Yashyizweho kuri26 April, 2020 | 09:12

Abanyamerika bakomeje gushegeshwa n’iki cyorezo cya mbere kibi cyane isi

Abantu barenga 200,000 ku isi bamaze kwicwa n’icyorezo cya coronavirus naho abarenga 800,000 bamaze kugikira, nkuko imibare mishya ya Kaminuza ya Johns Hopkins yo muri Amerika ibigaragaza.

Ku isi abarenga miliyoni 2,8 bamaze kwemezwa ko banduye coronavirus, nkuko iyo mibare ikomeza ibigaragaza.

Iyi ntambwe nshya iteye impungenge itewe mu gihe abo yishe muri Amerika barenze 500,000, Abanyamerika bakaba bakomeje gushegeshwa n’iki cyorezo cya mbere kibi cyane isi ihuye nacyo.

Ku itariki ya 11 y’ukwezi kwa mbere uyu mwaka nibwo igitangazamakuru cya leta y’Ubushinwa cyatangaje umuntu wa mbere uzwi ko yishwe na coronavirus.

Kuva icyo gihe, ibihugu n’uturere birenga 210 bimaze gutangaza abantu bishwe na Covid-19, indwara yo mu myanya y’ubuhumekero iterwa n’ubu bwoko bushya bwa coronavirus.

Kugeza ubu ibihugu bitanu bimaze gutangaza buri kimwe umubare urenga 20,000 w’abishwe na coronavirus, nubwo uburyo buri gihugu kibara abo yishe butandukanye cyane.

Amerika, Ubutaliyani na Espagne ni byo byagaragaje umubare uri hejuru cyane w’abo yishe.

’Intambwe ibabaje kandi iteye ubwoba’ mu Bwongereza

Urwego rw’ubuzima rw’Ubwongereza ejo ku wa gatandatu rwatangaje ko ubu abantu barenga 20,000 bamaze kwicwa na coronavirus mu bitaro byo muri iki gihugu.

Priti Patel, umunyamabanga wa leta ushinzwe ubutegetsi bw’igihugu, yavuze ko uwo mubare w’abo imaze kwica mu Bwongereza ari "intambwe ibabaje kandi iteye ubwoba".

Yongeyeho ko "igihugu cyose kiri mu kababaro".

Kubera ko umubare w’abishwe na coronavirus mu Bwongereza utarimo abapfira mu ngo zabo cyangwa mu nzu zita ku bageze mu zabukuru, umubare w’ukuri w’abo imaze kwica ugomba kuba urenze aho.

Ubufaransa, igihugu kitabarira mu mubare w’abo yishe abantu baba mu nzu zo kubitabo nk’abageze mu zabukuru, ejo ku wa gatandatu cyatangaje ko umubare w’abo yishe wiyongereyeho 369.

Kuva mu ntangiriro y’ukwezi gushize kwa gatatu, umubare w’abo yishe mu Bufaransa umaze kugera ku 22,648. Ariko abategetsi bo mu rwego rw’ubuvuzi bavuga ko abapfira mu bitaro bari kugabanuka.

Ndetse n’umubare w’indembe wongeye kugabanuka ku munsi wa 17 wikurikiranya.

Kongera kwiyongera mu bice bimwe na bimwe

Muri iki cyumweru, umukuru w’ishami ry’umuryago w’abibumbye ryita ku buzima (OMS/WHO) yavuze ko Covid-19 iri kwiyongera muri Afurika, Uburayi bw’uburasirazuba, Amerika yo hagati n’iy’amajyepfo.

Dr Tedros Adhanom Ghebreyesus yavuze ko nubwo iki cyorezo kigaragara ko ahanini kiri guhama hamwe cyangwa kugabanuka mu Burayi bw’uburengerazuba, mu bihugu bimwe ho ari bwo kigitangira.

Yagize ati: "Ndetse no muri bimwe (ibihugu) byibasiwe mu ntangiriro y’iki cyorezo kirimo kongera kwiyongera".

Kimwe muri byo ni Singapour, ku ikubitiro cyari cyashimagijwe kubera uburyo cyashoboye guhagarika iyi virusi.

Ariko kuva icyo gihe, Singapour ikomeje kwiyongeramo ubwandu bushya bukomoka aho inganda zikorera ndetse no kuryama mu bucucike aho abakozi bo mu nganda barara.

Ahandi ku mugabane w’Aziya, abategetsi bo mu Bushinwa ejo ku wa gatandatu nta bishwe na coronavirus batangaje - ukaba ubaye umunsi wa 10 wikurikiranya nta muntu mushya yishe muri icyo gihugu.

Ndetse no muri Koreya y’epfo, umunsi w’ejo ku wa gatandatu wabaye uwa kabiri hatabonetse umuntu mushya wishwe na coronavirus.

Kugeza ubu Minisiteri y’Ubuzima mu Rwanda ivuga ko abantu banduye uko ari 183, barimo bakize 88 nta wapfue uragaragara mu Rwanda.

Minisante kandi ivuga ko Hari ubwiyongere bw’imibare y’abanduye COVID-19 mu batwara amakamyo yambukiranya imipaka n’abo bakorana.’

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru