Yashyizweho kuri28 May, 2019 | 16:00

Urukiko rwategetse ko Nsabimana Calixte Sankara afungwa by’agateganyo iminsi 30

Icyemezo cy’urukiko rw’ibanze rwa Gasabo ku ifungwa n’ifungurwa ry’agateganyo rya Nsabimana Callixte uzwi nka Sankara ngo ni uko uyu mugabo waburanye bwa mbere yiyemerera ibyaha byose ashinzwa, agomba kuzajya aburana afunze.

Kuri uyu wa Kabiri urubanza rwasomwe uregwa adahari ariko ubushinjacyaha bwo bwari buhagarariwe.

Umucamanza yatangiye asubiramo ibyaha byose Nsabimana aregwa uko ari 16, byiganjemo iby’iterabwoba anavuga ko ibyo byaha byose Nsabimana yabyemeye.

Mu nshamake umucamanza yasubiyemo uko ubushinjacyaha bwaketseho kandi bugashinja Nsabimana ibyo byaha ndetse n’uburyo Nsabimana n’abo bari bafatanyije bashinze amashyaka akaza kwihuriza hamwe kugira ngo arwanye Leta y’u Rwanda.

Umucamanza yagarutse kandi ku byaha ubushinjacyaha bwareze Nsabimana by’ibitero umutwe wa FLN yari abereye umuvugizi wagabye mu turere twa Nyaruguru na Nyamagabe mu ntara y’Amajyepfo.

Bityo ngo urukiko rwasanze impamvu ubushinjacyaha bwagaragaje zikomeye zatuma uregwa akekwaho ibyaha, rusanga zifatika.

Ati "Sankara ubwe na we arabyemera. Kuba abyemera, hakaba hari abantu bamushinja, hari amavidewo agaragara uburyo yigambye, rurasanga ari impamvu zikomeye zituma akurikiranwaho ibyaha".

Kuba Nsabimana yakurikiranwa afunze by’agateganyo, umucamanza yavuze ko urukiko rurasanga hari impamvu zikomeye kandi zidashidikanywaho zituma uregwa akekwaho ibyaha, hakaba hari impungenge ko aramutse arekuwe ashobora gutoroka akaba yasubira mu ishyamba, kandi hakaba hari impungenge ko aramutse arekuwe yakomeza ubufatanye n’imitwe bakoranaga ikimutekereza nk’umuyoboke ukomeye wayo.

Umucamanza yavuze ko n’ubwo Nsabimana yemera ibyaha akanabisabira imbabazi, mu gutaha kwe atatashye ku bushake kuko yafashwe, hakaba hari impungenge ko aramutse arekuwe ashobora gusubirayo.

Nyuma y’ibyo byose urukiko rwategetse ko uregwa ariwe Nsabimana Calixte Sankara afungwa by’agateganyo mu gihe cy’ukwezi, mu gihe iperereza rikomeza guhabwa umwanya rigakomeza ryisanzuye.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


1 Comment

BYUKUSENGE VESTINE - 2 months ago

nsabimana azahanirwe ibyaha yakoze atesha umutwe abanyarwanda murakoze

Izindi nkuru