Yashyizweho kuri19 August, 2020 | 16:28

Minisitiri w’Ubutegetsi bw’Igihugu Shyaka Anastase yongeye gukebura Abaturarwanda

Minisitiri w’Ubutegetsi bw’Igihugu Prof. Shyaka Anastase, yongeye gukebura Abaturarwanda bakomeje kudohoka ku ngamba zo kwirinda icyorezo cya COVID-19, asaba buri wese guhindukira akabona uburemere iki cyorezo kimaze guhitana abarenga ibihumbi 784 ku Isi, bityo akarushaho kwirinda kuba nyirabayazana w’ikwirakwizwa ryacyo.

Mu butumwa yanyujije ku mbuga nkoranyambaga, Minisitiri Prof. Shyaka yagaragaje uburyo bibabaje kandi biteye inkeke kuba COVID-19 yaraye ihitanye abantu babiri, ikaba ari inshuro ya mbere COVID-19 yishe abarenze umwe ku munsi mu Rwanda.

Yagize ati: “…Ibi bigomba kugira icyo bibwira buri wese: kuyirinda, kuyirinda abacu, kuyirinda Igihugu, NI UBU! Icyo ukora cyose, aho uri hose, wiyica amazi, itagucura umwuka!”

Icyorezo cya COVID-19 ubwo cyagaragara bwa mbere i Wuhan mu Burinwa mu mpera z’umwaka ushize, icyo gihugu cyari gifite ikizere ko gishobora kugihagarika kitarabasha kurenga ako gace cyabonetsemo bwa mbere, ariko nyuma y’amezi atageze kuri ane cyari cyakwiye mu bihugu bitandukanye birimo n’u Rwanda.

Abahanga mu by’ubuzima bashimangira ko iki cyorezo gikwirakwira mu buryo budasanzwe ku buryo hakenewe ubufatanye budasanzwe mu kukirinda, bidakozwe n’umuntu umwe, ahubwo buri wese akabigira ibye.

Nyamara nubwo abantu ari bo bandura ndetse bakanabura ubuzima, inzego z’ubuzima ku Isi ndetse no mu Rwanda by’umwihariko, zitewe inkeke n’uburyo badohotse ku mabwiriza yo kwirinda iki cyorezo.

Biratangaje kuba abarwayi babonetse mu Rwanda mu minsi itanu ishize baruta abatahuwe mu mezi atatu ya mbere uhereye tariki 14 Werurwe kuva umurwayi wa mbere yatahurwa mu Rwanda.

Kugeza tariki ya 14 Kamena 2020, mu Rwanda hari hamaze gutahurwa abarwayi 582 barimo 332 bakize na 248 bakirimo kwitabwaho n’abaganga, mu gihe abapfuye bari babiri gusa.

Nyuma y’amezi abiri gusa kugeza tariki ya 14 Kanama, abarwayi bari bamaze kugera ku 2,293 barimo 1,604 bakize na 681 bakirwaye ndetse n’umunani bamaze guhitanwa n’iki cyorezo.

Kugeza ku wa Kabiri tariki 18 Kanama, abamaze gutahurwa bageze ku 2,577 barimo 1683 bakize, 884 bakirwaye n’icumi bamaze kubura ubuzima.

Minisitiri w’Ubutabera akaba n’Intumwa Nkuru ya Leta Busingye Johnston, na we aherutse kwihaniza rubanda ko imyitwarire irimo kuranga Abanyarwanda,igaragaza ko icyorezo gisa nk’aho kiri kurusha ubwenge abo kibasiye ati: “Icyorezo cya COVID-19 kiturushe ubwenge?”

MUHABURA.RW Amakuru nyayo


Tanga igitecyerezo

Ibitekerezo


Tanga igitekerezo


Izindi nkuru