandukanye n’iby’abamubanjirije agacayura umubano w’ibihugu byombi washegeshwe n’uruhare rw’igihugu cye muri Jenoside yakorewe Abatutsi.

Ubwo yatorwaga, Perezida Kagame yavuze ko Macron ategerejweho kwihutira gushyiraho imikorere mishya no gushyira iherezo ku myaka myinshi y’urujijo. Gusa yongeyeho ko imyitwarire y’u Bufaransa ku Rwanda itazahinduka mu gihe cyose butarahindura uburyo bwitwara kuri Afurika muri rusange.

Mu kiganiro Perezida Kagame yagiranye na Jeune Afrique, yavuze ko mu mwaka umwe wa Macron hari intambwe imaze guterwa, aho bagiye bagirana ibiganiro by’ingirakamaro ku bijyanye n’umutekano n’iterambere ry’umugabane wa Afurika.

Avuga ko nubwo ibyo Macron asabwa gukora ari urugendo rutarangira umunsi umwe, hari intambwe imaze guterwa.

Yagize ati “Perezida Macron yatangiye gushyira umucyo muri politiki y’imbere mu Bufaransa ndetse no mu mubano iki gihugu gifitanye n’ibindi bihugu birimo na Afurika. Birahindura imyitwarire yo kugenera ibihugu uko bibaho, kugenzura igisirikare ndetse na politiki byaburanze mu myaka yashize.”

Akomeza avuga ko imyitwarire mishya y’u Bufaransa itanga icyizere kandi ikwiriye gushyigikirwa.

Bwa mbere Perezida Kagame yagiranye ibiganiro na Macron, i New York muri Leta Zunze Ubumwe za Amerika aho bari bitabiriye Inama y’Umuryango w’Abibumbye. Bahuriye kandi i New Delhi mu Buhinde mu nama yiga ku ikoreshwa ry’ingufu zikomoka ku mirasire y’izuba muri Gashyantare uyu mwaka.

Mu kwezi gushize Perezida Macron yakiriye Kagame i Paris, baganira ku ngingo zirimo ikoranabuhanga, ibibazo by’umutekano muri Repubulika Iharanira Demokarasi ya Congo (RDC), Centrafrique, agace ka Sahel n’ibindi.

Abakuru b’Ibihugu byombi biyemeje ko ibihe bibi byashegeshe umubano wabyo bikwiye kuvomwamo imbaraga zo kubaka umubano mwiza ku nyungu z’ahazaza habyo.

Macron yagize ati “Icyo tureba ni uburyo dushobora gufatanya kubaka haba mu bijyanye no guhanga udushya, ba rwiyemezamirimo, ibijyanye n’uburezi n’ururimi, ibijyanye na politiki, ibi nibyo umubano w’ibihugu byombi ukwiye gukomerezamo ukarenga ibisanzwe by’ahahise.”

Umunyamakuru François Soudan yabajije Perezida Kagame niba kwirengagiza ibibazo bikomeye ibihugu byombi bitumvikanaho birimo; iperereza ku ihanurwa ry’indege ya Habyarimana, uruhare rw’u Bufaransa muri Jenoside, byatuma ukwiyunga nyako gushoboka.

Perezida Kagame yasubije ko umubano w’u Rwanda n’u Bufaransa urimo gutera imbere kandi bizatuma hakemuka n’ibindi bibazo.

Yagize ati “Ntabwo ari ukwivuga neza ndabona umubano wacu n’u Bufaransa urimo gutera imbere kandi ndizera ko iterambere ryawo rizatuma dukemura n’ibibazo wavuze. Bidasobanuye ariko ko tutabiha umwanya.”

Hashize imyaka itatu u Bufaransa budafite Ambasaderi i Kigali, aho uwari ambasaderi wabwo Michel Flesch yavuye ku butaka bw’u Rwanda agiye mu kiruhuko cy’izabukuru n’ubu akaba atarasimburwa. Perezida Kagame yavuze ko iki ari kimwe mu bizakemurwa n’iterambere ry’umubano mwiza w’ibihugu byombi.

Ati “Ese ni ikibazo cy’ibyumweru cyangwa amezi? tuzabireba. Icy’ingenzi ni uko dukomeza mu cyerekezo kizima ari cyo gikenewe.”

Perezida Macron, na we aherutse kuvuga ko hakiri kare gushyiraho Ambasaderi mushya w’u Bufaransa mu Rwanda, kuko gushyira umubano w’ibihugu byombi ku murongo bidashobora gukorwa mu ijoro rimwe.

umwe wa Macron hari intambwe imaze guterwa, aho bagiye bagirana ibiganiro by’ingirakamaro ku bijyanye n’umutekano n’iterambere ry’umugabane wa Afurika

Chief editor

Subiza

Email Yawe Ntiribugaragazwe