Yashyizweho kuri29 January, 2020 | 07:13

Rusizi: Aborobyi bisambaza bafatiwe mu kigobe

Ibi Polisi y’u Rwanda ikorera mu karere ka Rusizi mu murenge wa Gihundwe yabisabye abarobyi nyuma y’aho mu rukerera rwo kuri uyu wa 28 Mutarama, ku bufatanye na koperative y’abarobyi ishinzwe umutekano mu kiyaga cya Kivu bafashe amakipe abiri y’abarobyi yaroberaga ahatemewe.

Aya makipe abiri yafashwe arobera ahazwi nko Mukigobe, ni ukuvuga aho isambaza zikurira cyangwa aho zororerwa nyamara binyuranyije n’amategeko. Ikipe imwe yari ihagarariwe na Manigabe Theobard w’imyaka 33 indi ihagarariwe na Muzehe Placide w’imyaka 28.

Umuvugizi wa Polisi mu ntara y’Iburengerazuba, Chief Inspector of Police (CIP) Bonaventure Twizere Karekezi avuga ko aba barobyi bitwikiriye ijoro bajya kurobera ahasanzwe hororerwa isambaza hazwi nko Mukigobe kandi bisanzwe bibujijwe kuharobera.

Abandi barobyi bashinzwe umutekano wo muri aka gace bahita bitabaza Polisi ikorera ku kirwa cya Nkombo.

Yagize ati: “Ubusanzwe aya makipe y’abarobyi agira gahunda yo kuroba kandi bakagira n’aho barobera; isambaza barobye cyangwa amafi bakabijyana ku mushinga w’uburobyi ubahagarariye. Bariya bafashwe bitwikiriye ijoro bajya kuroba ahatemewe hasanzwe hororerwa isambaza ariko kubw’amahirwe ikipe y’abarobyi ishinzwe umutekano ibabona bataragira ayo baroba.”

Aba barobyi bakimara gutabaza Polisi ikorera ku Nkombo, abapolisi bahise bajyayo bafata aba bagabo bombi bari bayoboye abandi babashyikiriza ubuyobozi bw’umurenge bubaca amande.

CIP Karekezi avuga ko impamvu babuza abarobyi kujya kurobera Mukigobe ari uko ariho isambaza zikurira zarangiza zigakwira mu kiyaga cya Kivu hose, iyo hari abagiye kuyaroba mu buryo bunyuranyije n’amategeko baroba n’isambaza zitarakura bityo umusaruro ugasubira inyuma.

Yavuze ko abarobyi basabwa gukora akazi kabo bakurikije amategeko abagenga ikindi bagakoresha imitego yabugenewe bakirinda gukoresha iyitwa Kaningiri kuko yica isambaza n’amafi mato bityo umusaruro ukaba muke.

Yagize ati: “Bariya barobyi bishyiriyeho amakoperative yo gukoreramo, bafite amategeko abagenga niyo mpamvu rero basabwa kuyubaha no kuyakurikiza birinda gukora ibinyuranyije nayo. Kuroba isambaza cyangwa amafi usibye no kuba atarakura iyo umuntu abikoze mu buryo bunyuranyije n’amategeko arabihanirwa.”

Umuvugizi wa Polisi mu ntara y’Iburengerazuba akomeza asaba abakorera ibikorwa bitandukanye mu biyaga biri hirya no hino mu gihugu, baba abarobyi n’abatwara abantu mu mazi gukomeza gukorana neza na Polisi batangira amakuru ku gihe. Ni mu rwego rwo kubugabunga umutekano wo mu mazi no kurwanya ibyaha bitandukanye nko kuroba mu buryo butemewe, gutunda no gukoresha ibiyobyabwenge nk’uko hari bamwe bagiye babifatirwamo.

Chief editor\ Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe