Yashyizweho kuri29 February, 2020 | 17:58

RUSIZI : Umukobwa amaze imyaka 8 afungiye mu nzu kubera kugira ubumuga

Umukobwa witwa Speransiya wo mu mudugudu wa Ruguti mu kagari ka Kamanu mu Murenge wa Nyakabuye ho mu karere ka Rusizi amaze hafi imyaka umunani akingiranye mu nzu mu cyumba cya wenyine azira kuba afite ubumuga .

Aya makuru yemezwa n’abaturage batandukanye bo mu mudugudu wa Ruguti bababajwe n’uyu mukobwa Speransiya umaze igihe kingana gutyo atava mu nzu .Ni ikibazo bagarukwaho bashinja uyu muryango w’uyu mwana bavuga ko batamuha agaciro nk’akabandi banyarwanda basanzwe Kandi atariwe wigize gutyo.

Uwitwa Nsabimana Japhet utuye muri uwo mudugudu yabwiye,MUHABURA.RW akarengane uwo mwana agirirwa Kandi ko kuri we yumva bitagakwiye kugenda gutyo kuko nawe yavutse nk’abandi.

Yagize ati: "Nibyo koko uwo mukobwa aba mu nzu nta gusohoka ngo arebe urumuri rwo hanze ndetse ngo anote izuba kimwe n’abandi ahubwo ahora mu nzu akingiranye gusa icyo bamukorera ni ugukingura idirishya gusa ariko ndahamya ndashidikanya ko no kubona atakibona kubera kubura urumuri yibera mu mwijima."

Si Japhet wenyine ugaruka kuri ibyo kuko na Mukansanga Godereva baturanye abigarukaho ahamya ko biriya akorerwa ari akarengana ko bitagakwiye.

Yagize ati: "Uriya ni umuntu si itungo riba mu nzu kuko nufite ubumuga afite uburenganzira nk’ubw’abandi banyarwanda bose kuko nawe yavukiye ku mezi icyenda nk’abandi,ntiyagakwiye kuguma mu nzu gusa kuko ageze hanze nta pfunwe byaba biteye."

Yakomeje avuga ko iyo ubwiye nyina umubyara ikibazo cy’uyu mwana agusanganiza ibitutsi , ibintu afata nkaho umubwiye uko bitagakwiye kugenda ku buryo umwana nawe yitabwaho yumva ko uri kumushinyagurira.

Yagize ati: "Iyo umubwiye ikibazo cy’umwana aragutuka maze akavuga ko atari we wamugize kuriya ko ndetse urusha nyina w’umwana imbabazi aba ashaka kumurya.Ni ibintu tutumva ahubwo ko n’ubuyobozi bwabigiramo uruhare kugirango uwo mwana yitabweho kimwe n’abandi banyarwandakazi."

Ku ruhande rw’ubuyobozi bw’akagari ka Kamanu uyu mwana atuyemo buvuga ko batari babizi ariko ko bagiye gukurikirana kugirango barebe ikibazo gihari ko cyanashakirwa umuti urambye.

Umunyamabanga nshingwabikorwa w’akagari ka Kamanu Bwana Bimenyimana Philbert yagize ati:"Nk’ubuyobozi bw’akagari ka Kamanu ni ubwambere tubyumvise ariko turaje dukurikirane maze tumenye ikibazo gihari nuko cyacyemuka Kandi umwana akagira uburenganzira nk’ubw’abandi."

Uwambaje Naomi ni umukozi w’Akarere ka Rusizi ushinzwe abafite ubumuga ,avugana n’umunyamakuru yavuze ko batari babizi ariko ko bagiye gufatanya n’ubuyobozi bw’umurenge barebe icyo bakora.

Yagize ati: "Nyoherereza amazina ye yombi mu butumwa bugufi maze ndavugisha ubuyobozi bw’umurenge wa Nyakabuye maze turebe uko twamufasha maze ikibazo cye turebe inzira twagiha mu rwego rwo kwita ku buzima bwe."

Ku murongo wa telefoni igendanwa twavuganye n’umukozi w’impuzamashyirahamwe y’abafite ubumuga ku rwego rw’igihugu Bwana Nsengiyumva Jean Damascene maze avuga ko bagiye gukurikirana icyo kibazo.

Yagize ati :"Ntabwo ari ya mvugo yateye ubu ngo "tugiye kubikurikirana"yogeye maze ugasanga ntacyakozwe,njye nkwemereye ko ngiye kubikurikirana Kandi bigacyemuka vuba hamwe n’izindi nzego dukorana bya hafi."

Ni kenshi Inama y’igihugu Y’abafite ubumuga yigisha Kandi ikanakora ubukangurambaga mu baturarwanda ivuga ko umwana ufite ubumuga agomba gufatwa kimwe n’abandi bana kuko nabo bafite uburenganzira kimwe n’abandi niyo mpamvu ibi byose bica mu makoperative kugirango bigishwe Kandi bakangurirwe kubaha no guha agaciro abafite ubumuga kugirango nabo bagire agaciro nk’akabandi banyarwanda n’abanyarwandakazi .Mu Rwanda habarirwa amashyirahamwe y’abafite ubuga asaga ibihumbi icumi ,urubuga batangiramo ibyifuzo n’ibibazo byabo ,ibishoboka bikavugutirwa umuti .

Denis Fabrice Nsengumuremyi MUHABURA.RW


Tanga igitecyerezo

Ibitekerezo


Tanga igitekerezo


6 Comments

Didaçe - 4 March

uwo mwana akurikiranwe ahabwe uburenganzira bwe,kuko siwe wiremye,kandi muzasubireyo mutubwire uko byakemutse

Gapfura - 1 March

Mukomereze aho banyamakuru,gusa iyinkuru irimo amakosa menshi .mubikosore

Hategekimana theodore - 1 March

Bikurikiranwe uwo mwana arenganurwe.ko nta foto yiwe mwashizeho?

Nganabera - 1 March

Birababaje,kandi biteye agahinda.Gusa abobireba bakurikirane,icyokibazo uwomwana yitabweho.

Niyonsaba samuel - 29 February

Mbega umubyeyi mubi Nina aribyo lmana izabimubaza nibikurikiranwe pe kandi namwe mwatanze amakuru lmana ibahe umugisha murakoze

Niyonsaba samuel - 29 February

Mbega umubyeyi mubi Nina aribyo lmana izabimubaza nibikurikiranwe pe kandi namwe mwatanze amakuru lmana ibahe umugisha murakoze

Izindi nkuru