Yashyizweho kuri5 November, 2019 | 17:22

Bamwe bati ’nta ukwiye kuzira urukundo’ abandi bati ’nta rukundo mu kazi’

Henshi ku isi kompanyi zinyuranye zigenga ntizigira amabwiriza abuza abakozi bakuru gukundana n’abato, gusa hari abakozi birukanwa bazize ibyo nk’uko byagendekeye Gary Lyon wo muri Australia.

Kompanyi zindi zo zigira amategeko atomoye abuza abakozi bakuru gukundana n’abo bategeka, kabone nubwo baba babyiyumvikaniyeho, umuyobozi wa McDonald’s ku isi aheruka kuzira ibi.

Gary Lyon amaze gusoma inkuru kuri BBC yarayandiye avuga ko na we ibyamubayeho ariko avuga ko abona ari ibintu bidafite ishingiro kuziza umuntu urukundo.

Lyon ubu ni umushoramari ufite kompanyi ye nawe, ariko kera yirukanywe mu kazi kuko yakudanye na Tamra umukozi wari mu bo ayobora.

Gusa abamwirukanye ntibabatandukanyije kuko bakomeje urukundo rwabo baza no gushyingiranwa ubu bafite umwana w’umukobwa witwa Charlotte w’imyaka 11.

Lyon yari umuyobozi ushinzwe ibikorwa muri kompanyi ikora amadirishya n’inzugi, ari naho yaje guhurira n’umukozi muto waje muri iyi kompanyi.

Ati: "Buri gihe numvaga mwishimiye nawe kandi yabyerekaga abandi ko nanjye anyishimira. Byahereye aho".

Aba bakozi baje gukundana ariko babigira ibanga kugeza ubwo babyeretse buri wese.

’Iryavuzwe rirataha’

Lyon ati: "Ntabwo nakumva uko biba ikibazo ku bandi, igihe cyose ntacyo byangiza ku kazi kawe".

"Uwo mukorana mumarana umwanya munini, rero ugira umwanya wo kumumenya neza".

Mu gihe hari hashize amezi agera kuri atatu bakundana, Bwana Lyon yahamagawe mu biro bikuru, maze ati: "Nuko iryavuzwe rirataha".

Yarirukanywe ariko umukobwa ntibamukoraho. Ati: "Byaramuhungabanyije, ariko ntacyo yari kubikoraho. Byari ukubireka agakomeza akazi ntakundi."

Bwana Lyon avuga ko nta mabwiriza asobanutse yariho agendanye no gukundana n’abo mukorana. Avuga ko icyemezo nk’iki "kirimo akarengane" kandi gishingiye "ku mitekerereze y’isi ya kera".

Agira ati: "Ese abakozi bakuru bakwirukanwa ngo kuko bakunda abo bakoresha? Oya, igihe cyose birimo ubwumvikane".

Uyu mugabo asa n’uvuga nka wa muhanzi w’Umunyarwanda Mavenge Sudi uririmba ati: "Urukundo uwo rushatse ruramusanga, ni nk’urupfu iyo ruje rugatwara umuntu".

Nawe yagize ati: "Ntiwahitamo aho uzahurira n’urukundo, none kuki abakundanye babihanirwa umwe yirukanwa?"

Bamwe bakomeje kubizira

Ubushakashatsi bunyuranye buvuga ko hagati ya kimwe cya kane na kimwe cya gatatu cy’abantu bakundana bikaramba bahurira mu kazi.

Gusa nyine abahuriye mu kazi bagakundana bose ntibarambana. Hari abiteretanira gusa, hari abakundana byo kwimara ipfa gusa, hari n’abahuza urugwiro n’ibitsina umugoroba umwe - uko wabyita kose.

Gusa bamwe mu bakozi bakomeye bazwi bibutsa abantu uburyo ibintu bikomera iyo abantu bahuriye ku kazi ’bakabyumva kimwe’ kandi babibuzwa n’amategeko ya kompanyi bakorera.

Mu mwaka ushize, Brian Krzanich, umuyobozi mukuru wa kompanyi ya Intel’s yareguye nyuma y’uko akundanye n’umukozi we, ibintu iyi kompanyi ibuza.

Darren Huston wayoboraga kompanyi ikora ibyo gutegura ingendo kuri Priceline.com yareguye bimaze kumenyekana ko akundana n’umukozi mu bo ayobora.

Urugero ruheruka ni urw’umuyobozi mukuru wa McDonald’s wirukanywe muri ’weekend’ ishize kuko akundana n’umukozi ayobora.

Ben Willmott wo muri ’Chartered Institute of Personnel and Development’ avuga ko usanga ibigo byinshi bitagira amabwiriza asobanutse kuri iyi ngingo.

Umunyamategeko Rebecca Thornley-Gibson, we avuga ko igihe cyose umwe mu bakundana ari nawe ushinzwe imishahara, imyitwarire, za konji, kuzamura mu ntera, n’andi mahirwe mu kazi areba uwo akunda, haba hari ikibazo.

Ati: "Biba bishoboka cyane ko hazamo kubogama hakagira ababirenganiramo".

Arakomeza ati: "Biranashoboka ko abakozi bato batabona imbaraga zo guhakanira ababakuriye, ibi bikaba byaganisha no ku guhohoterwa bishingiye ku gitsina".

Rebecca ariko avuga ko guhagarika abakozi bakorana gukundana bidashoboka, ariko gushyiraho amabwiriza abigabanya akanakumira ingaruka zabyo mu kazi bikwiriye.

JPEG - 35.2 kb
Gary na Tamra Lyon ubu bafite umukobwa w’imyaka 11 witwa Charlotte

Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe