Yashyizweho kuri29 July, 2019 | 13:58

Kigali:Umushoferi yakoze impanuka ubwo yahungaga polisi imodoka ibirinduka mu muferege

Umugabo wari utwaye imodoka ya Toyota RAC 785 B, yakoze impanuka ikomeye ahunga Polisi yari imukurikiye nyuma yo kumenya amakuru y’uko ashobora kuba atwaye magendu y’amabaro y’imyenda.kuko yari imaze kumenya amakuru y’uko atwaye magendu.

Kuri uyu wa mbere tariki 29 Nyakanga 2019 ahagana saa yine z’igitondo, uyu mugabo bivugwa ko yari akuye magendu y’amabaro atanu y’imyenda muri Nyabugogo agana ku Kinamba cya Muhima.

Polisi ikorera ku Kinamba cya Muhima imaze kumenya amakuru y’uko atwaye magendu, yamuhagaritse yanga guhagarara , ahubwo yongera umuvuduko ahunga, Polisi iramukurikira.

Polisi yakomeje kumukurikira ageze mu ikorosi rikata ku ruganda rwa UTEXRWA, rigana Nyarutarama ngo byamunaniye kurikata kubera umuvuduko munini yari afite imodoka ihita ibirinduka igwa mu muferege .

Iyi modoka isanzwe ikora akazi ko gutwara abagenzi (Taxi voiture) yahise ikurwa muri uwo muferege mu gihe uwari uyitwaye, utagize icyo aba yahise ajyanwa kuri sitasiyo ya Polisi ya Kacyiru.

Uyu mugabo ukekwaho gutwara magendu we yahakanye ko ari magendu avuga ko ibyo yari atwaye byasoze, ahubwo avuga ko ari RURA yamuteje Polisi kuko hari ibyangombwa atujuje bimwemerera gukora akazi ko gutwara abagenzi.

Ikigo cy’Igihugu gishinzwe Imisoro n’Amahoro (RRA) ku wa kane tariki 25 Nyakanga 2019 cyasohoye itangazo rivuga ko mu rwego rwo kurwanya no gukumira ibikorwa bibi bya magendu ikinyabiziga kizafatwa gitwaye ibicuruzwa mu buryo bwa magendu n’ibindi byose bitwawe mu buryo butemewe n’amategeko, ibyo bicuruzwa n’ikinyabiziga kibitwaye bizafatirwa burundu kandi bitezwe cyamunara hakurikijwe amategeko abigenga.

Iryo tangazo kandi rivuga ko by’umwihariko, umushoferi w’icyo kinyabiziga azajya acibwa ihazabu ingana n’ibihumbi bitanu by’amadolari ya Amerika, ni ukuvuga abarirwa muri miliyoni enye n’igice z’amafaranga y’u Rwanda.

Iryo tangazo rinavuga ko nyiri ibicuruzwa n’umushoferi bazajya bakurikiranwa mu nkiko kubera ibyo byaha bya magendu.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe