Yashyizweho kuri31 May, 2019 | 14:17

Nyuma yo kwamaganwa na BNR,Umuyobozi wa Supermarketings Global Ltd yatawe muri yombi

Umuyobozi wa Supermarketings Global Ltd ikora ubucuruzi bw’amafaranga burimo uburiganya (Cripto-Currency scam) yatawe muri yombi n’Urwego rw’Igihugu rw’Ubugenzacyaha (RIB).

RIB ivuga ko ubu bucuruzi butandukanye n’ubwo yasabiye ibyangombwa mu kigo cy’igihugu cy’iterambere (RDB).

Urupapuro rugaragaza iyandikwa ry’iyi kompanyi ya Supermarketings Global Ltd muri RDB, rugaragaza ko abanyamigabane bayo ari uwitwa Nsengiyumva Jean Bosco na Uwizeyimana Israel.

Mu byo yagombaga gukora harimo ibikorwa by’ubufasha mu bijyanye n’uburezi, bitandukanye n’ibyo yakoraga by’ishoramari n’ubucuruzi bw’amafaranga.

RIB yanditse kuri Twitter ko iperereza rikomeje kugira ngo n’abandi bose bari mu bucuruzi nk’ubu butemewe bakurikiranwe, isaba abaturarwanda kwirinda ababashora mu bucuruzi bugamije kubambura imitungo yabo bababeshya inyungu nyinshi mu gihe gito.

Kuri uyu wa Kane Banki Nkuru y’u Rwanda (BNR) yaburiye abanyarwanda n’abaturarwanda kwirinda gukorana n’abantu cyangwa ibigo bitabyemerewe byizeza indonke y’amafaranga abantu babigana hashingiwe ku ngano y’amafaranga yabikijwe, ibicuruzwa cyangwa serivisi byaguzwe n’umubare w’abakiriya babyitabiriye.

Ibigo nka Supermarketings Global Ltd, 3 Friends System, Group Ltd, Onecoin cyangwa Kwakoo (OnyxCoin) ni bimwe mu bigo BNR yatunze urutoki ko bihamagarira abantu gukora iryo shoramari ry’amafaranga ritemewe.

BNR iti “Nyuma y’ibibazo biterwa n’iryo shoramari ry’amafaranga ritemewe nk’uko ryasobanuwe, Banki Nkuru y’u Rwanda, iributsa abanyarwanda bose n’abaturarwanda muri rusange ko ubwo buryo butemewe muri Repubulika y’u Rwanda kandi abaryitabira bafite ingorane zikomeye zo kubura amafaranga yabo bazaba bashoyemo”.

Yashimangiye ko nta bufasha ubwo ari bwo bwose izagenera umuntu ushora amafaranga ye mu bikorwa by’iryo shoramari ry’amafaranga ritemewe cyangwa irindi bifitanye isano.

MUHABURA.RW


Tanga igitecyerezo

Amazina
Ubutumwa

2 Comments

ndagijimana jp - 1 week ago

Kukise mutatanga ubufasha ngwabaturage babone utwabo kandi mufite umunyacyaha nonese koyahawe icyangomba ntibakore followup ngobarebeko ibyoyatse bijyanye nibyakora? Ngembona mukwiye kurenganura umuturage kuko ariwe mureberera

john Chrisos - 2 weeks ago

none se ubwo ko twari tumaze gushoramo ayacu ubwo tubihombeyemo uwo munyamitwe mumugunge ariko dusubizwe ayacu

Izindi nkuru