Yashyizweho kuri27 February, 2019 | 08:51

Umugore n’umugabo batawe muri yombi bacyekwaho ubucuruzi no gukwirakwiza urumogi

Ku gicamunsi cyo kuri uyu wa kabiri tariki 26 Gashyantare, Polisi y’u Rwanda yeretse itangazamakuru umugabo n’umugore bakekwaho gucuruza urumogi bakanarukwirakwiza mu bantu batandukanye.

Abafashwe ni uwitwa Uwitonze Emmanuel w’imyaka 34 y’amavuko na Nyiramahingura Vestine w’imyaka 40 y’amavuko, aba bombi bakaba barafatiwe mu Ntara y’Iburasirazuba bafite ibiro birenga 36 by’urumogi.

Uwitonze yafatiwe mu murenge wa Kigabiro mu karere ka Rwamagana ku itariki 24 Gashyantare, ubwo yarahamagawe n’uwo yarasanzwe aruzanira amubwiye ngo abe amuzaniye ibiro 10 muri 25 yagombaga kumushyira. Mugihe Nyiramahingura we yafashwe mu gitondo cyo kuri uyu wa kabiri mu murenge wa Mukarange mu karere ka Kayonza, aho yari arimo ahinga akaba ari naho yaruhishaga.

Uwitonze Emmanuel ufite umugore n’abana babiri avuga ko bwari ubwa kabiri yishoye muri ubu bucuruzi butemewe ariko ngo uwabumwigishije ni uwo yarushyiraga kuko ngo yari asanzwe ariwo murimo we.

Ati “Uwo muntu yari asanzwe abikora naho njyewe bwari ubwa kabiri ndanguye, uwo muntu niwe wanyigishije. Ndasaba imbabazi kubera ko ikosa nakoze ntabwo nari nabanje kubitekerezaho neza”.

Yakomeje agira ati “Icyo nabwira umuntu uwo ariwe wese wishora mu biyobyabwenge ni uko nk’ubu nanjye nari maze gushoramo ibihumbi 170Frw, kandi ntabwo wacuruza kabiri bataragufata ngo bagufunge na ya mafaranga abe apfuye ubusa.”

Naho mugenzi we Nyiramahingura Vestine ufite abana batandatu, amaze amezi asaga atatu ari muri ibi bikorwa yafashwe afite ibiro bitanu avuga ko ari umugabo wo mu karere ka Kirehe wajyaga aruzana ku rubitsa iwe akamusigira ibihumbi bitanu by’agashimwe.

Nyiramahingura ati “Hari umugabo bita ‘Viye’, kubera ko ntuye ku muhanda yajyaga aza nkamubikira urwo rumogi akampa ibihumbi bitanu. Narumubikiraga mu murima hari ahantu nagendaga ngacukura nkarutaba, yazana abakiliya bakarutaburura.”

Umuvugizi wa Polisi y’u Rwanda , Commissioner of Police (CP) John Bosco Kabera yavuze ko imikoranire myiza hagati ya Polisi, abaturage n’izindi nzego mu gufata abacuruza ibiyobyabwenge ikomeje gutanga umusaruro.

Yagize ati” Hari uburyo butatu budufasha kubafata; ubwa mbere n’abantu ku giti cyabo bakorana na Polisi bayiha amakuru, ubwa kabiri n’inzego z’ibanze ziba zizi ahantu babona abantu banywa ibiyobyabwenge bakatubwira twabafata bakabyemera, ubwa gatutu rero ni amakuru duhabwa n’aba tuba twafashe kuko iyo tubafashe batubwira uburyo babigenzaga Polisi ikarushaho kubikurikirana neza.”

CP Kabera akomeza avuga ko Polisi ikomeje ubukangurambaga bwo kurwanya no gukumira ibiyobyabwenge ifatanyije n’inzego bireba nka Minisiteri y’ubuzima, iy’urubyiruko, urubyiruko muri rusange, amatsinda(Clubs) atandukanye abirwanya hirya no hino mu mirenge ndetse no mu bigo by’amashuri.

Asoza avuga ko ishami rya Polisi rishinzwe kurwanya ibiyobyabwenge rigikurikirana n’abandi bakekwa, akagira inama abakishora mu bucuruzi bw’ibiyobyabwenge kubireka kuko ufashwe bimutera igihombo bityo umuryango we ukadindira mu iterambere nawe agahabwa ibihano biremereye birimo n’igifungo cya burundu.

Kuri ubu Uwitonze na Nyiramahingura bashyikirijwe urwego rw’igihugu rw’ubugenzacyaha (RIB) Sitasiyo ya Kicukiro kugirango hakorwe iperereza kubyaha bakekwaho.

Itegeko riteganya ibyaha n’ibihano muri rusange mu ngingo yaryo ya 263 riteganya ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha

Iyo abihamijwe n’urukiko ahanishwa igifungo kuva ku myaka irindwi(7) kugeza ku gifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru