Yashyizweho kuri26 February, 2017 | 12:09

Abantu 30 barimo n’umugore umwe, bafashwe na Polisi bakora ibyaha

Abantu bagera kuri 30 bafunzwe na Polisi y’u Rwanda aho abenshi muri bo bakurikiranyweho amakosa yo mu muhanda no kugerageza gutanga ruswa kugira ngo babone impushya zo gutwara ibinyabiziga.

Aba bantu barimo n’umugore umwe, bafatiwe mu turere dutandukanye tw’iki gihugu bakora ibyaha bitandukanye bakagerageza guha ruswa abapolisi babaga babafashe kugira ngo babareke.

Muri abo harimo abashoferi b’imodoka bafatirwaga mu makosa anyuranye yo mu muhanda bagashaka gupfumbatisha ruswa abapolisi bo mu muhanda kugira ngo babarekure, aho kuyemera bagahita babata muri yombi.

Abantu bagera kuri 30 bafunzwe na Polisi y’u Rwanda
Ruswa ihanitse yatanzwe n’umwe muri abo bantu ingana n’amafaranga y’u Rwanda ibihumbi 200 mu gihe iya make ari 2000 Frw.

Umuvugizi wa Polisi y’u Rwanda, ACP Theos Badege, yabwiye itangazamakuru ko aba bantu bose bagiye bakoresha amayeri anyuranye mu gutanga ruswa, harimo kuyanyuza kuri telefone ngendanwa z’abapolisi (mobile money), kwifashisha abandi bantu bazwi, gutanga amafaranga nk’impano, intwererano cyangwa amadeni bahimbye.

ACP Badege kandi yavuze ko iki gikorwa cyo gufata abakekwaho ruswa atari ubwa mbere kibaye kandi ko kizakomeza mu rwego rwo gukomeza urugamba rwo guca burundu ruswa.

Polisi y’u Rwanda igaragaza ko mu mwaka ushize abashoferi barenga 200 batawe muri yombi bakekwaho ibyaha bishingiye kuri ruswa.

Inama y’Abaminisitiri iherutse guterana ku wa 3 Gashyantare 2017, iyobowe na Perezida wa Repubulika Paul Kagame, yirukanye burundu abapolisi 198 barimo abakuru n’abato bafatiwe mu makosa atandukanye arimo na ruswa.

Yanditswe na Ubwanditsi/Muhabura.rw


Tanga igitecyerezo

Amazina
Ubutumwa

Izindi nkuru