Yashyizweho kuri1 May, 2020 | 00:35

COVID-19: Hatahuwe abarwayi 18 bashya mu Rwanda, hakize 6

Minisiteri y’Ubuzima yatangaje ko uyu wa Gatatu tariki 29 Mata 2020, habonetse abarwayi 18 bashya ba Koronavirusi (COVID-19) batahuwe mu bipimo 1,140 byafashwe mu masaha 24 ashize, bituma abamaze kurwara bose bagera kuri 243.

Abarwayi bakize bageze kuri 104, barimo batandatu bakize uyu munsi, na ho abakirimo kwitabwaho n’abaganga ni 139. Ubwiyongere bukomeje guturuka mu batwara amakamyo yambukiranya imipaka n’abo bakorana, abatahuwe bose barimo kuvurirwa ahantu habugenewe ndetse bari no koroherwa.

Minisiteri y’Ubuzima irasaba abaturarwanda gukurikiza amabwiriza y’ubuzima yashyizweho na Leta cyane cyane hitabwa ku gukaraba intoki kenshi, kuguma mu rugo no kwambara agapfukamunwa ku bantu bavuye mu rugo ndetse n’abahuye n’abandi benshi, nko mu nsisiro ahatuye imiryango myinshi.

Minisiteri y’Ubuzima ikomeje kwihanangiriza buri wese, isaba kubahriza amabwiriza yo kwirinda, kudahisha cyangwa kwirinda kwanga gutanga amakuru no kudahisha ibimenyetso bya COVID-19, kuko ari ugushyira ubuzima bw’abandi mu kaga ndetse uzafatwa yakoze ibyo azahanwa n’amategeko.

Imibare yatangajwe uyu munsi ku rwego mpuzamahanga yerekana ko abamaze kwandura COVID-19 ku Isi bangana na 3,295,880 barimo abayikize 1,034,773 na ho abamaze guhitanwa na yo bakaba 233,411.

Denis Fabrice Nsengumuremyi/ MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru