Yashyizweho kuri3 May, 2020 | 10:21

Ikoranabuhanga ryagize uruhare rukomeye mu gutahura abarwayi bashya ba COVID-19 mu Rwanda

Terefoni zigezweho zisanzwe zifasha benshi mu buzima bwa buri munsi, aho abahanga mu by’ikoranabuhanga bakomeje kugaragaza uburyo zirimo gusimbura mudasowa kubera ukwihuta kwazo, ikoranabuhanga zifite, n’uburyo zishobora gukoreshwa ahantu hose.

Minisitiri w’Ubuzima Dr. Ngamije Daniel yavuze ko mu Rwanda hakozwe ibishoboka byose mu gutahura abahuye n’abarwayi b’icyorezo cya Koronavirusi (COVID-19) kugira ngo badacika ubushakashatsi bagakomeza kwanduza abaturage.

Mu buryo bwa mbere bwifashishijwe ni ubwo kuganiriza kinyamwugwa uwatahuweho icyorezo akavuga abo yibuka, ariko ku bo atibuka hakifashishwa izindi nzego zirimo izitanga serivisi z’ikoranabuhanga, iz’umutekano n’izindi.

Minisitiri Dr. Ngamije ati: “Hari n’igihe byabaye ngombwa ko mu bantu bari bagaragayeho ubu burwayi mu tubyiniro tumwe na tumwe twafashe amashusho y’abaciye aho hantu. Iyo bibaye ngombwa bitewe n’umuntu turi gukurikirana ibye dushobora kwifashisha n’izindi nzego zitandukanye tukamenya amakuru ahagije.”

By’umwihariko mu gihe Isi ihanganye n’Icyorezo cya Koronavirusi (COVID-19), u Rwanda rwifashishije ikoranabuhanga rya terefoni mu gushakisha abahuye n’abarwaye icyo cyorezo.

Ikigo k’Igihugu cy’Ubuzima (RBC) gitangaza ko uretse kubaza uwatahuweho COVID-19 abo yibuka bahuye na bo, terefoni ye yifashishwa mu gukurikirana abandi bantu bahuye na we, ndetse n’abandi bahuye n’abo yahuye na bo bagahita baboneka aho baherereye.

Itsinda ryashyiriweho gukurikirana abahuye n’abarwayi rikomeza gukurikirana abahuye n’uwatahuwe, n’abo bahura na bo mu gihe bataragerwaho ngo bajyanwe ahabugenewe bagomba gupimirwa.

Ubuyobozi bwa RBC buvuga ko ubu buryo bwakoze kuko abenshi mu batahuweho icyorezo cya COVID-19 bafite “smart phones” kimwe n’abo bahuye na bo, bituma uburyo bwo kubakurikirana bwihuta cyane.

Ubu buryo bwatoranyijwe mu gukoreshwa kuko bitari byoroshye kwizera gusa amakuru atangwa n’abatahuweho COVID-19.

Umuyobozi Mukuru wa RBC Dr. Nsanzimana Sabin yatangarije The East African ko u Rwanda rukomeje kwifashisha ikoranabuhanga cyane mu gutahura abahuye n’abarwayi ba COVID-19 kandi bikomeje gutanga umusaruro ushimishije.

Yavuze ko gukurikirana abakekwaho COVID-19 mu Gihugu bikiri mu nshingano z’ibanze z’inzego z’ubuzima n’izindi nzego bafatanyije urugamba rwo gukumira ikwirakwizwa ry’icyo cyorezo.

Yagize ati: “Kuri ubu turakoresha ikoranabuhanga mu kohereza abaturage ubutumwa, tugahamagara abantu turebana imbonankubone mu buryo bw’amashusho bibaye ngombwa, kandi haranakoreshwa indege zitagira abapolote (drones) mu gukwiza ubutumwa muri rubanda. Hakomeje gushyirwaho ibisubizo by’ikoranabuhanga bizakomeza gufasha mu kwirinda uko iminsi yicuma.”

Ikoranabuhanga ryanifashishijwe mu gukurikirana imibereho y’abashyirwa mu kato ahabugenewe cyangwa mu mahoteri, hirindwa ko bahava bajya kwanduza abandi.

Amakuru y’ikoranabuhanga yanafashije inzego z’umutekano kumenya amakuruyo y’uduce dutandukanye tutubahirizaga amabwiriza ya Guma Mu Rugo, n’andi mabwiriza yashyiriweho kwirinda ikwirakwizwa rya COVID-19 arimo kubahiriza intera ya metero.

Gutahura abahuye n’abarwaye COVID-19 byizewe kuri 95%

Minisiteri y’Ubuzima irakangurira Abanyarwanda kutirara bibwira ko kuba mu Rwanda hari imirimo imwe n’imwe itangira gukorwa kuri uyu wa Mbere tariki ya 4 Gicurasi, icyorezo cyashize burundu mu Gihugu.

Minisitiri w’Ubuzima Dr. NgamijeDaniel, yavuze ko kugeza ubu Leta y’u Rwanda izi neza aho virusi yaturuka ikaba, ifite ubushobozi bwo gukurikirana 95% by’abahuye n’abarwayi.

Yagize ati: Ku bantu banduye tumenya abo bahuye na bo kuri 95%, hari n’igihe tumenya ko hari umuntu bahuye na we utakiri mu Gihugu kuko uramuhamagara ukumva terefoni ye irasona nk’umuntu uri hanze y’Igihugu. Mu barwayi bose twapimye buri wese twagiye tumukorera dosiye igaragaza abo bahuye nabo, n’abo abo yahuye na bo bahuye na bo, tugakurikirana tukageza ku muntu wa nyuma tubasuzuma kugira ngo hatagira umuntu uducika tutazi amakuru ye.”

Kuba guhera kuri uyu wa Mbere tariki ya 4 Gicurasi 2020, hari imirimo imwe n’imwe isubukurwa ntibivuze ko muri 5% k’abantu bashobora kuba bataratahuwe bizewe ko nta bwandu bwaba burimo, akaba ari na yo mpamvu gupima abantu bizakomeza mu Gihugu hose.

Minisitiri Dr. Ngamije ati: “Ntabwo tuzapima Abanyarwanda miriyoni 12 n’igice, ariko tuzapima abazaba bagarwagaweho ibimenyetso n’abo tuzaba dukekaho kuba barahuye n’abanduye, ubwo bushobozi turabifite. Imibare y’abantu batahurwa bashya ni abo tuzi aho baturuka, tuzi uburyo binjiye mu Gihugu, tuzi abo bahuye na bo, kandi nk’uko bisanzwe umuntu wanduye wese tumushakaho amakuru ahagije, ku buryo tumusuzuma n’abo bahuye na bo tukabafata tukabasuzuma.”

Kugeza ubu mu Rwanda hamaze gupimwa abarenga 33,303, batahuwemo abantu 205 barwaye COVID-19 barimo 120 bamaze kuyikira, na 135 bakirimo kwitabwaho n’abaganga

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru