Yashyizweho kuri16 July, 2019 | 16:18

Kirehe:Umukecuru yaroze umusore gutunda amatafari ijoro ryose yambaye ubusa

Umukecuru witwa Nyankuba Mariya w’imyaka 62 y’amavuko utuye mu Murenge wa Kirehe mu Kagari ka Nyabikokora mu mudugudu wa Rutonde, arakekwaho kuroga umusore baturanye akamutundisha amatafari ijoro ryose yambaye ubusa buri buri.

Ibi bisa n’ibitangaje byabaye mu ijoro ryo kuwa 14 rishyira kuwa 15 Nyakanga 2019.

Intandoro yo kumenya ibi,ngo umuryango wa Rusanganwa Joseph uturanye n’uyu mukecuru, babuze umuhungu wabo witwa Ngamije Appolinaire w’imyaka 22 y’amavuko bashakisha ahantu hose baramuheba bahita bigira inama yo kubimenyesha inzego z’ubuyobozi n’abaturanyi kugira ngo babafashe kumushaka.

Bigeze mu ma saa sita z’ijoro ngo nibwo hari bamwe mu baturanyi babonye uwo musore ari kumwe n’uwo mukecuru baturanye witwa Nyankuba yambaye ubusa buri buri ari kumutundira amatafari yo kubaka.

Ubwo bakimubona bamwe bagerageje kumukoraho ariko yahitaga ibiyaka n’imbaraga nyinshi ahubwo ababwira ko atahava agishaka gukomeza gukora akazi k’umukecuru.

Bimaze kumera guryo Nyankuba akibibona ngo yahise yiruka na bwangu ajya kwihisha mu nzu ye ahita akubitaho n’urugi.Icyahise gikorwa ni uko abandi bahamagaye ababyeyi b’uwo musore n’ubuyobozi baramubereka.

Umusore bamubaza aho yashyize imyenda ababwira ko ari mu nzu y’uwo mukecuru.

Bihoyiki Leonard,Umunyamabanga Nshingwabikorwa w’Umurenge wa Kirehe yemereye umunyamakuru ko nawe yahageze muri iryo joro hanyuma bagasaba uwo mukecuru gukingura inzu maze bagasangamo imyenda n’inkweto by’uwo musore.

Akomeza avuga ko uwo mukecuru ahakana ko ariwe wamutundishaga amabuye muri iryo joro.

Yungamo ati “Kubera umujinya abaturage bari bafitiye uwo mukecuru, bavuga ko n’ubusanzwe bamuziho kuroga byabaye ngombwa ko we n’abakobwa be babiri tubajyana kuri polisi turahabaraza, bukeye abakobwa be turabarekura ndetse dusaba n’irondo kubacungira umutekano.”

Gitifu Bihoyiki yakomeje avuga ko nyuma y’ibyo byabaye ngombwa ko uwo mukecuru bamurekera mu maboko y’urwego rw’ubugenzacyaha kugira ngo hakorerwe iperereza ryimbitse.

Ati “Urumva byabaye ngombwa ko tumurekera kuri RIB kugira ngo umutekano we ukomeze ucungwe neza kuko abaturage bamufitiye inzika ngo asanzwe ari umurozi bakanavuga ko hari abandi bantu benshi yagiye yica muri aka gace, ikindi turi gukora iperereza ngo tumenye koko niba yaratundishije amabuye uwo musore.”

Magingo aya ngo ubuyobozi bw’uyu murenge buri kugerageza gukoresha inama kugirango abaturage bahumurizwe ndetse banabigishe gukomeza kubana neza mu mahoro na bagenzi babo nta mwiryane ndetse n’amakimbira.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


1 Comment

IRAFASHA Alpha - 1 month ago

Musange aba baturage bo muri uwo mudugudu bagirane umushikirano nawe.

Izindi nkuru