Yashyizweho kuri15 April, 2019 | 18:58

Musanze:Abashumba baragira inka z’abakomeye bakubise aba DASSO babahindura intere

Abashumba bivugwa ko baragira inka za bamwe mu bayobozi bakomeye barimo abafande bakubise Abadaso n’abahome guards babahindura intere ubwo babasangaga baragiye mu mirima ya bamwe mu baturage bo mu karere ka Musanze.

Ikubitwa ry’aba badaso ngo siryo ryonyine kuko aba bashumba ngo basanzwe bagira urugomo aho byemezwa na bamwe mu baturage bo mu murenge wa Cyuve bavuga ko barambiwe inkoni z’aba bashumba.

Nk’uko abaturage babitangarije RBA ducyesha iyi nkuru,ngo izi nka bakunda kuzishora mu mirima y’ibirayi byabo bababuza bakabatera ubwoba ndetse bakanabakubita bababwira ko ari iz’abasirikare.

Umwe yagize ati “Bishingikiriza ko abo baragiriye ari abayobozi bakomeye,ariyo mpamvu baje kurwanya Leta. Numvise bavuga ngo ni inka za afande.Ni nayo mpamvu barwanya Leta bavuga ngo afande ntabwo tumuzi. Ngo yahemba abadaso bose bari bahari icyarimwe".

Undi mubyeyi yagize ati “Nari ndi mu kazi,abana baza biruka bati mama we ngwino uje kudutabara,bya birayi byacu babiragiye babirangije.Twababujije barangije batwirukaho".

Urugomo rw’aba bashumba rwarenze igipimo kuko basigaye bakubita inzego z’umutekano aho biraye ku ba Dasso barabakubita,babatera amabuye barabakomeretsa,bajya mu bitaro.

Umu DASSO wakubiswe ubwo yari atabaye umuturage wari wonesherejwe ibirayi,agakomeretswa n’amabuye yatewe n’abashumba yavuze ko bari abadaso batatu igihe bakubitwaga n’abo bashumba bakanabatera amabuye.

Ati “Abashumba baradukubise n’abandi baturage bahatuye badutera amabuye. Twari abadaso batatu n’aba home guard bane, tugezeyo batangira kudukubita n’ibwo nakomerekaga gutya Bari bafite n’imihoro.Haje kuza abandi ba home guard benshi inka tuzizana hano ku murenge.”

Guverineri w’Intara y’Amajyaruguru, Jean Marie Vianney Gatabazi avuga ko aba bashumba bagomba kubihanirwa kandi ko hagiye gushyirwamo ingufu zo guca uru rugomo babifashijwemo na Polisi na RIB.

Yagize ati “Ababikoze mbere bajyaga babaca amafaranga, bagahanwa bakariha ibyangijwe ariko twasabye RIB na polisi ko ababikoze bafatwa, bagahanwa mu rwego rw’urugomo. Gukubita no gukomeretsa umuntu ni icyaha, twasabye ko aba bakanirwa urubakwiye.Tugomba gushaka ba nyiri izo nka nubwo bavuze ngo barishye amafaranga y’ubwone,ntibigomba kurangirira aho ngaho".

Yakomeje agira ati"Nta muntu wemerewe kuragira ku gasozi.umuntu agomba kuragirira inka iwe mu kiraro,akayishakira ubwatsi,yaba afite urwuri rugaragara ruzwi,akazijyanamo.Urwo rugomo rugiye gucika burundu.”

Guverineri Gatabazi yavuze ko ba nyiri izi nka bagiye gushakishwa uruhindu bakamenyekana anizeza kandi abaturage ko umutekano wabo n’imyaka yabo ugiye gucungwa ntawuzongera guhohoterwa.

Niyomugabo Albert/MUHABURA.RW


Tanga igitecyerezo

Amazina
Ubutumwa

Izindi nkuru