Yashyizweho kuri22 November, 2019 | 19:35

Ibitaro 20 byahawe imbangukiragutabara zije kunganira izari zihari

Umuryango Imbuto Foundation wahaye Minisiteri y’Ubuzima (MINISANTE) imbangukiragutabara 20, mu rwego rwo kuyunganira hagamijwe guha serivisi nziza abarwayi kuko ngo izihari ari nke ndetse harimo n’izishaje.

Umuhango wo gutanga izo mbangukiragutabara wabaye kuri uyu wa 22 Ugushyingo 2019, MINISANTE ikaba yahise izishyikiriza abayobozi b’ibitaro zagenewe kugira ngo zihite zitangira akazi kuko ngo zari zikenewe cyane, imwe muri zo ikaba ifite agaciro ka miliyoni 54 z’Amafaranga y’u Rwanda.

Twizeyimana Jean de Dieux umuyobozi w’ibitaro bya Kibirizi avuga ko imbangukiragutabara bahawe ije kubafasha gukemura ikibazo bagiraga cyo guhamagarwa n’ibigo nderabuzima icya rimwe bakabura uko babigenza.

Ubusanzwe ibitaro bya Kibirizi bifite ibigo nderabuzima icyenda bisaranganya imbangukiragutabara eshatu.

Ati"Twakoreshaga izishaje ariko urumva ko gukoresha izishaje zishobora gupfa umunota ku munota cyangwa bikaba ngombwa ko haboneka abarwayi ku bigo nderabuzima bigahita bihamagarira icya rimwe bigatuma bimwe bitegereza gato kugira ngo imbangukiragutabara yajyanye umurwayi ibashe kugaruka imujyane".

Umuyobozi mukuru wungirije wa Imbuto Foundation, Umutesi Géraldine, yavuze ko uwo muryango watanze imbangukiragutabara kuko n’ubusanzwe wita ku buzima bw’abaturage.

Agira ati “Icyerekezo cy’igihugu ni uko muri buri kagari haba ikigo cy’ubuzima ariko ntibiragerwaho.Izi mbangukiragutabara rero zizafasha wa muturage uri kure y’ivuriro ry’ibanze cyangwa ibitaro kuhagera byihuse.Ni umusanzu rero twatanze nka Imbuto Foundation, kuko twita ku buzima bw’abaturage muri rusange n’ubw’umubyeyi n’umwana by’umwihariko”.

Akomeza akangurira n’abandi bafatanyabikorwa gutanga umuganda wabo kuko ibitaro bikeneye imbangukiragutabara ari byinshi, cyane ko hari na nyinshi zashaje zikeneye gusimburwa.

Umuyobozi mukuru muri MINISANTE ushinzwe ibikorwa by’ubuvuzi n’ubuzima rusange, Dr. Zuberi Muvunyi, avuga ko nubwo babonye izi mbangukiragutabara hakiri ikibazo cy’uko zikiri nke.

Ati “Dukurikije amavuriro dufite n’imbangukiragutabara dufite nta mahuriro, ziracyari nke cyane kandi n’izihari zirakuze, tugenda tuzisimbura. Imodoka nk’izi rero ni ingenzi kuko iyo umuntu afite ikibazo gikomeye cy’ubuzima, nibura mu isaha imwe yagombye kuba yagejejwe ku rwego rwisumbuye rw’ubuvuzi”.

Ubusanzwe mu mahame y’umuryango mpuzamahanga u Rwanda narwo rugenderaho,ni uko imbangukiragutabara ifasha abantu ibihumbi icumi (10),bityo MINISANTE ivuga ko kugeza ubu izihari ari nke cyane kuko zigera kuri 300 gusa kandi muri zo ngo harimo izishaje zitakimeze neza nk’uko byifuzwa.

Ibitaro byahawe izi mbangukiragutabara birimo ibitaro bya Kibungo, Rutongo, Byumba(Gicumbi), Munini (Nyaruguru), Muhima (Nyarugenge),Butaro (Burera), Kibagabaga (Gasabo), Nemba (Gakenke),Kibirizi (Gisagara),Kabgayi,Mibirizi (Rusizi),Kabaya (Ngororero), Nyagatare, Kibumbwe (Nyamagabe),Murunda (Rutsiro), Kibogora (Nyamasheke), Muhororo (Ngororero), Mugonero (Karongi), Kirinda (Karongi) ndetse n’ibitaro bya Kibuye.

Dr. Muvunyi yasabye abahawe izi mbangukiragutabara kuzifata neza bakirinda kuziha abashoferi bazikoresha impanuka bitwaje ibitotsi kuko iyo zangiritse igihugu nacyo kiba gihombye.

JPEG - 397.4 kb
Umutesi Géraldine (iburyo) na Dr Zuberi Muvunyi (hagati) batanga ku mugaragaro imbangukiragutabara 20

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru