Yashyizweho kuri15 March, 2019 | 09:36

Gasabo:Ucyekwaho ubujura yarashwe agerageza gusimbuka imodoka ahita yitaba Imana

Umugabo witwa Niyomugabo Eric w’imyaka 30 y’amavuko yarashwe n’inzego z’umutekano zari ku irondo bimuviramo urupfu.

Byabereye mu Karere ka Gasabo mu Murenge wa Gisozi mu Kagari ka Ruhango, mu mudugudu wa Amarembo mu ma saa munani mu ijoro rishyira ku wa kane tariki 14 Werurwe 2019.

Umuvugizi wa Polisi mu Mujyi wa Kigali, CIP Marie Goretti Umutesi, yabwiye umunyamakuru ko Niyomugabo yafashwe avuye gutobora inzu, anamena ikirahure cy’idirishya ry’inzu y’uwitwa Uwizeyimana Emmanuel w’imyaka 23 y’amavuko. Ngo yafashwe amaze gukuramo imiguru ine y’inkweto.

Uyu nyakwigendera Niyomugabo uvugwaho ubujura ngo yarwanye n’uwo yari yibye aramukomeretsa, uwibwe atabaza abasirikari bari ku irondo, baramutabara bafata Niyomugabo. Ubwo yari ajyanywe kuri Sitasiyo ya Polisi, ngo yasimbutse imodoka ahita araswa.

Abaturage bemeza ko Niyomugabo yari asanzwe ari umujura wibaga ahantu hatandukanye aturutse mu Murenge wa Kacyiru, Akagari ka Kamutwa, Umudugudu wa Agasaro. Umurambo wahise ujyanwa ku bitaro bya Kacyiru.

Muri uwo Murenge wa Gisozi mu Kagari ka Ruhango mu Karere ka Gasabo kandi mu gitondo cyo ku wa kane tariki 14 Werurwe 2019 habonetse undi murambo w’umusore bitaga Kapiteni bivugwa ko yitabye Imana biturutse ku bushyamirane yagiranye n’undi musore mugenzi we.

Niyomugabo Albert/MUHABURA.RW


Tanga igitecyerezo

Amazina
Ubutumwa

Izindi nkuru