Yashyizweho kuri11 February, 2019 | 21:36

U Rwanda rwahakanye iby’uko hari ahantu hafungirwa abantu hatazwi

Polisi y’u Rwanda n’Ubushinjacyaha Bukuru, bahakanye iby’uko mu Rwanda hari ahantu hafungirwa abantu hatazwi mu ibanga ndetse banavuga ko nta n’ahigeze habaho.

Ibi n’ibyagarutsweho kuri uyu wa Mbere tariki ya 11 Gashyantare aho inzego zitandukanye zirimo Ubushinjacyaha bukuru, Urwego rw’Igihugu rushinze Ubugenzacyaha (RIB), Polisi y’igihugu n’izindi nzego, zagiranaga ikiganiro n’itangazamakuru mu gutangiza icyumweru cyahariwe kurwanya ruswa mu nkiko kizamara iminsi 5.

Ku kibazo cy’abantu bamwe bavuga ko bakunze guhura n’ikibazo cyo kumenya aho abantu babo bafungiwe ngo babe babasura cyangwa bakurikirane ikibazo, n’ingamba zihari ngo iki kibazo kirandurwe mu gihugu.

Kuri iki kibazo,Umuyobozi mukuru wa Polisi w’ungirije ushinzwe imiyoborere n’abakozi, DIGP Juvenal Marizamunda yavuze ko bitumvikana uburyo abantu bavuga ko hari ahafungirwa abantu hatazwi kandi nabo ubwabo bavuga ko hatazwi, ibi ngo bigaragaza koko ko hadari.

DIGP Marizamunda yagize ati “Igihugu cyacu kigendera ku mategeko ntabwo dushobora kwemera ko tugira ahantu hatazwi hafungirwa abantu, nta n’ahahari, ahantu hatazwi se wowe utahazi uvuga ute ko hahari kandi utahazi? Ntabwo haba hazwi nyine, nkeka ko namwe muvuga ko bivugwa”.

Yakomeje agira ati “Igihugu cyacu kigendera ku mategeko nta hantu hatazwi dufungira abantu, nta hateganywa kuzabaho kandi nta n’ahigeze habaho.”

Ku ruhande rw’Umushinjacyaha Mukuru w’u Rwanda, Mutangana Jean Bosco, nawe y’unga mu rya mugenzi yemeza ko aho hantu hadari, cyane ko itegeko rivuga ko umuntu wese wafunze umuntu mu buryo bunyuranije n’amategeko ashobora gukurikiranwa akabihanirwa.

Ati “Ntabwo ntekereza ko hari ahantu hatazwi hahari, ndangira ngo mbibutse ko itegeko rivuga ko umuntu wese wafunze umuntu mu buryo bunyuranyije n’amategeko ashobora kuregwa ku mucamanza hagafatwa icyemezo cyo kumuhana, ubwo ni uburenganzira abanyarwanda bafite”.

Yakomeje agira ati “Haramutse hari umuntu wavuga ati umuntu wanjye yarabuze afungiye ahantu hatazwi yabigaragaza, nanjye nk’uko byavuzwe niba aho hantu hatazwi ubwo ntihazwi, haramutse hazwi byaba byiza ukahagaragaza, ariko haramutse hatazwi uwo muntu ashobora no kuba yaragiye mu bindi atanafunze”.

Ni muri urwo rwego kandi hakunze kumvikana ikibazo cy’abantu bafungwa mu buryo bunyuranije n’amategeko, ku buryo ngo hari abafungwa bakarenza iminsi yagenwe n’amategeko.

Umushinjacyaha mukuru Mutangana yavuze ko n’iki cyatanzweho umurongo ngenderwaho kandi ko bamaganye ababikora.Ikindi ngo haramutse hari uwugize ikibazo cyo guhohoterwa mu buryo nk’ubwo, yatanga ayo makuru bigahita bikurikiranwa kandi vuba.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru