Nyakinama: Minisitiri Kabarebe yemeje ko ibibazo by’umutekano byugarije isi bisaba abayobozi b’ingabo basesengura [AMAFOTO]

Minisitiri w’Ingabo, Gen. James Kabarebe, yavuze ko ibibazo by’umutekano byugarije isi muri iki gihe bisaba abayobozi b’ingabo basesengura kandi batekereza mu buryo bwagutse.Kuri uyu wa Gatanu ubwo yari yitabiriye umuhango wo gusoza amasomo i Nyakinama mu Karere ka Musanze ku basirikare bakuru baturutse mu bihugu icumi bitandukanye ku Isi.

Abo basirikare bakuru 45 basoje amasomo amaze umwaka atangirwa mu Ishuri rikuru rya gisirikare i Nyakinama,baturuka mu bihugu icumi birimo Repubulika ya Czech, Ghana, Kenya, Malawi, Nigeria, Sénégal, Tanzania, Uganda, Zambia n’u Rwanda.

Gen Kabarebe yavuze ko amasomo bahawe ari inyungu kuri bo no ku bihugu baturutsemo.

Yagize ati “Ndemeza ko aya masomo yabaye aya gaciro kuri mwe mu kongera ubumenyi n’ubunyamwuga bigamije kongera ubushobozi bwanyu mu kuyobora, mugira imyumvire iboneye ku bibazo by’umutekano biriho. Kumenya neza uko umutekano uhagaze kuri ubu bisaba abayobozi bafite imitwe ifite ubushobozi bwo gusesengura ibibazo bitandukanye by’umutekano ndetse n’uko iby’ububanyi n’amahanga bihagaze.”

Yakomeje avuga ko ubushobozi bw’aba basirikare buzagaragarira mu byemezo bazafata n’uburyo bazitwara mu bibazo bazahura nabyo mu kazi.

Ati “Ubu muri abayobozi b’ingabo bagutse babasha gutekereza neza, bafata ibyemezo bihamye kandi bakabishyira mu bikorwa neza kandi bafite ubumenyi n’ubunararibonye bikenewe mu guhangana n’ibibazo biriho uyu munsi ndetse n’ibizaza mu gihe kiri imbere.”

Umuvugizi w’ingabo z’u Rwanda, Lt. Col. Munyengango Innocent, yavuze ko mu myaka itandatu Ishuri rikuru rya gisirikare rya Nyakinama rimaze, hari impinduka babona ku basirikare barinyuzemo.

Yagize ati “Impinduka zirahari kandi ziragaragara. Baba bafite ubumenyi bwinshi bahawe mu rwego rwo kuyobora ingabo no gukora imirimo isanzwe yo mu biro kandi biragaragara. Umutekano muri iki gihe si ukwiga iby’intambara gusa nubwo nabyo bikenewe ariko hari ibindi byinshi kugira ngo umutekano w’isi ugerweho. Ibyo byose barabifite bakaba bagiye kubikoresha mu mirimo yabo kandi twumva bizagira icyo bifasha.”

Maj. Claver Gatsinzi waje ku isonga mu kwitwara neza mu basirikare bakuru basoje amasomo, yavuze ko ubumenyi bafite uyu munsi butandukanye nubwo baje bafite.

Yagize ati “Iyo tugize amahirwe nk’aya yo kwigira hamwe bidufasha kumenya uburyo tuzakemura ibibazo byugarije igihugu cyacu cyangwa ibihugu byabo. Iyo umuntu yabonye amahugurwa nk’aya hari igihinduka kuko umuntu aba yaje ameze mbere. Ibyo bituma uhinduka ukaba uwo uri we uyu munsi nibyo bikwereka ko uzakora ibitandukanye n’ibyo wakoraga mbere.”

Mu basirikare 45 basoje amasomo mu cyiciro cya gatandatu, hari 29 bahawe impamyabumenyi y’icyiciro cya gatatu cya Kaminuza mu bijyanye n’ubumenyi mu by’umutekano.



Akarasisi k’abasirikare bakuru 45 basoje amasomo baturuka mu bihugu icumi


Minisitiri w’Ingabo, Gen. James Kabarebe, yahembye abasirikare bakuru baje ku isonga mu kwitwara neza mu masomo

REBA IBYO DUKORA USHAKA KO TWAGUFASHA WATWANDIKIRA KURI EMAIL: Muhabura10@gmail.com


Muhabura.rw

Subiza

Email Yawe Ntiribugaragazwe