Yashyizweho kuri4 February, 2020 | 11:10

Abari bizeye urukingo rwa SIDA ikizere cyashize kubera ibyabonetse mu igerageza

Ibyavuye mu igerageza ry’urukingo rwatuma abantu batandura virus itera SIDA byatumye icyizere cyuko rwaboneka kiyoyoka.

Ikigo cya leta y’Amerika gishinzwe ubuzima cyahagaritse igerageza ry’urukingo cyise HVTN 702 nyuma y’igeragezwa ryarwo ryakorerwaga muri Afurika y’Epfo.

Abantu 5,000 barutewe basanze rutabasha kubarinda kwandura iyi virus.

Abahanga mu by’ubuzima batangaje ko ibi ari "urucantege" ariko bidahagaritse ibikorwa byo gushakisha uru rukingo.

Uru rukingo ntabwo ruba rufite virus ya HIV bityo nta mpungenge rwari ruteje ko rwayanduza umuntu.

Urwo rukingo ni bwoko ki?

Uru rukingo rwaterwaga mu rushinge, rwari rwagaragaje ikigero runaka cyo kurinda iyi virus igihe rwageragejwe bwa mbere mu bitaro muri Thailand.

Hari ubwoko bwinshi bw’izi nkingo za HIV bwakomeje kugeragezwa cyane muri Afurika y’Epfo, igihugu kiri mu bifite ubwandu buri hejuru ku isi.

Hari hari icyizere cyinshi ko uru rukingo HVTN 702 ruzakora rukaba ari rwo ruzakwirakwizwa ku isi.

Byagenze bite mu igerageza?

Abantu batandukanye batewe uru rukingo ku bushake bwabo.

Dr Anthony Fauci, wo muri kiriya kigo cy’ubuzima, avuga ko bari bizeye ko uru rukingo ruzakora. Ati: "Ariko birababaje ko twasanze rudakora".

Bamwe mu baruhawe baranze bandura HIV.

Dr Fauci ati: "Ubushakashatsi burakomeje mu gushaka urukingo rwizewe, kandi birashoboka ko rwagerwaho".

Abahanga bavuga ko hari icyizere ko andi moko y’inkingo za HIV ari gutegurwa ashobora gukora.

Iyi virus yahagarikwa gute?

Imiti yitwa pre-exposure prophylaxis (Prep) irakora mu kurinda umuntu kwandura HIV, ariko aho itandukaniye n’urukingo ni uko igomba gufatwa buri gihe, yewe buri munsi.

Mu bihugu aho iyo miti itaboneka, uburyo bwonyine bwo kwirinda ni ugukoresha imibonano mpuzabitsina agakingirizo, cyangwa se kwifata.

Imiti igezweho igabanya ubukana bwa SIDA yagaragaje ko yongera cyane icyizere cy’abayanduye kutayirwara.

Iyi miti igeze ku kigero cyo kugabanya iyi virus mu mubiri w’umuntu wanduye kugeze ubwo adashobora kuyanduza abandi.

Niyomugabo Albert \Muhabura.rw


Tanga igitecyerezo

Ibitekerezo


Tanga igitekerezo


Izindi nkuru