Bugesera: Gitifu agiye kuryozwa imitangire mibi ya serivise no gutinza abageni ku munsi wo gusezerana

Umunyamabanga Nshingwabikorwa w’Umurenge wa Ntarama wakerereje abageni amasaha arenga atatu, akagerekaho no kubeshyera umuyobozi w’akarere ka Bugwesera w’agateganyo ko yagiye ku mwakira, ubuyobozi bw’Akarere bwatangaje ko bugiye kumufatira ibihano kubera imitangire ya serivisi idahwitse.

Imiryango itanu yagomba gusezeranira imbere y’Ubuyobozi bw’Umurenge wa Ntarama kuri uyu wa Kane tariki ya Karindwi Kamena 2018. Aba bageni hamwe n’abari babaherekeje, bari babukereye bagerera igihe ku Biro by’Umurenge ariko babura umuyobozi wagombaga gushimangira isezerano ryabo imbere y’amategeko.

Bageze ku biro by’uyu murenge saa saba zirengaho iminota mike kuko isaha yo gusezerana yari saa munani kandi ukerewe acibwa amande.

Isaha yo gusezerana yarageze bategereza Umunyamabanga Nshingwabikorwa w’Umurenge wa Ntarama, Mukantwari Berthilde, wari kubasezeranya baraheba, babura n’undi wababwira niba bari busezerane cyangwa ko gahunda yasubitswe wenda ntibabimenye.

Kera kabaye gitifu yaje kuhasesekara, abasezeranya saa kumi n’imwe n’iminota 40 butangiye guhumana, hagati aho abageni ngo bari bafite amakuru ko gitifu yagiye kwakira Umuyobozi Mushya w’Akarere.

Gitifu Mukantwali yatangarije umunyamakuru ko impamvu yatumye atinza abaturage ari ukubera uburwayi ndetse ko yari yasabye uruhushya.

Gitifu Mukantwali ati “Byatewe n’uko nari ndwaye. Nari nagiye kwa muganga kandi nari nasabye uruhushya abankuriye.”

Mutabazi Richard Umuyobozi w’Agateganyo w’Akarere ka Bugesera, we yavuze ko gitifu nta gahunda n’imwe y’akazi yari arimo ahubwo yari yigiriye muri gahunda ze bwite.

Mutabazi Richard yagize ati “Ibyo kuvuga ko yari yaje kunyakira si byo. nta gahunda n’imwe y’akazi yari arimo, yari muri gahunda ze bwite. Araza kubikurikiranwaho n’ibihano bazabimenya, ikosa ry’umuyobozi umwe ntabwo rikwiye kuba ikosa ry’imiyoborere yose.”

Yakomeje agira ati“Ejo nta gahunda yari ihari yo kwakira meya nta n’iteganyijwe. Niriwe muri gahunda ya Minaloc i Gitagata mu muhango wo gusezerera abana bari barangije kugororwa. Turi mu gihe cyo gukangurira abantu gusezerana tugize Imana bakaza si twe dukwiye kuba twabaha serivisi idakwiriye. Arakurikinwa mu buryo bw’imiyoborere.”

Uyu muyobozi yasabye abaturage kwihanganira izo serivisi mbi zahawe abari bagiye gusezerana.

Uretse aba bageni bakerejwe na gitifu wagombaga kubasezeranya, abandi 12 bari gusezeranira mu Murenge wa Karama mu Karere ka Kamonyi muri Mutarama 2017 bo babuze ubasezeranya bituma badakora ibirori by’ubukwe nk’uko bari babiteganyije.

Mu bihano bihabwa abayobozi, harimo kwihanangirizwa n’ababakuriye gusa nta mukozi ushobora guhanirwa inshuro ebyiri irenze imwe ikosa rimwe yakoze rimwe mu rwego rw’akazi.

Chief Editor

Subiza

Email Yawe Ntiribugaragazwe