Yashyizweho kuri13 December, 2018 | 18:16

Nduhungirehe avuga kuri ba Kayumba:Ikigomba gukorwa ni ukubashyikiriza inkiko ntabwo ari ukubajyana mu biganiro

Umunyamabanga wa leta muri Minisiteri y’ububanyi n’amahanga, Olivier Nduhungirehe, yashimangiye ko aticuza ku butumwa yanyujije kuri twitter ye butishimiwe na Afurika y’Epfo avuga ko uwumva ari igitutsi yabyumva uko ashaka, yongera gushimangira ko u Rwanda rudateze kuzagirana imishyikirano na Kayumba Nyamwasa n’abandi ba banyabyaha.

Aganira na VOA ku kibazo cy’umubano wa Afurika y’Epfo n’u Rwanda,Olivier Nduhungirehe avuga ko ibintu byaba byarababaje Afurika y’Epfo birimo inkuru ya kimwe mu binyamakuru byo mu Rwanda n’ubutumwa bwe kuri twitter.

Aha yasubije agira ati “Mbere na mbere icyo kinyamakuru bavuga ntabwo ari icya let nta n’ahantu gihuriye na leta.Bikaba rero bitangaje kumva ambasaderi wacu ahamagazwa ngo abazwe mu kinyamakuru kidafite aho gihuriye na leta.”

Abajijwe ku kijyanye n’ubutumwa bwe yanyujije kuri twitter, Amb. Nduhungirehe yakomeje ashimangira ibyo yayanditseho ko nta narimwe u Rwanda ruzagirana imishyikirano n’abanyabyaha.

Ati“Hanyuma ku byerekeye twita yanjye,… ibyo maze kubabwira nibyo nanditse muri iyo twita.Ni ukuvuga y’uko twebwe nk’u Rwanda tudashobora kwemera y’uko haba imishyikirano iyo ari yo yose n’abo banyabyaha, ko abifuza kuganira nabo bazaganire na bo ariko ko twebwe tutazigera tujya muri iyo mishyikirano.Iyo ngiyo ni position ya Guverinoma y’u Rwanda, uwumva ko ari igitutsi abyumve uko ashaka..”

Yakomeje abazwa ku byo minisitiri w’ububanyi n’amahanga wa Afurika y’Epfo, Lindiwe Sisilu yavuze by’uko Kayumba Nyamwasa yifuza gushyikirana n’u Rwanda, bashobora kwemera kuganira nawe.

Nduhungirehe ati “Nk’uko nabivuze,umubano wa Afurika y’Epfo n’u Rwanda ni umubano hagati y’ibihugu bibiri.Dufite ibyo tuganiraho nk’ibihugu bibiri.Rero ibyo bibazo bindi bijyanye n’abo bantu bakoze ibyaha mu Rwanda, bakatiwe n’inkiko, ibyo bintu ntabwo bigomba kuzanwa mu biganiro hagati y’ibihugu bibiri.Ikigomba gukorwa ni ukubashyikiriza inkiko ntabwo ari ukubajyana mu biganiro ibyo ri byo byose.”

Ambasaderi Nduhungirehe kandi yanasabwe kugira icyo avuga ku mubano w’u Rwanda n’u Burundi, asubiza ko ubundi ikibazo cy’u Burundi kizwi ndetse na EAC yakigejejweho, ku buryo irimo gukora ibishoboka kugirango ibiganiro hagati y’Abarundi bikomeze hashakirwe umuti ibibazo by’Abarundi.

Kuri uyu wa Gatatu, itariki 12 Ukuboza, nibwo Minisiteri y’ububanyi n’amahanga yasohoye itangazo rivuga ko u Rwanda rwifuza gukomeza inzira yo kongera kubyutsa umubano warwo na Afurika y’Epfo nyuma y’aho hashize iminsi mu itangazamakuru havugwa ibibazo bishya bishobora kudindiza iyi nzira.

Nk’uko iri tangazo rikomeza ribivuga, ngo hari ibikorwa byo kugerageza gutinza iyi nzira yo kubyutsa imibanire hagati ya Afurika y’Epfo n’u Rwanda, birimo ibirego bidafite ishingiro bishinjwa u Rwanda mu matangazo agenewe rubanda no mu itangazamakuru, bishingiye ku bihuha no kuyobya bikorwa n’Abanyarwanda baba muri Canada no muri Afurika y’Epfo.

Yanditswe na Habarurema Djamali


Tanga igitecyerezo

Amazina
Ubutumwa

1 Comment

ngabire moses - 3 months ago

Ehe buriya nabo bafitibyaha bakoze murwanda? Nimwicare muganirire hamwe
Nahibyo kwitana abanyabyaha who’s prefect??? Wamukurahe

Izindi nkuru