Yashyizweho kuri6 November, 2018 | 15:51

Urubanza rw’abanyekongo mu nkambi ya kiziba rwakomeje umutekano wakajijwe bikomeye

Itsinda ry’impunzi z’Abanyekongo 60 rigabanyijemo andi matsinda abiri ryagejejwe mu rukiko rwisumbuye rwa Korongi baregwa guteza imidugararo no gusuzugura amategeko y’igihugu cyazakiriye.

Ibi birego bifitanye isano n’imvururu zabaye mu nkambi ya Kiziba no ku cyicaro cy’ishami ry’umuryango w’abibumbye ryita ku mpunzi, HCR, mu mujyi wa Karongi mu burengerazuba bw’u Rwanda.

Urukiko rwa Karongi rwari rwazengurukijwe abapolisi benshi bitwaje intwaro, bigaragara ko habaye ikintu kidasanzwe.Abaregwa bakabakaba 60 binjiye mu rukiko bambaye imyenda y’iroza, babiri baziritse mu ipingu rimwe.

Bose baregwa ibyaha bibiri birimo guteza imidugararo no gusuzugura amategeko y’igihugu cyabakiriye.

Abaregwa bagabanyijemo amatisinda

Aba baregwa bagabanyijwe mu matsinda abiri agizwe n’itsinda rya mbere ry’abantu 24 ariko babiri ntibagaragaye mu rukiko.

Gusa habaye imbogamizi zo kuburana kuri iritsinda kuko ubushinjacyaha bwavuze ko abatabonetse mu rukiko bwababuriye irengero, busaba ko bahamagazwa nk’abari ahantu hatazwi, bazakomeza kubura bakazaburanishwa badahari.

Uku kubura kwa bamwe mu baregwa kwakuruye impaka ndende mu rukiko,kuko abunganira abaregwa basabye ibisobanuro ku buryo aba babuze, igihe baburiye n’icyo ubushinjacyaha bwakoze bumaze kubabura.

Nta byinshi byasobanuwe n’ubushinjacyaha kuri iki kibazo, uretse kuvuga ko batabonetse mu nkambi ubwo bari bagiye gutabwa muri yombi.

Gilbert Ndayambaje na Sebaziga Sophonie Abanyamategeko bunganira abaregwa, basabye ko urubanza rwakomeza hakaburanishwa abageze mu rukiko, ababuze bakazahabwa igihe cyabo mu gihe baba babonetse.

Kuri iki cyifuzo cyo kubaburanisha ukubiri nticyashyigikiwe n’umucamanza aho we yemeje ko agiye kubahamagaza ahatazwi, abaregwa bakazagaruka mu rukiko nyuma y’ukwezi.

Ku birebana n’Itsinda rya kabiri ryo ryari rigizwe n’abantu 33,byabanje kugorana ko batangira kuburanishwa kuko umucamanza yavuze ko batashoboye guhuzwa n’ababunganira mu buryo bushya bw’ikoranabuhanga rikoreshwa mu manza hano mu gihugu.

Nyuma y’uko ikibazo cyari kivuye mu nzira, umucamanza yavuze ko iri tsinda rigomba kuburanira mu muhezo kuko abaregwa barimo abana.

Aba baregwa bakabakaba 60 batangiye gutabwa muri yombi mu ntangiro z’uyu mwaka.Ifatwa ryabo ryakurikiye ubushyamirane bwabaye hagati ya zimwe mu mpunzi n’igipolisi.

Izi mpunzi zari zakambitse ku cyicaro cya HCR zisaba kongererwa ibiribwa zihabwa bitashoboka zikemererwa gusubira mu burasirazuba bwa Kongo aho zikomoka.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru