Yashyizweho kuri22 December, 2018 | 08:36

Ubusabe bw’umuryango wa Maj Ntuyahaga ntacyo butanze none birangiye ageze mu Rwanda

Maj Ntuyahaga Bernard wahamijwe uruhare mu rupfu rw’abasirikare 10 b’Ababiligi barindaga Uwiringiyimana Agathe Minisitiri w’Intebe, yagejejwe mu Rwanda ku mugoroba wo kuri uyu wa 21 Ukuboza 2018.

Nyuma y’uko igihugu cy’Ububiligi gitangarije ko kitagicyeneye uyu mugabo wa gihekuye ku butaka bwacyo,umuryango we waratakambye ngo abe yahabwa uburenganzira bwo kuwusanga muri Denimark kubana nawo dore ko ariho uri ariko biza kwanga.

Umukobwa we, Muhorakeye Bernadette aganira na BBC yavuze ko basabye Denimark ko yakakira umubyeyi we ibasubiza ko ntacyo yabikoraho kuko yari akimeze nk’imfungwa mu Bubiligi.

Maj Ntuyahaga yakiriwe nk’Umunyarwanda wahamijwe ibyaha ariko akarangiza ibihano bye.Yageze ku Kibuga Mpuzamahanga cy’Indege cya Kigali i Kanombe ari kumwe n’abantu bavanye mu Bubiligi.

Umuyobozi wa Komisiyo yo gusezerera no gusubiza mu buzima busanzwe abari abasirikare, Mukantabana Séraphine, yatangaje ko Maj Ntuyahaga yageze mu gihugu cye nk’uwahoze ari umusirikare.

Yagize ati “Yaje nk’uwahoze ari umusirikare, icyo azakora namara kuruhuka ni ukujya i Mutobo, agafashwa gusubira mu buzima busanzwe mu gihe cy’amezi atatu. Twamwakiriye nk’uwahoze mu gisirikare.”

Maj Ntuyahaga yageze mu Rwanda nyuma y’amezi atandatu arangije igifungo cy’imyaka 20 yakatiwe n’inkiko zo mu Bubiligi.

Muri Kamena 1998 nibwo Ntuyahaga yishyikirije Urukiko Mpuzamahanga Mpanabyaha Rwashyiriweho u Rwanda (ICTR) i Arusha, akurikiranyweho ibyaha bya Jenoside n’ibyibasiye inyokomuntu, ariko ku wa 18 Werurwe 1999 rutangaza ko rutakimukurikiranye.

Umunsi yarekuweho Tanzania yahise imuta muri yombi imushinja kwinjira ku butaka bwayo binyuranyije n’amategeko.

U Rwanda rwasabaga ko yoherezwa ngo rumuburanishe ku byaha yari akurikiranyweho, ariko muri Werurwe 2004, nyuma y’igihe aburanira kutarugarukamo, yafashe indege agana mu Bubiligi. Muri Mata 2007 atangira gukurikiranwa n’inkiko.

Urukiko rwo mu Bubiligi rwaje guhamya Major Ntuyahaga icyaha cyo kwica abasirikare b’Ababiligi n’uruhare muri Jenoside yakorewe Abatutsi, maze ku wa 5 Nyakanga 2007 rumukatira igifungo cy’imyaka 20.

Ntuyahaga Bernard yavukiye muri komine Mabanza mu yahoze ari Perefegitura ya Kibuye, mu 1952.Yinjiye mu Ngabo z’u Rwanda mu 1972, mu 1994 akaba yari afite ipeti rya Major, akora mu biro bikuru by’ingabo, mu ishami rishinzwe ibikoresho, (G4).

Mu gusubiza mu buzima busanzwe abahoze mu mitwe yitwaje intwaro biganjemo ababarizwaga muri FDLR, u Rwanda rumaze kwakira ababarirwa mu bihumbi 11 n’imiryango yabo.

Ntuyahaga yashinjwe ko yavanye abasirikare 10 b’Ababiligi bari mu butumwa bw’amahoro bw’Umuryango w’Abibumbye mu Rwanda (MINUAR) mu 1994 kwa Uwiringiyimana bari bashinzwe kurinda, abashyira mu maboko y’abasirikare bagenzi be muri “Camp Kigali” baza kwicwa.

Chief Editor/MUHABURA.RW


Tanga igitecyerezo

Amazina
Ubutumwa

1 Comment

- 5 months ago

None kuva 2007 kugeza 2018 makumyabiri iruzuye.

Izindi nkuru