Yashyizweho kuri22 April, 2018 | 22:35

Afghanistan: Ibisasu by’Umwiyahuzi Byahitanye 48 Abarenga 100 Barakomereka

Umwiyahuzi yaturikirije ibisasu ku kigo gitangirwamo amakarita y’abazatora i Kabul muri Afghanistan, uyu munsi ku cyumweru bihitana abantu 48, bikomeretsa abarenga 100.

Minisitiri w’ubutegetsi bw’igihugu Najeeb Danish yabwiye Ijwi ry’Amerika ko abantu bari bategereje guhabwa amakarita yabo, bari ku murongo hanze y’ikigo, ubwo umwiyahuzi yaturitsaga ibisasu yari yiziritseho.

Amakuru aturuka ku bitaro aho abakomeretse barimo kuvurirwa avuga ko icumi muri abo bamerewe nabi cyane.

Umutwe wa Leta ya Kiyisilamu wavuze ko ariwo wagabye icyo gitero.
Umwe mu bayobozi bakuru muri Afghanistani, Abdullah Abdullah yamaganye icyo gitero yise “ iterabwoba” kw’ishuri ry’i Kabul ahateganyijwe gutangirwa amakarita yemerera abantu gutora.

Ambasaderi w’Amerika muri Afghanistan, John Bass, yashyize ahagaragara itangazo yamagana icyo gitero yivuye inyuma. Yanatanze ubutumwa bwo kwifatanya mu kababaro n’abakozweho n’icyo gitero hamwe n’imiryango yabo.

Perezida w’Afghanistan Ashraf Ghani yatangije ibikorwa byo kwandika abazatora mu cyumweru gishize. Yemereye komisiyo yigenga y’amatora gutegura urutonde rw’abazatora abadepite n’abajyanama b’intara kw’italiki ya 20 y’ukwezi kwa 10. Bizaba ari ubwa mbere mu mateka y’igihugu, Abanyafuganisitani bazaba batoye hakurikijwe urutonde rw’abatora ku mugaragaro.

Igitero cyabaye umunsi umwe nyuma y’uko umuvugizi wa perezida, mw’itangazo yagejeje ku bitangazamakuru, avuze ko Ghani yavuganye n’abayobozi bakuru b’igisilikare kuri telephone kandi ko yabahaye amabwiriza ko bagomba gucunga neza umutekano ku biro byandikirwaho abazatora.

Yanditswe Ubwanditsi bwa Muhabura


Tanga igitecyerezo

Amazina
Ubutumwa

Izindi nkuru