Yashyizweho kuri7 January, 2019 | 09:25

Nyamagabe: Kugwingira mu bana b’abasigajwe inyuma n’amateka byafashe indi ntera’

Imwe mu miryango y’abasigajwe inyuma n’amateka yo mu murenge wa Kigeme, Akagali ka Gasaka bavuga ko kubera imibereho mibi ikabije babamo abana babo bagwingira k’uburyo iyo ubarebye utamenya umukuru n’umuto.Ibi bigira ingaruka ku myigire yabo.

Ababyeyi baganiriye na Muhabura.rw bavuga ko abana babo batabasha kwiga ngo bafate mu mutwe kuko baba bashonje.Bamwe bemeza ko hari ubwo bahitamo kutohereza abana babo ku ishuri kuko baba baziko batashobora kwiga neza. Ngo ibi babikora by’amaburakindi kuko basanzwe bazi akamaro ko kwiga.

N’ubwo ngo Leta yabafashije muri byinshi by’umwihariko harimo gukurwa mu bihuru bari batuyemo bagatuzwa mu midugudu, basaba ko bafashwa kwiyubaka binyuze mu gufashwa kubona imirimo yabaha amafaranga yo guhahisha kugira ngo bitunge.Ibi ngo byatuma imibereho yabo ihinduka.

Bizimana umwe muri abo babyeyi avuga ko afite abana umunani. Muri bo bane nibo bashoboye kugera mu ishuri.

Abandi bane bakiri bato barwaye bwaki, bityo ngo yahisemo kutabohereza ku ishuri kuko abandi bana babaseka.

Ati “Iyo batabonye ibyo kurya ntibajya kwiga kandi ntiwababwira ngo nimujye kwiga kuko iyo bagiye kwiga ntibakurikira. Ese wabwira umwana uti andika cyangwa soma atariye? Uramubwira uti ‘andika kuri kiriya kibaho agahuma kubera inzara n’uburwayi bubugarije.”

Colette Mukamana, umwe muri abo babyeyi bafite abana bagwingiye,bataniga, avuga ko kubera ubukene batabasha kugurira abana babo imyenda y’ishuri. Mu bana batandatu afite ngo babiri gusa nibo yashoboye kugurira impuzankano y’ishuri.Avuga ko nyuma yo kugurira bariya bana babiri impuzankano, amikoro yamushiranye.

Mukamana avuga ko ibibazo byihariye bafite aribyo bituma abana babo batabasha kwiga. Ngo n’abarigezemo ntibaritindamo.

Aho akura amafaranga ngo ni mu gutundira abaturanyi umucanga kandi ngo iki kiraka ntigihoraho.

Kutagira ubutaka buhagije bwo guhingaho ngo ni kimwe mu bituma bateza nk’abandi ngo bihaze mu biribwa hanyuma basagurire isoko.

Abagize ikiciro cy’abasigajwe inyuma n’amateka kitwa ‘Abatwa’ bamaze igihe kinini mu mateka y’u Rwanda batagira uruhare runini mu bukungu bw’igihugu bituma badindira mu iterambere.

Ubuyobozi bw’akarere Kanyamagabe bwemera iki kibazo gihari , ariko batangiye kugikurikirana

Umuyobozi w’akarere ka Nyamagabe Bonavanture Uwamahoro avuga ko iriya miryango y’abasigajwe inyuma n’amateka ibayeho nabi, kandi bayisuye bakabiganiraho .

Yagize ati"Kubijyanye n’abacyeneye ubufasha bwihutirwa basenyewe n’imvura tugiye gushaka aho tubakodeshereza cyangwa tubasanire amazu yabo kuko mwabonye ko yangiritse ari menshi kandi n’ubushobozi tubadufite ari bucye.

Naho kubijyanye n’imirire mibi tugigiye gukomeza kwigisha.”

Ibibazo by’imibereho itari myiza ku basigajwe inyuma n’amateka ni bimwe mubikunze kugarukwaho cyane mu nteko ishingamategeko ku buryo Sena y’u Rwanda mu mwaka ushize wa 2018 iherutse kwemeza ko Minisitiri w’Intebe cyangwa undi azohereza mu bagize Guverinoma azayitaba akaza gusobanura icyo Leta izakora mu gihe runaka kizwi,kugira ngo ubuzima bugoye bw’Abasigajwe inyuma n’amateka buzabe amateka mu Rwanda.

Bamwe muri aba bana harimo abafite imyaka 15 y’amavuko ariko ubarebye ku ijisho ushobora kugira ngo bafite imyaka 6 cyangwa 7 y’amavuko
Ruhumuriza Richard /MUHABURA.RW


Tanga igitecyerezo

Amazina
Ubutumwa

1 Comment

nshimyumukiza Xavier - 1 month ago

Yewe!!!,mwiseneza josiane,nagire vuba, da!!ibyo kugwigir
Yabivuze yabibonye,umushinga we,nuterwe inkunga maze afatanye na,reta Yurwanda guhashya kugwingira kwibyo bibondo,kuko,birababaje pe!!!!

Izindi nkuru