Yashyizweho kuri16 May, 2017 | 10:02

Rubavu: Uwahishaga imibiri y’abishwe muri Jenoside azakurikiranwa n’ubutabera-IBUKA

Kuri uyu wa 14 Gicurasi 2017, mu Murenge wa Kanzenze, Akarere ka Rubavu hashyinguwe imibiri ibiri yabonetse mu masambu y’abaturage.

Abo baturage ngo bajyaga guhinga buri gihe bakabanza yayimurira ahandi hantu aho kuyerekana ngo ishyingurwe mu cyubahiro.

Iyi mibiri yabonetse mu tugali twa Nyaruteme na Nyamirango mu Murenge wa Kanzenze.

Ubuyobozi bw’abacitse ku icumu muri aka gace buvuga ko ibi ari ugushinyagura.
Buvuga ko bibabaje kubona nyuma y’imyaka 23 habaye Jenoside yakorewe Abatutsi hari abantu bagifite iyi myumvire.

Umuyobozi wa Ibuka mu Murenge wa Kanzenze, Dusengimana Innocent yagize ati “Buri mwaka iyo twibutse nta gihe tudashyingura, abo dushyingura bamwe muri mwe muba muzi aho bari, nk’aba tugiye gushyingura, aho twabakuye ni mu masambu, abantu bajyaga guhinga bakabanza kwimura iyi mibiri, aho bayimuriye na ho bajya kuhahinga bakayimurira ahandi, ni ikintu kitubabaza”

Yungamo ati “Birababaje kubona hari abantu badashaka kwerekana imibiri y’abacu ngo tubashyingure mu cyubahiro, kuri twe iyo ushyinguye uwawe uraruhuka.”

Uyu muyobozi avuga ko iki ari ikimenyetso cy’ingengabitekerezo ya Jenoside ikigaragara muri aka gace.

Abayobozi bo muri aka gace bakunze kuvuga ko kubera FDLR iri muri Congo yegeranye n’Akarere ka Rubavu ari kimwe mu bituma ingengabitekerezo ya Jenoside itahacika burundu.

Ubuyobozi bwa Ibuka buvuga ko uwahishaga iyo mibiri azakurikiranwa n’ubutabera kuko ibyo yakoze ari ugupfobya Jenoside ndetse no gusibanganya ibimenyetso bya yo.

Ibuka ikomeza ivuga ko ntako abarokotse nta ko batagize ngo batange imbabazi ku babiciye ariko bamwe mu bakoze Jenoside bo ntibashaka kwerekana imibiri y’abo bishe.

Abarokotse ariko banashimiye bamwe mu baturage babaye intwari bakabasha kurokora abatutsi bahigwaga bakabambutsa muri Congo.

src:Izubarirashe

Muhabura.rw


Tanga igitecyerezo

Amazina
Ubutumwa

1 Comment

Lori Castles - 2 months ago

What’s up mates, good article and pleasant arguments commented here, I am really enjoying by these.

Here is my web site ... divorce solicitors manchester

Izindi nkuru