Yashyizweho kuri10 March, 2018 | 23:16

Umuturage witwa Birihanze Thasian w’imyaka 51 yatabawe yari agiye guhira mu nzu

Polisi y’u Rwanda ikorera mu karere ka Kirehe mu murenge wa Kigina mu ijoro ryo ku itariki 10 Werurwe ku bufatanye n’abaturage yajimije inzu y’umuturage witwa Birihanze Thasian w’imyaka 51 yari ifashwe n’inkongi y’umuriro.

Umuvugizi wa Polisi y’u Rwanda mu ntara y’Uburasirazuba w’agateganyo Inspector of Police(IP) Habukuri Samson yavuze ko iyo nzu yakorerwagamo imirimo y’ubucuruzi mu isanteri ya Nyakarambi, bigeze ninjoro abaturage babona iracumba umwotsi bahita batabaza Polisi batangira kuyizimya.

IP Habukuri yavuze ko nta bintu byinshi byari biyirimo usibye imashini 3 zabagamo zanahiriyemo,umuzamu wararaga muri iyo nzu yatabawe hakiri ahabasha kurokoka.

IP Habukuri yagize ati” Hari ninjoro mu masaa sita,nibwo inkongi y’umuriro yafashe iyo nzu y’ubucuruzi,nta bintu byinshi byahiriyemo usibye imashini eshatu zidoda imyenda barazagamo,umuzamu wari uyiryamyemo nawe ntacyo yabaye yahise asohokamo”.

Yakomeje ashimira abaturage umuco mwiza bagize wo gutabara kuko mu kuzimya uwo muriro hifashishijwe amazi yabo bazanaga.

Ntiharamenyekana neza icyaba cyateye iyi nkongi ndetse n’agaciro ka ziriya mashini zahiriyemo, birakekwa ko iyi nkongi yaba yatewe n’uko umuriro waba warashyizwe muri iyo nzu mu buryo butari bwo bigatuma insinga zikoranaho.

Yaboneyeho gusaba abaturage kujya basuzuma neza ko inzu zabo zashyizwemo urmuriro mu buryo buri bwo ndetse ko washyizwemo n’abantu babifitiye ubumenyi.

Yanditswe na Habarurema Djamali/ Muhabura.rw


Tanga igitecyerezo

Amazina
Ubutumwa

Izindi nkuru