Yashyizweho kuri9 May, 2020 | 20:28

COVID-19: Abarwayi 7 bashya mu Rwanda, hakize 140

Minisiteri y’Ubuzima yatangaje ko kuri uyu wa Gatandatu tariki ya 9 Gicurasi 2020, habonetse abarwayi bashya 7 ba Koronavirusi (COVID-19) batahuwe mu bipimo 1,198 byafashwe mu masaha 24 ashize, abamaze kurwara bose bakaba bageze kuri 280.

Abarwayi babamaze gukira mu Rwanda bageze ku 140 barimo 4 bakize uyu munsi, mu gihe abakirimo kwitabwaho n’abaganga na bo babaye 140.

Minisiteri y’Ubuzima ivuga ko abarwayi ba COVID-19 bamaze gutahurwa babonetse mu bipimo 41,385 bimaze gufatwa kugeza ubu. Hakomeje gukorwa isuzuma mu gihugu, ndetse hakomeje gutahurwa ababa barahuye n’abarwayi bashya.

Mu gihe guhera ku wa Mbere tariki ya 04 Gicurasi 2020 imirimo imwe n’imwe y’ubuzima busanzwe yasubukuwe, Abaturarwanda barasabwa gukomeza kubahiriza amabwiriza arimo kubahiriza intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Imibare yatangajwe uyu munsi ku rwego mpuzamahanga yerekana ko muri Afurika abamaze kwandura COVID-19 ari 58,918 barimo 20,337 bakize n’abandi 2,172 bahitanywe na cyo. Abamaze kwandura ku Isi bangana na 4,067,098 barimo abakize 1,415,396 n’abapfuye 278,447. Bivuze ko abakirimo kwitabwaho n’abaganga ku Isi bangana na 2,373,255.

Denis Fabrice Nsengumuremyi /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru